39 جاستاعى ەر ادامنىڭ وتباسى ونىڭ ولىمىنە دارىگەرلەردىڭ سالعىرتتىعى سەبەپ بولدى دەپ سەنەدى. اۋرۋدىڭ اسقىنۋى مەن جاعدايىنىڭ ناشارلاۋىنا قاراماستان، ناۋقاس دەر كەزىندە كومەك الا المادى دەپ حابارلايدى  Dalanews.kz Almaty.tv ارناسىنا سىلتەمە جاساپ.

ەكى ايدا اياقتالۋى ءتيىس بولعان تەرگەۋ ءىسى ءبىر جىلعا سوزىلىپ كەتتى، – دەپ مالىمدەيدى Almaty.tv ءتىلشىسى.

مۇحتار يسابەكوۆ جىل باسىندا اۋرۋحاناعا بارىپ، كەۋدە تۇسىنىڭ اۋىرۋى مەن السىزدىككە شاعىمدانعان. الايدا تۋىستارىنىڭ ايتۋىنشا، دارىگەرلەر كومەك كورسەتۋگە اسىقپاعان.

باستاپقىدا ەر ادامدى ورىن جوق دەگەن سىلتاۋمەن اۋرۋحاناعا جاتقىزعىسى كەلمەگەن. كەيىن، تۋىستارىنىڭ ايتۋىنشا، «العىسسىز» ەم جاسالمايتىنىن استارلاپ جەتكىزگەن.

«ولار مەنىڭ ءىنىمدى قابىلدامادى، ۋاقىتتى سوزدى. اقشا سۇرادى — ءبىز بەردىك، تەك تەكسەرۋدەن وتكىزسىن دەدىك. ءقازىر اقشا بەرمەسەڭ، ەشكىم ەشتەڭە ىستەمەيدى. سوندا دارىگەرلەر نە ءۇشىن انت بەرەدى، ەگەر ونى ورىنداماسا؟» — دەيدى مارقۇمنىڭ اعاسى ساكەن يسابەكوۆ.

ناۋقاستى اۋرۋحاناعا جاتقىزعان سوڭ، ونىڭ جاعدايى كۇرت ناشارلاپ كەتكەن. اناسىنىڭ ايتۋىنشا، ۇلى بىرنەشە رەت ۇيگە قوڭىراۋ شالىپ، «الىپ كەتىڭدەرشى» دەپ وتىنگەن — اۋىرسىنۋ توزبەيتىن دەڭگەيگە جەتتى. بىرنەشە كۇننەن كەيىن مۇحتار كوز جۇمدى.

دارىگەرلەردىڭ العاشقى قورىتىندىسىندا: «وكپەدە ازداعان سۇيىقتىق بار» دەلىنگەن. الايدا ساراپتاما ناتيجەسىندە — شامامەن ءبىر جارىم ليتر سۇيىقتىق انىقتالعان. تاۋەلسىز ساراپتاما دارىگەرلەردىڭ نەمقۇرايلىعى مەن دەر كەزىندە ەم كورسەتىلمەگەنىن راستادى.

پوليسيا باسقارماسى باستىعىنىڭ ورىنباسارى تەرگەۋدىڭ توقتاتىلماعانىن ايتتى.

«تەرگەۋ مەرزىمى — ەكى اي. ەگەر قوسىمشا ءىس-شارالار قاجەت بولسا، ءبىز ونى پروكۋرور ارقىلى تاعى ءۇش-تورت ايعا ۇزارتامىز. دارىگەرگە قاتىستى ساراپتامالار تاعايىندالدى. قوسىمشا سوت-مەديسينالىق كوميسسيا وتكىزۋ جوسپارلانىپ وتىر»، — دەدى وبلىستىق پوليسيا دەپارتامەنتى باستىعىنىڭ ورىنباسارى بايجان بايگەلدى.