ەلىمىزدىڭ ەڭ كونە قالاسى بولسا دا تاۋەلسىزدىك جىلدارى جاڭا زامان تالابىنا ساي تۇرلەنىپ كەلە جاتقان تاراز قالاسى بۇگىندە دامۋدىڭ داڭعىل جولىنا ءتۇستى. ناتيجەسىندە، ەجەلگى شاھار جاڭا سيپات الىپ، كۇننەن-كۇنگە كوركەيىپ، كورىكتەنىپ كەلەدى، - دەپ حابارلايدى جامبىل وبلىسى اكىمى باسپا ءسوز قىزمەتى. 

قازىرگى تاڭدا قالادا قۇرىلىس قارقىندى ءجۇرىپ جاتىر. باسقانى بىلاي قويعاندا بيىل تاراز قالاسىنىڭ اۆتوبەكەت ماڭىندا 14ء-شى، ى. سۇلەيمەنوۆ كوشەسىنىڭ سوڭىندا 15ء-شى ىقشام اۋدانداردىڭ ىرگەتاسى قالانۋدا. وبلىس اكىمى كارىم كوكىرەكبايەۆ بيىلعى حالىق الدىنداعى ەسەپتى كەزدەسۋىندە قوس ىقشام اۋداننىڭ كونە شاھار كوركىنە كورىك قوسىپ، ساۋلەتى مەن داۋلەتى جاراسقان ىقشام اۋدانعا اينالاتىنىن ايتقان بولاتىن. بۇگىن مىنە، اۋماعى 100 گەكتاردى قۇرايتىن اۆتوبەكەت ايماعىنداعى 14ء-شى ىقشام اۋداننىڭ قۇرىلىس جوباسى وبلىس اكىمىنە تانىستىرىلدى.

ۇلتتىق قۇرىلىس سالاسى اسسوسياسياسى پرەزيدەنتى مۇحيت ازەربايەۆتىڭ ايتۋىنشا، جاڭادان بوي كوتەرەتىن 14ء-شى ىقشام اۋداندا 49 كوپقاباتتى ءۇي، ونىڭ ىشىندە بەس قاباتتى 27، توعىز قاباتتى 16، ون ەكى قاباتتى 6 ءۇي سالىنادى. جالپى تۇرعىندارعا بەرىلەتىن 5 460 پاتەرگە 16 000 ادام قونىستانادى دەپ جوسپارلانۋدا. بۇل اۋماقتا تۇرعىن ۇيلەردەن بولەك، الەۋمەتتىك نىساندار دا كوپتەپ سالىنادى. مىسالى، 250 ورىندىق 3 بالاباقشا، 2 ورتا مەكتەپ، بالالاردى بەيىمدەۋ ورتالىعىنىڭ قۇرىلىسى جۇرگىزىلىپ، اۋىسىمىنا شامامەن 500 ادام قابىلدايتىن ەمحانا مەن ونكولوگيالىق ديسپانسەر، دياگنوستيكالىق ورتالىق سالىنباق. سونداي-اق، تارازدىقتاردىڭ كوپتەن كۇتكەن نەكە ءۇيى دە وسى ىقشام اۋداندا بوي كوتەرەتىن بولادى. بۇدان بولەك، ىشىندە سپورت زالدار مەن جابىق ءجۇزۋ باسسەينى قاراستىرىلعان سپورتتىق-ساۋىقتىرۋ كەشەنى؛ قۇرامىندا بي زالدارى، كلۋبتار، قالالىق كىتاپحانا جانە كينوتەاتر بار دەمالىس ورتالىعى دا تالايدىڭ تاڭدايىن قاقتىرادى. سونىمەن قاتار، زاماناۋي ساۋدا - ساتتىق، تۇرمىستىق قىزمەت كورسەتۋ كەشەندەرى مەن بيزنەس ورتالىقتاردىڭ دا ەسىك اشاتىن كۇنى الىس ەمەس.

كونە شاھاردىڭ كوركەم كەڭىستىگىنە كەلىستى كەلبەت سىيلايتىن ىقشام اۋداننىڭ جوباسىن مۇقيات قاراپ شىققان ايماق باسشىسى ءوز كەزەگىندە جوبالاۋشىلارعا ءبىرقاتار ۇسىنىستارىن دا ايتىپ ءوتتى.

– تاراز قالاسى كۇننەن كۇنگە قۇلپىرىپ كەلەدى. بۇگىنگى تانىستىرىلىپ وتىرعان 14ء-شى ىقشام اۋداننىڭ قۇرىلىس جوباسى تولىقتاي ىسكە اسسا، كونە شاھاردىڭ تاعى دا قۇلپىرا تۇسەتىنى انىق. دەگەنمەن، جوباداعى دەمالىس ورىندارىندا سۋبۇرقاقتاردى بايقاماي تۇرمىن. سونداي-اق، ىقشام اۋداندا سالىناتىن ساۋدا كەشەندەرى ۇلكەن جولدىڭ بويىندا ورنالاسىپتى. بۇل ءوز كەزەگىندە تۇرعىندارعا قولايسىزدىق تۋعىزۋى مۇمكىن. وسىنى قايتا قاراپ، كولىك از جۇرەتىن ىقشام اۋدان بولىگىنە ورنالاستىرۋ قاجەت دەپ ويلايمىن، – دەدى كارىم كوكىرەكبايەۆ.

ۇلتتىق قۇرىلىس سالاسى اسسوسياسياسى پرەزيدەنتى م. ازەربايەۆ وبلىس اكىمى ايتقان سىن-ەسكەرتپەلەردىڭ نەگىزگە الىناتىنىن، الداعى كۇندەرى قۇرىلىس جوباسىن جەتىلدىرۋ ءۇشىن بىرلەسكەن جۇمىسشى كەڭەس قۇرۋ باستاماسىن ۇسىندى. بۇل ماسەلە جونىندە ايماق باسشىسى ءتيىستى سالا باسشىلارىنا تاپسىرما بەردى.