Taraz gúldenip keledi
Qazirgi tańda qalada qurylys qarqyndy júrip jatyr. Basqany bylai qoiǵanda biyl Taraz qalasynyń avtobeket mańynda 14-shi, Y. Súleimenov kóshesiniń sońynda 15-shi yqsham aýdandardyń irgetasy qalanýda. Oblys ákimi Kárim Kókirekbaev biylǵy halyq aldyndaǵy esepti kezdesýinde qos yqsham aýdannyń kóne shahar kórkine kórik qosyp, sáýleti men dáýleti jarasqan yqsham aýdanǵa ainalatynyn aitqan bolatyn. Búgin mine, aýmaǵy 100 gektardy quraityn avtobeket aimaǵyndaǵy 14-shi yqsham aýdannyń qurylys jobasy oblys əkimine tanystyryldy.
Ulttyq qurylys salasy assotsiatsiiasy prezidenti Muhit Ázerbaevtyń aitýynsha, jańadan boi kóteretin 14-shi yqsham aýdanda 49 kópqabatty úi, onyń ishinde bes qabatty 27, toǵyz qabatty 16, on eki qabatty 6 úi salynady. Jalpy turǵyndarǵa beriletin 5 460 páterge 16 000 adam qonystanady dep josparlanýda. Bul aýmaqta turǵyn úilerden bólek, áleýmettik nysandar da kóptep salynady. Mysaly, 250 oryndyq 3 balabaqsha, 2 orta mektep, balalardy beiimdeý ortalyǵynyń qurylysy júrgizilip, aýysymyna shamamen 500 adam qabyldaityn emhana men onkologiialyq dispanser, diagnostikalyq ortalyq salynbaq. Sondai-aq, tarazdyqtardyń kópten kútken neke úii de osy yqsham aýdanda boi kóteretin bolady. Budan bólek, ishinde sport zaldar men jabyq júzý basseini qarastyrylǵan sporttyq-saýyqtyrý kesheni; quramynda bi zaldary, klýbtar, qalalyq kitaphana jáne kinoteatr bar demalys ortalyǵy da talaidyń tańdaiyn qaqtyrady. Sonymen qatar, zamanaýi saýda - sattyq, turmystyq qyzmet kórsetý keshenderi men biznes ortalyqtardyń da esik ashatyn kúni alys emes.
Kóne shahardyń kórkem keńistigine kelisti kelbet syilaityn yqsham aýdannyń jobasyn muqiiat qarap shyqqan aimaq basshysy óz kezeginde jobalaýshylarǵa birqatar usynystaryn da aityp ótti.
– Taraz qalasy kúnnen kúnge qulpyryp keledi. Búgingi tanystyrylyp otyrǵan 14-shi yqsham aýdannyń qurylys jobasy tolyqtai iske assa, kóne shahardyń taǵy da qulpyra túsetini anyq. Degenmen, jobadaǵy demalys oryndarynda sýburqaqtardy baiqamai turmyn. Sondai-aq, yqsham aýdanda salynatyn saýda keshenderi úlken joldyń boiynda ornalasypty. Bul óz kezeginde turǵyndarǵa qolaisyzdyq týǵyzýy múmkin. Osyny qaita qarap, kólik az júretin yqsham aýdan bóligine ornalastyrý qajet dep oilaimyn, – dedi Kárim Kókirekbaev.
Ulttyq qurylys salasy assotsiatsiiasy prezidenti M. Ázerbaev oblys ákimi aitqan syn-eskertpelerdiń negizge alynatynyn, aldaǵy kúnderi qurylys jobasyn jetildirý úshin birlesken jumysshy keńes qurý bastamasyn usyndy. Bul másele jóninde aimaq basshysy tiisti sala basshylaryna tapsyrma berdi.
