جۋرناليست گۇلبانۋ ابەنوۆا ءوزىنىڭ الەۋمەتتىك جەلىدەگى جازباسىندا جۋرناليست ءارى بلوگەر اسحات نيازوۆتىڭ “Dala SK” قۇرىلىس كومپانياسىمەن ينتەگراسيا ارقىلى جاساعان جارنامالىق كونتەنتىنە بايلانىستى الاڭداۋشىلىق ءبىلدىردى. ول بۇل جاعدايعا قاتىستى پىكىرىن اشىق ايتىپ، «وبوجايۋ» ارناسىنا شىققان سوڭعى شىعارىلىمدى مىسال ەتتى. جازبادا جۋرناليست كاسىبي جاۋاپكەرشىلىك، الاياق قۇرىلىسشىلار جانە جۋرناليستيكانىڭ ەتيكاسى ماسەلەلەرىن كوتەرەدى.
«ادامدار اسحاتقا سەنەدى، ال ول سەنىمدى اقتاي المادى»
«اسحات نيازوۆتىڭ سوڭعى باعدارلاماسىن كورىپ شىقتىم. ول Dala SK كومپانياسىمەن جاساعان كوممەرسيالىق ارىپتەستىگى تۋرالى ايتىپ وتىر. ول كومپانيانىڭ بولاشاعى بار قۇرىلىس مەكەمەسى ەكەنىن ايتىپ، بارىنشا ماقتادى. وبەكتىگە بارىپ، ءبارى قانداي جاقسى ەكەنىن كورسەتتى. ءبىراق اقىرى نە بولدى؟ تاعى دا الدانعان ۇلەسكەرلەردىڭ سانى ارتتى، ۋادە ەتىلگەن پاتەرلەر جوق. بۇل – وتە ۇيات جاعداي»، – دەپ جازادى ابەنوۆا.
ونىڭ ايتۋىنشا، بۇل وقيعادا جارنامانىڭ ءرولى از ەمەس. «اسحات جاي عانا بلوگەر ەمەس، كوپشىلىكتىڭ سۇيىكتىسى، سەنىمدى ادام. جۋرناليست رەتىندە دە تانىمال. سوندىقتان ونىڭ سوزىنە ادامدار سەندى»، – دەيدى ول.
الايدا قازىرگى تاڭدا نيازوۆ ءوزىن اقتاپ، «مەن زاڭگەر ەمەسپىن» دەپ جاۋاپ بەرىپ ءجۇر. بۇعان قاتىستى گۇلبانۋ: «بۇل – كۇلكىلى ءارى كاسىبي ەمەس. اسىرەسە بۇگىنگىدەي جاعدايدا، ءاربىر ءسوزىڭ ءۇشىن جۋرناليستەر سوتقا تارتىلىپ جاتقان كەزدە، بۇلاي جاۋاپ بەرۋ ۇيات»، – دەپ سىنادى.
«جۋرناليست ءبارىن تەكسەرۋگە مىندەتتى»
ابەنوۆا جۋرناليست رەتىندە ۇلكەن اۋديتوريا الدىندا ءسوز ايتاتىن ادامنىڭ اقپاراتتى تەكسەرمەي جارناما جاساۋىن كاسىبي دەڭگەيسىزدىك دەپ باعالادى. ونىڭ ويىنشا، مۇنداي سالعىرتتىقپەن جۇمىس ىستەۋ - ماسقارا.
«مەن اسحاتتىڭ وسىنداي جاعدايعا تاپ بولعانىنا تاڭمىن. قۇرىلىس كومپانيالارى ءسوزسىز جازالانۋى كەرەك، ءبىراق اسحاتتىڭ دا بۇل قاتەلىگى كەشىرىلمەيدى»، – دەيدى ول.
گۇلبانۋ مىسال رەتىندە ءوزىنىڭ بەس جىل بۇرىن باسىنان وتكەن جاعدايدى كەلتىردى. سول كەزدە بەلگىسىز ءبىر قۇرىلىس كومپانياسى وعان 50% جەڭىلدىكپەن پاتەر ۇسىنعان. قالعان سومانى يسلام بانكى ارقىلى نەسيەگە الۋعا بولاتىنى ايتىلعان. ول شەشىم قابىلداماس بۇرىن بارلىق قۇجاتتى قاراپ شىعىپ، كومپانيانىڭ سەنىمسىز ەكەنىن انىقتاپ، مامىلەدەن باس تارتقان.
«بەسىنشى مامىر ءوتتى، ال ول ءۇي ءالى پايدالانۋعا بەرىلگەن جوق. ەگەر مەن سۇراق قويىپ، اقپارات تەكسەرمەگەنىمدە، ءقازىر سول ۇيگە كىرمەي-اق نەسيە تولەپ وتىرار ەدىم. ال مەنىڭ جارناماما سەنىپ، ادامدار اقشا سالىپ، مەنى قارعاپ وتىرعان بولار ەدى»، – دەيدى ول.
«اسحات سەنىم ارتقان ادامدار – الاياقتار. بۇل – جۋرناليستىك قاتەلىك قانا ەمەس»
ابەنوۆا اسحاتتىڭ "مەن زاڭگەر ەمەسپىن" دەگەن ءۋاجىن قابىلدامايدى. ونىڭ ايتۋىنشا، ءبارىمىز زاڭگەر ەمەسپىز، ءبىراق لوگيكا مەن ساۋاتتى سۇراق قويۋ قابىلەتىن ەشكىم جويعان جوق. «مەديالىق ادام الاياق قۇرىلىسشىلارمەن بايلانىسى بارىن ءوزى مويىنداپ وتىر. كەزدەيسوق پا، جوق پا – ونى تەرگەۋ انىقتاسىن. ءبىراق مەنىڭشە، بۇل – تىم تاۋەكەلگە بارعان قادام»، – دەپ جازادى ول.
جۋرناليست اسحاتتىڭ باستى قاتەلىگى – اۋديتورياسىنىڭ سەنىمىن اقتاماۋى، دەيدى گۇلبانۋ. «ول جارناما ارقىلى اقشا تاپقىسى كەلدى، بۇل قالىپتى جاعداي. ءبىراق سەنىڭ جارناماڭنان كەيىن ادامدار اقشاسىنان ايىرىلىپ جاتسا – بۇل سەنىڭ دە جاۋاپكەرشىلىگىڭ. ساعان سەنگەندەر ءۇشىن سەن جاۋاپتىسىڭ. بالالىقتان تانىس ءبىر ءسوزدى وزگەرتىپ ايتسام: سەن سەندىرگەندەرگە سەن دە جاۋاپ بەرەسىڭ»، – دەدى ول.
ول سونداي-اق مەديا تۇلعالار جارنامالايتىن تاۋار مەن قىزمەت ءۇشىن جاۋاپ بەرۋى ءتيىس ەكەنىن ايتتى.
«ونىمگە سەنىمدىسىڭ بە – جارنامالا. سەنىمدى ەمەسسىڭ بە – قۇجاتتاردى تەكسەرمەگەنسىڭ بە – جاۋاپ بەر. كەشىرىم سۇراۋ – كورەرمەننىڭ كوڭىلىن جۇمسارتۋى مۇمكىن. ءبىراق جارناماعا سەنىپ، سوڭعى اقشاسىن سەنىمسىز قۇرىلىس كومپانياسىنا تاپسىرعان ادامدار نە ىستەمەك؟» – دەيدى جۋرناليست.
