اسا قامقور، ەرەكشە مەيىرىمدى اللانىڭ اتىمەن باستايمىن! بىرلىك – قاسيەتتى ءسوز. قاسيەتتى كىتابىمىز قۇراندا بىرلىك تۋرالى باياندالعان. سوڭعى پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن) حاديستەرىندە دە ادامزاتتىڭ اۋىزبىرشىلىگىن ۋاعىزداعان. جاراتۋشى يەمىز «ءالي يمران» سۇرەسىندە: «...بولىنبەڭدەر»، – دەپ ءامىر ەتسە، ونىڭ ەلشىسى: «...كوپشىلىكپەن بىرگە بولىڭدار! بولىنۋدەن ساقتانىڭدار»، – دەپ، جاماعاتتى، بارشا ادام بالاسىن مەيىرىمدىلىككە، ورتاق ماقساتقا ۇندەگەن.

حالقىمىزدىڭ بي-شەشەندەرى مەن اقىن-جىراۋلارى دا ءارقاشان وسيەتتى سوزدەرى مەن عيبراتتى تولعامدارىندا، ولەڭ-جىرلارىندا بىرلىكتى ناسيحاتتاعان. مايقى بي بابامىزدىڭ:

«التاۋ الا بولسا، اۋىزداعى كەتەدى،

تورتەۋ تۇگەل بولسا، توبەدەگى كەلەدى»، – دەگەن ناقىل ءسوزى قانشا عاسىر وتسە دە ۇرپاققا ونەگە بولا بەرمەك. تولە ءبيدىڭ: «بىرلىك بولماي، تىرلىك بولماس»، – دەۋى دە تەگىن ەمەس. وسىناۋ پاراساتتى پايىمداۋلار حالقىمىزدىڭ ساناسىندا ساقتالىپ، دوسقا قامقور، وزگەگە ونەگە كورسەتىپ، بىرلىكتى تۋ ەتىپ كەلەدى.

بيىل اللانىڭ بىزگە بەرگەن نىعمەتى – تاۋەلسىزدىگىمىزدىڭ 25 جىلدىق مەرەيلى مەرەكەسى. سىزدەردى وسىناۋ تاۋەلسىزدىگىمىزدىڭ 25 جىلدىق مەرەيتويىمەن جانە 1 مامىر بىرلىك مەرەكەسىمەن قۇتتىقتايمىن.

اللا تاعالا حالقىمىزدىڭ بىرلىگى مەن بەرەكەسىن ارتتىرىپ، تاۋەلسىزدىگىمىزدى باياندى ەتكەي! تىلەگىمىز قابىل، مۇراتىمىز اسىل بولعاي! ءامين!

 

ەرجان قاجى مالعاجى ۇلى،

قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي.