Asa qamqor, erekshe meıirimdi Allanyń atymen bastaımyn! Birlik – qasıetti sóz. Qasıetti kitabymyz Quranda birlik týraly baıandalǵan. Sońǵy paıǵambarymyz Muhammed (Allanyń oǵan salaýaty men sálemi bolsyn) hadısterinde de adamzattyń aýyzbirshiligin ýaǵyzdaǵan. Jaratýshy Iemiz «Álı Imran» súresinde: «...Bólinbeńder», – dep ámir etse, Onyń Elshisi: «...Kópshilikpen birge bolyńdar! Bólinýden saqtanyńdar», – dep, jamaǵatty, barsha adam balasyn meıirimdilikke, ortaq maqsatqa úndegen.

Halqymyzdyń bı-sheshenderi men aqyn-jyraýlary da árqashan ósıetti sózderi men ǵıbratty tolǵamdarynda, óleń-jyrlarynda birlikti nasıhattaǵan. Maıqy bı babamyzdyń:

«Altaý ala bolsa, aýyzdaǵy ketedi,

Tórteý túgel bolsa, tóbedegi keledi», – degen naqyl sózi qansha ǵasyr ótse de urpaqqa ónege bola bermek. Tóle bıdiń: «Birlik bolmaı, tirlik bolmas», – deýi de tegin emes. Osynaý parasatty paıymdaýlar halqymyzdyń sanasynda saqtalyp, dosqa qamqor, ózgege ónege kórsetip, birlikti tý etip keledi.

Bıyl Allanyń bizge bergen nyǵmeti – Táýelsizdigimizdiń 25 jyldyq mereıli merekesi. Sizderdi osynaý Táýelsizdigimizdiń 25 jyldyq mereıtoıymen jáne 1 mamyr birlik merekesimen quttyqtaımyn.

Alla Taǵala halqymyzdyń birligi men berekesin arttyryp, Táýelsizdigimizdi baıandy etkeı! Tilegimiz qabyl, muratymyz asyl bolǵaı! Ámın!

 

Erjan qajy MALǴAJYULY,

Qazaqstan musylmandary dinı basqarmasynyń tóraǵasy, Bas múftı.