تاڭات اۋىلىنىڭ تاعدىرى قىل ۇستىندە!..

Dalanews 25 مام. 2015 23:16 153

 

شىعىس قازاقستان وبلىسىنىڭ اكىمى دانيال احمەتوۆتىڭ،

سەمەي قالاسىنىڭ اكىمى ايبەك كارىموۆتىڭ نازارىنا!

رەداكسيامىزعا شىعىس قازاقستان وبلىسى سەمەي قالاسىنا قاراستى تاڭات اۋىلىنىڭ تۇرعىندارى تەلەفون شالدى. بايقاعانىمىز، اۋىل تۇرعىندارىنىڭ سەمەي قالاسىنىڭ اكىمدىگىنە وكپەلەرى قارا قازانداي سەكىلدى. ولاردىڭ ايتۋىنشا، تاڭات اۋىلىنىڭ تۇرعىندارى 2015 جىلى 28-قاڭتاردا سەمەي قالاسىنىڭ اكىمى ايبەك ءمۇتالاپحان ۇلى كارىموۆكە حات جولدايدى (حاتتىڭ كوشىرمەسى تومەندە ۇسىنىلىپ وتىر). بۇل حاتتا اۋىل تۇرعىندارى تاڭات اۋىلىنداعى تۇيتكىلدى پروبلەمالاردى – مەكتەپتىڭ، مەديسينالىق پۋنكتتىڭ، مادەنيەت ءۇيىنىڭ، كىتاپحانانىڭ، پوشتا بايلانىسىنىڭ جوقتىعىن، سەمەي قالاسى مەن اۋىل اراسىنداعى جول قاتىناسىنىڭ ناشارلىعىن، اۋىلدىڭ بۇرىنعى يادرولىق سىناق پوليگونىنىڭ ىرگەسىندە ورنالاسقاندىقتان مۇندا تۇراتىن تۇرعىندار اراسىندا قاتەرلى اۋرۋلاردىڭ ورىن الىپ وتىرعانىن جازعان. سوندىقتان بۇل اۋىلعا بۇرىندارى «كەلەشەگى جوق» دەپ تانىلعان ساماي، سوس. قازاقستان، قاراولەڭ، قىزىلجال، كيىكقاشقان اۋىلدارى سەكىلدى مارتەبە بەرىپ، اۋىل تۇرعىندارىن سەمەي قالاسىنان باسپانامەن قامتاماسىز ەتۋگە كومەك كورسەتىلسە دەگەن تىلەكتەرىن جەتكىزگەن. سونىمەن قاتار حاتتا وسى ماسەلەنى تۇبەگەيلى زەرتتەپ، اۋىل تۇرعىندارىنىڭ قارجىلىق، ماتەريالدىق، شارۋاشىلىق جاعدايىن انىقتاۋ ءۇشىن قالا اكىمدىگى تاراپىنان ارنايى جۇمىس توبىن قۇرۋدى وتىنگەن.

اۋىلالايدا سەمەي قالاسىنىڭ اكىمدىگى اۋىل تۇرعىندارىنىڭ ءوتىنىشىن اياقسىز قالدىرعان. اۋىل تۇرعىندارى وزدەرىنىڭ جانايقايىنا قالا اكىمدىگىنىڭ بەي-جاي قاراپ، سۇيكەيسالدى جاۋاپ بەرگەندەرىنە الاڭداۋلى. تاڭات اۋىلىنىڭ تۇرعىنى ءا.قاسىموۆقا سەمەي قالاسىنىڭ تۇرعىن ۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى بولىمىنەن ەكى بەتتىك حات كەلىپتى (حات ءماتىنىنىڭ كوشىرمەسى تومەندە ۇسىنىلىپ وتىر). حاتتا اۋىل تۇرعىندارىنىڭ وتىنىش-تىلەگى تۋرالى ءبىر اۋىز ءسوز جوق. نەگە ەكەنى بەلگىسىز، بۇل حاتتا سەمەي قالاسىنان پاتەر الۋ ءۇشىن كەزەككە قالاي تۇرۋعا بولاتىنى، وعان قانداي قۇجاتتاردىڭ كەرەكتىگى تۋرالى ەگجەي-تەگجەيلى جاۋاپ بەرىلىپتى. شاماسى، قالالىق اكىمدىكتەگىلەر اۋىل تۇرعىندارى اتىنان جازىلعان حاتتاعى «وسى ساۋال-حات قاتىناسقا تاياۋ ارادا ءتيىستى شارالار تىزبەسى بەلگىلەنگەن جاۋاپ كەلەدى دەپ كۇتەمىز. ول جاۋاپ-قاتىناس ارنايى ءبىر ادامنىڭ اتىنا، ياعني، اۋىل تۇرعىنى ءابىل كوشەرباي ۇلى قاسىموۆتىڭ اتىنا جىبەرىلۋىن سۇرايمىز» دەگەن سويلەمدى بۇل كىسى (ءا.قاسىموۆ) باسپانا سۇراپ وتىر دەپ قاتە تۇسىنگەن سەكىلدى. اۋىل تۇرعىندارى قالالىق اكىمدىكتەن كەلگەن جارىمجان جاۋاپتى تۇسىنبەي اڭ-تاڭ.

– سەمەي قالاسى اكىمدىگىنەن ءوز باسىنا باسپانا سۇراپ، حات جازعان ەشكىم جوق. بۇل حاتتا بۇكىل اۋىل تۇرعىندارىنىڭ ماسەلەسى كوتەرىلىپ، جانايقايى جازىلىپ وتىر. ءبىز بۇل حاتتى جاۋاپ رەتىندە قابىلداي المايمىز. اۋىل تۇرعىندارى سەمەي قالاسى اكىمدىگىنىڭ بۇل جاۋابىنا مۇلدە قاناعاتتانبايدى. مۇنى ءبىز قالا اكىمدىگىنىڭ اۋىل تۇرعىندارىنىڭ ماسەلەسىنە نەمقۇرايلى قاراۋى دەپ تۇسىنەمىز. سوندىقتان 2015 جىلعى 28 قاڭتاردا تاڭات اۋىل تۇرعىندارى اتىنان سەمەي قالاسىنىڭ اكىمى ايبەك كارىموۆكە جولدانعان حاتتى سەمەي قالاسىنىڭ اكىمدىگى قايتادان مۇقيات قاراپ، ءتيىستى شەشىم قابىلداپ، قايتادان جاۋاپ بەرۋلەرىن سۇرايمىز، - دەيدى تاڭات اۋىلىنىڭ تۇرعىندارى.

حات (2)P.S. تاڭات اۋىلىنىڭ تۇرعىندارى سەمەي قالاسىنىڭ اكىمى ايبەك كارىموۆتىڭ بۇل ماسەلەدەن حاباردار ەكەنىن، جىل باسىندا وسى اۋىلدا وتكەن ەسەپتىك كەزدەسۋدە ول كىسىنىڭ بۇل تۇيتكىلدى شەشۋگە جاردەمدەسەمىن دەگەنىن ايتادى. «بۇل حات قالا اكىمىنە جەتپەي قالۋى دا مۇمكىن. سوندىقتان ول كىسىنىڭ قاراماعىنداعى قىزمەتكەرلەر تاراپىنان تۇسىنبەۋشىلىك تۋىنداعان سەكىلدى. اۋىل تۇرعىندارى سەمەي قالاسىنىڭ اكىمى ايبەك كارىموۆتىڭ بۇل ماسەلەنى تىكەلەي ءوز باقىلاۋىنا الىپ، ءتيىستى شەشىم قابىلدايتىنىنا سەنىم بىلدىرەدى» دەيدى اۋىل تۇرعىندارى.

شىعىس قازاقستان وبلىسىنىڭ اكىمى دانيال احمەتوۆتىڭ كەز كەلگەن ماسەلەگە ۇلكەن جاۋاپكەرشىلىكپەن قارايتىن باسشى ەكەنىن جاقسى بىلەمىز. سوندىقتان تاڭات اۋىلى تۇرعىندارىنىڭ جانايقايى، كوتەرىپ وتىرعان ماسەلەلەرى ەسكەرۋسىز قالمايدى دەپ سەنەمىز.       

ۇسىنىلعان
سوڭعى جاڭالىقتار
x