Tańat aýylynyń taǵdyry qyl ústinde!..: 26 mamyr 2015

Shyǵys Qazaqstan oblysynyń ákimi Danial Ahmetovtiń,

Semei qalasynyń ákimi Aibek Kárimovtiń nazaryna!

Redaktsiiamyzǵa Shyǵys Qazaqstan oblysy Semei qalasyna qarasty Tańat aýylynyń turǵyndary telefon shaldy. Baiqaǵanymyz, aýyl turǵyndarynyń Semei qalasynyń ákimdigine ókpeleri qara qazandai sekildi. Olardyń aitýynsha, Tańat aýylynyń turǵyndary 2015 jyly 28-qańtarda Semei qalasynyń ákimi Aibek Mútalaphanuly Kárimovke hat joldaidy (hattyń kóshirmesi tómende usynylyp otyr). Bul hatta aýyl turǵyndary Tańat aýylyndaǵy túitkildi problemalardy – mekteptiń, meditsinalyq pýnkttiń, mádeniet úiiniń, kitaphananyń, poshta bailanysynyń joqtyǵyn, Semei qalasy men aýyl arasyndaǵy jol qatynasynyń nasharlyǵyn, aýyldyń burynǵy iadrolyq synaq poligonynyń irgesinde ornalasqandyqtan munda turatyn turǵyndar arasynda qaterli aýrýlardyń oryn alyp otyrǵanyn jazǵan. Sondyqtan bul aýylǵa buryndary «keleshegi joq» dep tanylǵan Samai, Sots. Qazaqstan, Qaraóleń, Qyzyljal, Kiikqashqan aýyldary sekildi mártebe berip, aýyl turǵyndaryn Semei qalasynan baspanamen qamtamasyz etýge kómek kórsetilse degen tilekterin jetkizgen. Sonymen qatar hatta osy máseleni túbegeili zerttep, aýyl turǵyndarynyń qarjylyq, materialdyq, sharýashylyq jaǵdaiyn anyqtaý úshin qala ákimdigi tarapynan arnaiy jumys tobyn qurýdy ótingen.

Alaida Semei qalasynyń ákimdigi aýyl turǵyndarynyń ótinishin aiaqsyz qaldyrǵan. Aýyl turǵyndary ózderiniń janaiqaiyna qala ákimdiginiń bei-jai qarap, súikeisaldy jaýap bergenderine alańdaýly. Tańat aýylynyń turǵyny Á.Qasymovqa Semei qalasynyń turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminen eki bettik hat kelipti (hat mátininiń kóshirmesi tómende usynylyp otyr). Hatta aýyl turǵyndarynyń ótinish-tilegi týraly bir aýyz sóz joq. Nege ekeni belgisiz, bul hatta Semei qalasynan páter alý úshin kezekke qalai turýǵa bolatyny, oǵan qandai qujattardyń kerektigi týraly egjei-tegjeili jaýap berilipti. Shamasy, qalalyq ákimdiktegiler aýyl turǵyndary atynan jazylǵan hattaǵy «Osy saýal-hat qatynasqa taiaý arada tiisti sharalar tizbesi belgilengen jaýap keledi dep kútemiz. Ol jaýap-qatynas arnaiy bir adamnyń atyna, iaǵni, aýyl turǵyny Ábil Kósherbaiuly Qasymovtyń atyna jiberilýin suraimyz» degen sóilemdi bul kisi (Á.Qasymov) baspana surap otyr dep qate túsingen sekildi. Aýyl turǵyndary qalalyq ákimdikten kelgen jarymjan jaýapty túsinbei ań-tań.

– Semei qalasy ákimdiginen óz basyna baspana surap, hat jazǵan eshkim joq. Bul hatta búkil aýyl turǵyndarynyń máselesi kóterilip, janaiqaiy jazylyp otyr. Biz bul hatty jaýap retinde qabyldai almaimyz. Aýyl turǵyndary Semei qalasy ákimdiginiń bul jaýabyna múlde qanaǵattanbaidy. Muny biz qala ákimdiginiń aýyl turǵyndarynyń máselesine nemquraily qaraýy dep túsinemiz. Sondyqtan 2015 jylǵy 28 qańtarda Tańat aýyl turǵyndary atynan Semei qalasynyń ákimi Aibek Kárimovke joldanǵan hatty Semei qalasynyń ákimdigi qaitadan muqiiat qarap, tiisti sheshim qabyldap, qaitadan jaýap berýlerin suraimyz, - deidi Tańat aýylynyń turǵyndary.

P.S. Tańat aýylynyń turǵyndary Semei qalasynyń ákimi Aibek Kárimovtiń bul máseleden habardar ekenin, jyl basynda osy aýylda ótken eseptik kezdesýde ol kisiniń bul túitkildi sheshýge járdemdesemin degenin aitady. «Bul hat qala ákimine jetpei qalýy da múmkin. Sondyqtan ol kisiniń qaramaǵyndaǵy qyzmetkerler tarapynan túsinbeýshilik týyndaǵan sekildi. Aýyl turǵyndary Semei qalasynyń ákimi Aibek Kárimovtiń bul máseleni tikelei óz baqylaýyna alyp, tiisti sheshim qabyldaitynyna senim bildiredi» deidi aýyl turǵyndary.

Shyǵys Qazaqstan oblysynyń ákimi Danial Ahmetovtiń kez kelgen máselege úlken jaýapkershilikpen qaraityn basshy ekenin jaqsy bilemiz. Sondyqtan Tańat aýyly turǵyndarynyń janaiqaiy, kóterip otyrǵan máseleleri eskerýsiz qalmaidy dep senemiz.

Tańat aýylynyń taǵdyry qyl ústinde!..

Oqi otyryńyz

Qazaqstan jahandyq bedel reitinginde kósh bastady

Qazaqstandyqtar nege ekpeden jii bas tartyp jatyr – sarapshy pikiri

Qazaqstanda azyq-túlik óndirisi 12%-ǵa artty