رەداكتسييادان: بٷگٸن «AMANAT» پارتيياسى فراكتسيياسىنىڭ مٷشەسٸ نارتاي سەرسەنعاليەۆ تالعاردا ورىن العان جاعدايعا بايلانىستى باس پروكۋرور بەرٸك اسىلوۆقا, ٸشكٸ ٸستەر مينيسترٸ ەرجان سەدەنوۆكە, وقۋ-اعارتۋ مينيسترٸ عاني بەيسەمباەۆقا قوعامدىق ورىنداردا جاسٶسپٸرٸمدەردٸڭ قىلمىسقا بارۋىنا قاتىستى دەپۋتاتتىق ساۋال جولدادى, – دەپ حابارلايدى Dalanews.kz.
الىستان وراعىتپاي تۋرا تارتسام جۇرتتىڭ جاعاسىن ۇستاتقان جاعداي الماتى وبلىسى تالعار اۋدانىندا بولدى. قوعامدى قامىقتىراتىنى سول, سوڭعى ۋاقىتتا قوعامدىق ورىندا جاس ٶسپٸرٸمدەردٸڭ بٸر-بٸرٸن اياۋسىز سوققىعا جىعۋى, قورلاۋى, ەڭ سوراقىسى ارتى ٶلٸمگە اپاراتىن قايعىلى جايتتار جيٸلەپ كەتتٸ. تەلەارنانى قوسىپ قالعاندا, گازەت بەتٸن اشىپ قالعاندا, راديونى باسىپ قالعاندا جاستار بٸرٸ-بٸرٸن ۇردى, سوقتى دەگەن اقپاراتتان كٶز اشپايتىن بولدىق.
«بٸزدٸڭ قوعام قايدا بارا جاتىر?», – دەگەن سۇراقتىڭ كٶپشٸلٸكتٸڭ كٶكەيٸندە كٶلكٸپ تۇرۋى زاڭدىلىق وسىندايدا.
كەشە عانا تالعارداعى دٷكەندە بولعان جاعداي ەسٸمٸزدٸ ەكەۋ, تٷسٸمٸزدٸ تٶرتەۋ قىلدى. تالعارداعى تەكسٸزدەردٸڭ تەنتەكتٸگٸنەن 16 جاسار بالا, بٸر ەۋلەتتٸڭ ايماڭداي ازاماتى شەرزات كٶز جۇمدى. ەكەسٸ مەن باۋىرى سوققىعا جىعىلدى. بالانىڭ اجالىنا نە سەبەپ دەگەن سۇراق تۋادى. سونداعىسى بٸر بٶتەلكە الكوگول.
قازاق: «اراقپەن دوستاستىم دەگەنشە, ادامگەرشٸلٸكپەن قوشتاستىم دە» دەيدٸ. ٸشكٸشتٸڭ ٶزٸ ادامگەرشٸلٸگٸمەن قوشتاسىپ قانا قويماي, كٸنەسٸز كٸسٸلەردٸڭ ٶمٸرٸمەن قوشتاسۋىنا سەبەپ بولعانى قاتتى قاپالاندىرادى.
وسىندايدا بٸزدٸڭ قوعام قاۋٸپسٸز بە ٶزٸ, زاڭ كٸمنٸڭ جاعىندا دەگەن سۇراق تۋادى. سەبەبٸ, شەرزاتتىڭ ەكەسٸ تەرگەۋدٸڭ تۇرالاپ تۇرعانىن, اۋدانداعى قۇزىرلى ورىن ٶكٸلدەرٸنٸڭ ٸستٸ سوزباققا سالىپ جاتقانىن, قىلمىسكەردٸ قويىپ بالاسىنان ايرىلعان وتباسىن تٷندە تەرگەۋگە شاقىرىپ الىپ ٶكتەم سٶيلەگەنٸن ايتىپ بەينەٷندەۋ جاسادى.
ەل ٶرە تٷرەگەلدٸ, ارتىنشا «ٸستٸ ٸٸم-ٸ ٶز باقىلاۋىنا الدى» دەگەن اقپارات تارادى. قوعامدى قورقىتاتىنى وسى, قىلمىسكەردٸ جازالاۋ ٷشٸن, ەدٸلدٸككە جەتۋ ٷشٸن بەينەٷندەۋ جاساپ ەر ٸستٸ بٸر مينيستردٸڭ باقىلاۋعا العانىن كٷتٸپ وتىرۋ كەرەك پە? نەگە جەرگٸلٸكتٸ جەردەگٸ قۇقىق قورعاۋ ورىندارى دەرەۋ ٸستٸڭ اق-قاراسىن انىقتاپ ەدٸل تەرگەۋ ٶتكٸزبەيدٸ?
مۇنداي قىلمىستا قۇقىق قورعاۋ ورگاندارى بٸردەن ەرەكەت ەتۋٸ كەرەك. ەيتپەسە, جاپا شەككەن وتباسىنىڭ مٷشەلەرٸ اشۋعا بوي الدىرىپ, قىلمىسكەردٸ جازالاۋعا ٶزدەرٸ بەكٸنۋٸ مٷمكٸن.
سوندىقتان مۇنداي جاعدايدا بٸز تەك قانا زاڭ ٷستەمدٸگٸنە يەك ارتۋىمىز تيٸس. پرەزيدەنتتٸڭ «بٸزدٸڭ ەلٸمٸزگە زاڭ ٷستەمدٸگٸ جەنە ازاماتتىق تەرتٸپ اسا قاجەت» دەگەنٸن دە ەسكەرتەيٸن.
سونداي-اق, ەربٸرٸمٸز زاڭنىڭ ورىندالۋىن تالاپ ەتەمٸز دەپ, ٶزٸمٸز زاڭ بۇزباۋىمىز قاجەت. ەشقاندايدا ەموتسيياعا بەرٸلمەي, ەربٸر ٸسكە زاڭ اياسىندا سالقىنقاندىلىقپەن قاراۋ مٸندەتٸمٸز.
وعان قوسا مەملەكەتتٸك دەڭگەيدە پوليتسييا مەن قۇقىق قورعاۋ ورگاندارىنا دەگەن سەنٸمدٸلٸكتٸ ارتتىراتىن جۇمىستاردى ٸسكە اسىرۋ ماڭىزدى دەپ بٸلەمٸن.
قاپەرلەرٸڭٸزگە تاعى بٸر جايتتى سالايىن, وسى جىلدىڭ قىركٷيەگٸندە اقتٶبە وبلىسىندا 14 جاسار سىدىق نۇرجاندى جوعارعى سىنىپتا وقيتىن ون شاقتى وقۋشى جابىلىپ ساباعان, سالدارىنان بالا كٶز جۇمدى. ول كەزدە دە مارقۇمنىڭ ەپكەسٸ ەلەۋمەتتٸك جەلٸگە شىعىپ ەدٸلدٸك ٸزدەپ قۇزىرلى ورگاندارعا جٷگٸندٸ. قىلمىسكەرلەر جازاسىز قالمايتىنىنا سەنسە جۇرت بۇلاي شارق ۇرماس ەدٸ.
سول الماتى وبلىسىنىڭ تالعار اۋدانىندا قىركٷيەك ايىنىڭ سوڭىندا بٸر تەربيەسٸز بۇزاقىنىڭ كٸشكەنتاي بالانى اياۋسىز ساباعانى تٷسٸرٸلگەن بەينەجازبا تاراعان ەدٸ. ول كەزدە الماتى وبلىسىنىڭ پوليتسەيلەرٸ ٸستٸ باقىلاۋعا الدىق دەدٸ. الايدا ارادا اپتا ٶتكەندە سول تالعاردا 16 جاسار باۋىرىمىزدى بٸر توپ قىلمىسكەر ٶلتٸرٸپ كەتتٸ.
جاسٶسپٸرٸمدەر جاپا شەككەن جاعدايلاردى تٸزسەم تاڭدى تاڭعا ۇرۋعا تۋرا كەلەدٸ: قىركٷيەكتە پاۆلودار وبلىسىنىڭ كەنجەكٶل اۋىلىندا بٸر توپ بۇزاقى بٸر جاسٶسپٸرٸمدٸ اياۋسىز ساباپ تاستادى. اقتاۋدا جاسٶپٸرٸمدەردٸڭ جاپپاي تٶبەلەسٸ تٷسٸرٸلگەن ۆيدەو تارادى وسى اپتادا, ول جەردە توپ-توپقا بٶلٸنگەن بالالار بٸر-بٸرٸن اياۋسىز ساباپ جاتىر. ارتىنشا سول اقتاۋدا بٸرنەشە قىزدىڭ بٸر قىزدى ۇرىپ قورلاپ جاتقانى تٷسٸرٸلگەن بەينەجازبا جەلٸنٸ كەزٸپ كەتتٸ. بۇل تەك سوڭعى ايداعى جايتتار.
قورىتىندىلاي كەلە مەنٸڭ ۇسىنىستارىم:
- الماتى وبلىسى تالعار اۋدانىندا 16 جاسار ازاماتتى ٶلتٸرگەن, جاقىندارىن اياۋسىز ساباعان قىلمىسكەرلەر قاماۋعا الىنىپ, ولارعا زاڭعا سەيكەس ەدٸل جازا بەرٸلۋٸ تيٸس.
- اتالعان ٸس بويىنشا بارلىق قۇقىق قورعاۋ ورگاندارىنىڭ قاتىسۋىمەن, ونىڭ زاڭدى قۇقىقتىق باعاسى تەزارادا بەرٸلۋٸ تيٸس.
- بٸلٸم بەرۋ ۇيىمدارىندا «قۇقىق نەگٸزدەرٸ» اتتى پەن بار. بٸراق ونىڭ ساپاسىنا قاتىستى سىن كٶپ. اتالعان پەننٸڭ باعدارلاماسىن قايتا جاساپ, بالالار ٶمٸردە بەتپە-بەت كەلەتٸن جايتتار مەن ٶمٸردەن الىنعان ناقتى كەيستەرگە سٷيەنٸپ وقىتۋ كەرەك.
- مەملەكەت باسشىسى ۇسىنعان زاڭ مەن تەرتٸپ قاعيداتىنا سٷيەنە وتىرىپ, ەلدەگٸ قۇقىق قورعاۋ جٷيەسٸنە, پوليتسيياعا دەگەن حالىق سەنٸمٸن كٷشەيتۋ, قوعام كٶزقاراسىن ٶزگەرتۋ بويىنشا جالپىمەملەكەتتٸك دەڭگەيدە كەشەندٸ شارالار قابىلداۋ قاجەت. ادال قىزمەت بولماسا, سەنٸم بولمايدى, ال سەنٸم بولماسا تٷبٸندە ەل بولمايمىز. وسىنى ۇمىتپايىق!
