جاڭا كوپىر ەلدى مەكەن تۇرعىندارىنىڭ ءقاۋىپسىز قوزعالىسىن قامتاماسىز ەتەدى. تۇرعىنداردى قۇتتىقتاۋعا الماتى وبلىسىنىڭ اكىمى اماندىق باتالوۆ كەلىپ، جەتىسۋ زيالىلارىمەن جانە ساياجايلاردىڭ تۇرعىندارىمەن بىرگە قوس وتكەلدىڭ سالتاناتتى تۇردە لەنتاسىن قيدى.
– قۇرمەتتى جەرلەستەر، قىمباتتى تالدىقورعاندىقتار! سىزدەردى قالا ءۇشىن ماڭىزدى ءارى قاجەتتى جوبانىڭ اياقتالۋىمەن – تۇرعىنداردىڭ دا، اۆتوموبيلشىلەردىڭ دە ءقاۋىپسىز قوزعالىسىن قامتاماسىز ەتۋ ءۇشىن سالىنعان ەكى جاڭا اۆتوموبيل كوپىرىنىڭ پايدالانۋعا ەنگىزىلۋىمەن قۇتتىقتايمىن!
بۇل ساياجاي الاپتارىنىڭ ينفراقۇرىلىمىن دامىتۋعا جانە سونىڭ سالدارىنان حالىقتىڭ ءومىر ءسۇرۋ دەڭگەيىن ارتتىرۋعا باعىتتالعان اۋقىمدى جۇمىستىڭ ءبىر بولىگى.
تالدىقورعانداعى ءومىر جىل سايىن جاقسارىپ كەلە جاتقانىن اتاپ وتكىم كەلەدى. ەگەر 2001 جىلى وبلىس بيۋدجەتى 27 ميلليارد تەڭگەنى قۇراسا، قازىرگى ۋاقىتتا بۇل سوما 760 ميلليارد تەڭگەگە دەيىن ءوستى. بۇل ساندار بويىنشا جەتىسۋدا قانداي اۋقىمدى جۇمىستار جۇرگىزىلىپ جاتقانىن انىقتاۋعا بولادى، – دەدى ايماق باسشىسى اماندىق باتالوۆ.
ساياجاي تۇرعىندارىنىڭ قۋانىشتارى جۇزدەرىنەن بايقالىپ تۇردى. ويتكەنى، ولار جاڭا كوپىرلەردى ۇزاق كۇتتى. «شايقورعان» جانە «قىزىل تاس» تۇرعىندارى ءبىر جاعالاۋدان ەكىنشى قاراتال جاعالاۋىنا ءوتۋ ءۇشىن دەنساۋلىقتارىنا، ءتىپتى ومىرلەرىنە ءقاۋىپ توندىرۋگە تۋرا كەلگەنىن ەسكە الادى. وسىعان بايلانىستى، وتكەن جىلدىڭ سوڭىندا ولار وبلىس اكىمىنە جاڭا اۆتوموبيل كوپىرىن سالۋدى سۇراعان ەدى.
– اماندىق عابباس ۇلى، ءسىز ءوز ۋادەڭىزدى ورىندادىڭىز. ءقازىر بىزدە مىقتى، كەڭ جانە ءقاۋىپسىز كوپىر بار. ءبىزدىڭ تالدىقورعاننىڭ بارعان سايىن جايلى بولىپ كەلە جاتقانىن اتاپ وتكىم كەلەدى. ءسىز تەك قالا ورتالىعىن اباتتاندىرۋعا عانا ەمەس، سونىمەن قاتار شەتكەرى ايماقتارعا دا نازار اۋدارعانىڭىز قاتتى قۋانتادى، – دەدى «شايقورعان» ساياجاي ءماسسيۆىنىڭ تۇرعىنى ءاليا بەتەبايەۆا.
«شايقورعان» ساياجايىنداعى ادامدار جاياۋ ءجۇرىپ وتكەن ەسكى كوپىردى الىپ تاستامايدى. اماندىق باتالوۆتىڭ باستاماسى بويىنشا ول بەزەندىرىلىپ، ەستەلىك رەتىندە قالدىرىلادى. ەسكى قۇرىلىستىڭ ەرەكشە ءتۇرى رەترو-رەكونسترۋكسيا بولادى، ونىڭ اياسىندا تالدىقورعاندىقتار مەن جەتىسۋ ءوڭىرىنىڭ قوناقتارى سۋرەتكە تۇسە الادى
ايتا كەتۋ كەرەك، 2 جوبانىڭ قۇرىلىسىنا جەرگىلىكتى بيۋدجەتتەن 595 ميلليون تەڭگە بولىنگەن. كوپىرلەردىڭ ۇزىندىعى – 69 م، جولدىڭ ەنى – 7 مەتر. جاياۋ جۇرىسپەن جايلى جۇرۋگە ارنالعان جەكە تروتۋار بار. كارانتينگە قاراماستان، قۇرىلىس جۇمىستارى توقتاعان جوق جانە كوپىر ءدال ۋاقىتىندا پايدالانۋعا بەرىلدى.
تالدىقورعان قالاسىنىڭ ماڭىندا بارلىعى 12 ساياجاي بار. جەرگىلىكتى بيۋدجەت قاراجاتى ەسەبىنەن جولداردى جوندەۋ، ساپالى اۋىز سۋمەن قامتاماسىز ەتۋ، ەلەكترمەن، سۋمەن جانە گازبەن جابدىقتاۋ جەلىلەرىن توسەۋ، جولداردى جوندەۋ جۇمىستارى جۇرگىزىلۋدە.
2014 جىلدان باستاپ جالپى سوماسى 553 ملن تەڭگەدەن استام ەلەكترمەن جابدىقتاۋ جەلىلەرىنىڭ شامامەن 107 شاقىرىم رەكونسترۋكسيالاۋ جۇرگىزىلدى. اۋماقتى قار مەن جاڭبىردان قورعاۋ ماقساتىندا 1،9 كم ماگيسترالدى كانالعا كۇردەلى جوندەۋ جۇرگىزىلىپ، 13 كوپىر جاڭارتىلدى.
