تالدىقورعاندا ەر ادامداردان اقشا بوپسالاۋمەن اينالىسقان قىلمىستىق توپ انىقتالدى. توپ قۇرامىندا قىزدار مەن ولاردىڭ سىبايلاستارى بولىپ، ولار الدىن الا ويلاستىرىلعان سىزبالار بويىنشا ارەكەت ەتكەن، دەپ حابارلايدى Dalanews.kz.
تەرگەۋ مالىمەتىنشە، 2024 جىلعى مامىردا بىرنەشە قىز جالعان ايىپ تاعۋ جانە ابىرويىن تۇسىرەتىن مالىمەتتەردى تاراتامىز دەپ قورقىتۋ ارقىلى قىلمىستىق جولمەن اقشا تابۋدى كوزدەگەن.
"قۇرباندارىن ىزدەۋ ءۇشىن ولار الەۋمەتتىك جەلىنى پايدالانىپ، ەر ادامدارمەن تانىسىپ، اڭگىمەلەسۋدى ينتيم جاقىندىققا جەتكىزگەن. سودان كەيىن ىسكە ەكىنشى قاتىسۋشى ارالاسقان، ول جابىرلەنۋشىگە "قۇربىسى جىلاپ وتىر" دەگەن سىلتاۋمەن قوڭىراۋ شالىپ، كەلۋىن سۇراعان. كەزدەسۋدە زورلىق تۋرالى پوليسياعا ارىزدانامىز دەپ ەر ادامدى قورقىتىپ، ودان اقشا تالاپ ەتكەن. العاشقى جابىرلەنۋشى كۇدىكتىلەرگە 350 مىڭ تەڭگە بەرگەن"، - دەدى ءىىم وكىلدەرى.
كۇدىكتىلەر ەكىنشى جابىرلەنۋشىدەن ءدال وسىنداي سىزبا بويىنشا "جۇكتىلىككە" بايلانىستى 2 ميلليون تەڭگە تالاپ ەتىپ، 900 مىڭ تەڭگەدەن اسا اقشا العان.
"كەيىن بۇل ىسكە ەر ادام قوسىلىپ، كەلەسى جابىرلەنۋشىدەن 2 ميلليون تەڭگە بوپسالاۋعا كومەكتەسكەن، ءبىراق ولار 800 مىڭ تەڭگە العان. تاعى ءبىر جابىرلەنۋشىدەن 795 مىڭ تەڭگە العان"، - دەيدى ءىىم وكىلى.
ەڭ سوراقى الاياقتىقتاردىڭ ءبىرى كامەلەتكە تولماعان ادامدى زورلاۋعا وقتالۋ وقيعاسى بولعان.
"بۇل ەپيزودقا ءتورت كۇدىكتى قاتىسقان: ءبىر قىز جىنىستىق قاتىناسقا ءتۇسۋى كەرەك بولعان، ال ۇشەۋى وزدەرىن تۋىستارىمىز دەپ تانىستىرىپ، اقشا بوپسالاعان. وسىلايشا ولار 800 مىڭ تەڭگە يەمدەنگەن. وسىنداي سحەمالار قىلمىسكەرلەرگە بىرنەشە مارتە اقشا اكەلگەن: 600 مىڭ، 1،5 ميلليون، 1 ميلليون تەڭگە"، - دەپ جازىلعان حابارلامادا.
ءبىر جاعدايدا كۇدىكتىلەر وزدەرىن پوليسيا قىزمەتكەرلەرىمىز دەپ تانىستىرىپ، كۇش قولدانىپ، 500 مىڭ تەڭگە تارتىپ العان.
"جالپى سانى 9 كۇدىكتى 11 ادامنان اقشا بوپسالاعانى انىقتالدى. ولاردىڭ بارلىعى ۇستالىپ، قاماۋعا الىندى"، - دەپ جازىلعان حابارلامادا.
