ول – 2018 جىلى لوگيستيكالىق شىعىندى ازايتۋ جانە تاۋاردى ۋاقتىلى جەتكىزۋ ماقساتىندا تەمىر جول ورىنى جانە بىرنەشە لوكوماتيۆى بار «تەمىر سەرىك» ج ش س ساتىپ الىنعان. جشس-نىڭ 100 پايىز اكسياسىن 440 ميلليون تەڭگەگە ساتىپ الىنعان سوڭ ءبىر جىلدان سوڭ اكسيونەرلەرمەن كەلىسپەستەن زاۋىتتىڭ بۇرىنعى ديرەكتورى ونى 60 ميلليون تەڭگەگە قايتادان ساتىپ جىبەرگەن.
«قاينار-اكب» ج ش س باس ديرەكتورىنىڭ ورىنباسارى، ەكونوميكالىق قاۋىپسىزدىك قىزمەتى باسشىسى شارحانبەك ىڭكاربەكوۆ زاۋىتتىڭ بۇرىنعى باسشىلارى تاراپىنان كاسىپورىنعا "شابۋىل" جاسالىپ وتىرعانىن ايتادى. سونىڭ سالدارىنان ءوندىرىس ونىمدىلىگى تومەندەپ بارا جاتقانىن دا جەتكىزدى.
«سوتتىڭ زاڭسىز شەشىمى سالدارىنان كاسىپورىن ۇلكەن شىعىنعا ۇشىراعالى تۇر. سەبەبى، قالامىزداعى دايىن تاۋارىمىزدى تاسىمالداپ كەلە جاتقان تەمىر جولعا قاتىستى مەكەمەمىز ادىلەتسىز سوت شەشىمى سالدارىنان جەكەنىڭ قولىنا وتپەكشى. مۇنداي جاعدايدا زاۋىت ۇلكەن شىعىنعا باتادى. مۇنىڭ اقىرى جۇمىسشىلاردىڭ جالاقىسىنىڭ ازايۋىنا اكەلۋى مۇمكىن»، — دەيدى شارحانبەك ىڭكاربەكوۆ.
ونىڭ سوزىنشە تەمىر جول تورابى زاۋىتتا وندىرىلگەن اككۋمۋلياتورلاردىڭ وزىندىك شىعىنىن ازايتىپ، تەز جەتكىزۋ نىسانى بولعان. ەگەر ول باسقا ادامنىڭ قولىنا ءوتىپ كەتكەن بولسا، وندا ەرتەڭگى كۇنى بىزدەن الۋشىلارعا تاۋارىمىز بەلگىلى ءبىر پايىزدا قىمباتتاپ بارادى. ال بىزدەن الاتىن دۇكەندەر باسقا مەملەكەتتىك ارزان تاۋارىن تاڭداپ كەتۋى مۇمكىن. تاعى ءبىر سەبەپ - جەكە تۇلعانىڭ قولىندا بولعان سوڭ تەمىر جول تورابىنىڭ كۇتىمى دە ساي بولمايدى.
بۇرىنعى يەسىندە بولعان كەزدە جول اپاتى جىلىنا ءتورت رەت بولعان بولسا، زاۋىت قاراماعىنا وتكەن سوڭ بىردە ءبىر اپات بولماعان.
ويتكەنى زاۋىتتىڭ مۇنداي ۇلكەن نىساندى قارجىلاندىرىپ، قاۋىپسىزدىك ەرەجەسىن ساقتاۋعا مۇمكىندىگى بار. ال جەكەلەگەن ادامداردا بولسا، وندا ستراتەگيالىق تۇرعىدا تالدىقورعان قالاسىنا ءتيىمسىز. بارلىق قاجەتتى زاتتار سول تەمىر جولمەن كەلەدى.
قالانىڭ ەڭ ءىرى جىلىتۋ قازاندىعى «باسقۋاتقا» كومىر كەلسە، ەڭ اياعىندا كوممەرسيالىق ازىق-تۇلىككە دەيىن ۋاقىتىلى كەلمەي قالۋ ءقاۋىپى بار.
وسىدان كەيىن كاسىپورىننىڭ قازىرگى باسشىلارى اتالعان ماسەلەگە بايلانىستى قۇزىرلى ورگاندارعا شاعىمدانىپ، قىلمىستىق ءىس قوزعالعانىن ايتادى. قازىرگى ۋاقىتتا سوت پروسەسى ءجۇرىپ جاتىر.
