بۇگىن جەتىسۋ وبلىسىنىڭ ورتالىعى تالدىقورعان قالاسىندا 60 پاتەرلى تۇرعىن ءۇي كەزەكتە تۇرعان الەۋمەتتىك وسال توپتارعا بەرىلدى. پاتەر كىلتتەرىن جاڭا قونىس يەلەرىنە وبلىس اكىمى بەيبىت يسابايەۆ تاپسىردى، – دەپ حابارلايدى Dalanews.kz
قالالىقتاردى جاڭا پاتەرنە يە بولۋىمەن قۇتتىقتاعان وبلىس اكىمى تۇرعىن ۇيمەن قامتاماسىز ەتۋ حالىقتىڭ ءومىر ءسۇرۋ ساپاسىن كوتەرۋگە تىكەلەي اسەر ەتەتىن يگىلىكتى ءىس ەكەنىن، بۇل پرەزيدەنتتىڭ قويىپ وتىرعان باستى تالاپتارىنىڭ ءبىرى ەكەنىن اتاپ ءوتتى.
- ءبىز مەملەكەتتىك باعدارلامالاردىڭ جانە دەمەۋشىلەردىڭ قولداۋىمەن ءبىز ءقازىر تۇرعىن ۇيمەن قامتۋ ماسەلەسىنە ەرەكشە نازار اۋدارىپ وتىرمىز. وزدەرىڭىز بىلەسىزدەر، سوڭعى جىلدارى قالادا تۇرعىن ءۇي بەرۋ قارقىندى جۇرگىزىلىپ جاتىر. سونىڭ ارقاسىندا وتكەن جىلدىڭ قورىتىندىسى بويىشا تالدىقورعاندا تۇرعىن ءۇي كەزەگىندەگىلەر سانى 8،3% ازايدى. بۇگىنگى 60 پاتەرلى ءۇيدى قوسا العاندا، جىل باسىنان بەرى 368 وتباسى باسپاناعا قول جەتكىزدى. ال جىل سوڭىنا دەيىن قالادا 1520-دان استام وتباسى ءۇيلى بولادى، - دەگەن ب. يسابايەۆ بۇدان ءارى سالتاناتتى تۇردە كىلت تاپسىرۋ ءراسىمىن اتقاردى.
بۇگىنگى بەرىلىپ وتىرعان 60 پاتەرلىك ءۇيدى «سامۇرىق قازىنا» اق قارجىسىنا سالىنعان. بۇل 5 قاباتتى ۇيدە 1 جانە 2 بولمەلى ءارقايسىسى 15 پاتەردەن، 3 بولمەلى 30 پاتەر بار.
جاڭا قونىسقا يە بولعانداردىڭ ءبىرى كوپ بالالى انا ەلميرا كوبەگەنوۆا دا بار.
- كوپ بالالى وتباسى رەتىندە ون جىلدام استام ۋاقىت كەزەكتە تۇردىق. ءتورت بالام بار، ەكەۋى مەكتەپتە وقيدى. ءوزىم اسپاز بولىپ جۇمىس ىستەيمىن. بۇگىن، مىنە، 2 بولمەلى پاتەرگە يە بولىپ وتىرمىز. اۋلەتىمىزدىڭ قۋانىشىندا شەك جوق. وسىنداي قۋانىش ءار وتباسىنا جۇعىستى بولسىن، - دەدى كوپ بالالى انا.
وسى كۇنى تالدىقورعاندىق ازامات، ءىى توپتاعى مۇگەدەك جان قانات قاناتقان دا ءۇيلى بولدى.
- وتباسىندا ەكى قىز، ءبىر ۇلىمىز بار. بۇگىن جالعىز ۇلىمىز قانات جاڭا پاتەرگە قول جەتكىزدى. ءوزى 2010 جىلى كەزەككە تىركەلگەن ەدى. بۇعان دەيىن وتەناي اۋىلىندا تۇردىق. ەندى ءبارىمىز بىرگە وسى ۇيدە تۇراتىن بولامىز. قانات ءالى ۇيلەنگەن جوق، ەندى ءۇيلى بولعاننان كەيىن باس قۇراپ، وتاۋ كوتەرسە دەگەن تىلەگىمىز بار، - دەيدى قاناتتىڭ اناسى ساۋلە بايجۇمانوۆا.
جالپى وبلىس قۇرىلعاننان بەرى وڭىردە بارلىق قارجىلاندىرۋ كوزدەرى ەسەبىنەن شامامەن 1 ملن. شارشى مەتر تۇرعىن ءۇي پايدالانۋعا بەرىلىپ، قابىلدانعان شارالاردىڭ ارقاسىندا كەزەكتە تۇرعان 5735 ازامات ءۇيلى بولدى، ال بيىل بارلىق باعىتتار بويىنشا تاعى 2026 ادامدى تۇرعىن ۇيمەن قامتاماسىز ەتۋ جوسپارلانىپ وتىر.
