Búgin Jetisý oblysynyń ortalyǵy Taldyqorǵan qalasynda 60 páterli turǵyn úi kezekte turǵan áleýmettik osal toptarǵa berildi. Páter kiltterin jańa qonys ielerine oblys ákimi Beibit Isabaev tapsyrdy, – dep habarlaidy Dalanews.kz
Qalalyqtardy jańa páterne ie bolýymen quttyqtaǵan oblys ákimi turǵyn úimen qamtamasyz etý halyqtyń ómir súrý sapasyn kóterýge tikelei áser etetin igilikti is ekenin, bul Prezidenttiń qoiyp otyrǵan basty talaptarynyń biri ekenin atap ótti.
- Biz memlekettik baǵdarlamalardyń jáne demeýshilerdiń qoldaýymen biz qazir turǵyn úimen qamtý máselesine erekshe nazar aýdaryp otyrmyz. Ózderińiz bilesizder, sońǵy jyldary qalada turǵyn úi berý qarqyndy júrgizilip jatyr. Sonyń arqasynda ótken jyldyń qorytyndysy boiysha Taldyqorǵanda turǵyn úi kezegindegiler sany 8,3% azaidy. Búgingi 60 páterli úidi qosa alǵanda, jyl basynan beri 368 otbasy baspanaǵa qol jetkizdi. Al jyl sońyna deiin qalada 1520-dan astam otbasy úili bolady, - degen B. Isabaev budan ári saltanatty túrde kilt tapsyrý rásimin atqardy.
Búgingi berilip otyrǵan 60 páterlik úidi «Samuryq Qazyna» AQ qarjysyna salynǵan. Bul 5 qabatty úide 1 jáne 2 bólmeli árqaisysy 15 páterden, 3 bólmeli 30 páter bar.
Jańa qonysqa ie bolǵandardyń biri kóp balaly ana Elmira Kóbegenova da bar.
- Kóp balaly otbasy retinde on jyldam astam ýaqyt kezekte turdyq. Tórt balam bar, ekeýi mektepte oqidy. Ózim aspaz bolyp jumys isteimin. Búgin, mine, 2 bólmeli páterge ie bolyp otyrmyz. Áýletimizdiń qýanyshynda shek joq. Osyndai qýanysh ár otbasyna juǵysty bolsyn, - dedi kóp balaly ana.
Osy kúni taldyqorǵandyq azamat, II toptaǵy múgedek jan Qanat Qanatqan da úili boldy.
- Otbasynda eki qyz, bir ulymyz bar. Búgin jalǵyz ulymyz Qanat jańa páterge qol jetkizdi. Ózi 2010 jyly kezekke tirkelgen edi. Buǵan deiin Ótenai aýylynda turdyq. Endi bárimiz birge osy úide turatyn bolamyz. Qanat áli úilengen joq, endi úili bolǵannan keiin bas qurap, otaý kóterse degen tilegimiz bar, - deidi Qanattyń anasy Sáýle Baijumanova.
Jalpy oblys qurylǵannan beri óńirde barlyq qarjylandyrý kózderi esebinen shamamen 1 mln. sharshy metr turǵyn úi paidalanýǵa berilip, qabyldanǵan sharalardyń arqasynda kezekte turǵan 5735 azamat úili boldy, al biyl barlyq baǵyttar boiynsha taǵy 2026 adamdy turǵyn úimen qamtamasyz etý josparlanyp otyr.
