تالدىقورعاندا ساياباقتار مەن سكۆەرلەردى كۇتىپ-ۇستاۋعا قاتىستى بىرنەشە ءىرى مەملەكەتتىك ساتىپ الۋ كونكۋرسى توقتاتىلدى. بۇعان كترۋ-دىڭ دۇرىس تاڭدالماۋى سەبەپ بولعان. جالپى سانى ونعا جۋىق كونكۋرس كۇشىن جويدى، ال ولاردىڭ جالپى سوماسى 1،2 ميلليارد تەڭگەدەن اسادى، دەپ حابارلايدى Dalanews.kz.
مەملەكەتتىك ساتىپ الۋدا كترۋ (تاۋارلار، جۇمىستار مەن قىزمەتتەردىڭ ءبىرىڭعاي نومەنكلاتۋراسى) قولدانىلادى. بۇل جۇيە ارقىلى ءاربىر ساتىپ الۋ نىسانى ناقتى كودپەن بەلگىلەنىپ، سوعان سايكەس قانداي ۇيىمداردىڭ قاتىسا الاتىنى، قانداي ءتارتىپ قولدانىلاتىنى جانە قانداي تالاپتار قويىلاتىنى انىقتالادى.
الايدا Goszakup turaly تەلەگرام ارناسىنىڭ مالىمەتكە سۇيەنسەك، تالدىقورعاندا اۋماقتى اباتتاندىرۋ، ساياباقتار مەن سكۆەرلەردى كۇتىپ-ۇستاۋ جۇمىستارى كترۋ بويىنشا دۇرىس كورسەتىلمەي، عيماراتتار مەن قۇرىلىستاردى جانە ولارعا ىرگەلەس اۋماقتاردى كۇتىپ-ۇستاۋ قىزمەتى رەتىندە جاريالانعان. ال بۇل سانات ناقتى ءبىر عيماراتقا قاتىستى قولدانىلۋى ءتيىس. كونكۋرستاردا ونداي عيماراتتار كورسەتىلمەگەن.
ماسەلەنىڭ ەڭ ماڭىزدى تۇسى، كترۋ دۇرىس تاڭدالعان جاعدايدا، بۇل ساتىپ الۋلار مۇگەدەكتىگى بار ادامداردىڭ ۇيىمدارى اراسىندا وتكىزىلۋى كەرەك بولاتىن. قاتە كترۋ قولدانۋ ارقىلى زاڭمەن قورعالاتىن جەتكىزۋشىلەر توبى كونكۋرسقا قاتىسۋ مۇمكىندىگىنەن ايىرىلعان. بۇل شەكتەۋ كونكۋرس جاريالانعان ساتتەن باستاپ-اق ورىن العان.
ساراپشىلاردىڭ ايتۋىنشا، مۇنداي قاتەلىكتى بىرنەشە مينۋتتىڭ ىشىندە تۇزەتۋگە بولادى، الايدا قولدانىستاعى جۇيەدە ساتىپ الۋ قايتا جاريالانعان كۇننىڭ وزىندە تاپسىرىس بەرۋشى جاۋاپكەرشىلىككە تارتىلمايدى. بۇل جاعداي مەملەكەتتىك ساتىپ الۋ تۋرالى زاڭنامانىڭ جانە مۇگەدەكتىگى بار ادامداردىڭ قۇقىقتارىن قورعاۋعا باعىتتالعان نورمالاردىڭ ساقتالماۋىنا اكەلىپ وتىر.
ماماندار قازىرگى جاعداي مەملەكەتتىك ساتىپ الۋلار جۇيەسىنىڭ تيىمسىزدىگىن كورسەتەتىنىن العا تارتادى. ولاردىڭ پىكىرىنشە، بۇل سالادا كاسىبي مەملەكەتتىك ساتىپ الۋشىلار ينستيتۋتىن قالىپتاستىرۋ نەمەسە ساتىپ الۋ جۇيەسىن ورتالىقتاندىرۋ اسا قاجەت. سونىمەن قاتار بۇزۋشىلىق كەيىن تۇزەتىلسە دە، جاۋاپكەرشىلىك قاراستىرىلۋى ءتيىس دەگەن ۇسىنىستار ايتىلىپ جاتىر.
