“كوروناۆيرۋس دەنساۋلىق ساقتاۋ سالاسى ءۇشىن ۇلكەن سىناق بولدى. الەمدى جايلاعان ىندەتتىڭ بەتى ءالى قايتار ەمەس. كۇن سايىن مىڭداعان ازاماتىمىز دەرتكە شالدىعىپ، تالاي ادام ومىردەن وتۋدە. قازاقستان كوروناۆيرۋسقا قارسى ۆاكسينا جاساپ شىعارعان الەمدەگى ساناۋلى مەملەكەتتىڭ ءبىرى. ءقازىر QazVac باسقا ەلدەردە دە سۇرانسقا يە.
ۆاكسينا قورى جەتكىلىكتى. ازاماتتارىمىزدىڭ تاڭداۋ مۇمكىندىگى بار.
ەلىمىزدە جاپپاي ەكپە سالۋ ءجۇرىپ جاتقانىمەن، قوعامدا وعان قارسى ادامدار ءالى دە كوپ. ولار وزدەرى عانا باس تارتىپ قويماي، حالىقتى كەرى ۇگىتتەۋدە. سونىڭ كەسىرىنەن قانشاما جۇرتتى اداستىرۋدا. مۇنداي ادامدار ءوزىنىڭ عانا ەمەس، وزگەنىڭ ءومىرى ءۇشىن دە جاۋاپ بەرەتىنىن ءتۇسىنۋى ءتيىس.
سوندىقتان ەكپە الۋعا قارسى بولىپ جۇرگەندەردىڭ جەتەگىندە كەتپەگەن ءجون”، – دەيدى مەملەكەت باسشىسى.
ونىڭ ايتۋىنشا، ادامزات كوپتەگەن ىندەتتى، تەك ۆاكسينانىڭ كومەگىمەن جەڭگەن. ۆاكسينا پايدا بولعاننان كەيىن عانا ءقاۋىپتى دەرتتەرگە توسقاۋىل قويىلعانىن ۇمىتپاۋىمىز كەرەك.
“الداعى ۋاقىتتا كوروناۆيرۋستىڭ جاڭا شتاممدارى پايدا بولۋى مۇمكىن. بۇنى ساراپشىلار ايتۋدا. ءبىز ونىڭ قاشان بولاتىنىن كۇتىپ وتىرا المايمىز. وسىنداي جاعدايدا ودان ءارى دامۋعا بەيىمدەلۋىمىز كەرەك.
قازىرگى تاڭدا دۇنيەجۇزىلىك دەنساۋلىق ساقتاۋ ۇيىمىندا تىركەلگەن بۇكىل ۆاكسينالاردى تەزىرەك ساتىپ الۋىمىز كەرەك. دەنساۋلىق ساقتاۋ سالاسىن تۇراقتى ەكپە الۋعا دايىنداعان ءجون.
ەلىمىزدىڭ بيولوگيالىق قاۋىپسىزدىگىن بولجاۋمەن اينالىساتىن ۇلتتىق جۇيە قۇرۋىمىز كەرەك. بۇل شارا ءتيىستى زاڭ جوباسىندا قاراستىرىلعان. پارلامەنتتەن وسى زاڭ جوباسىن سەسسيانىڭ سوڭىنا دەيىن قابىلداۋدى سۇرايمىن”، – دەيدى پرەزيدەنت.
سونداي-اق مەملەكەت باسشىسى كوپتەگەن زەرتحانانىڭ حالىقارالىق ستاندارتقا ساي ەمەس ەكەنىن ايتتى.
“سول سەبەپتى “دەنى ساۋ ۇلت” جوباسى بويىنشا كەمىندە 12 زەرتحانانى تەحنولوگيالىق قۇرالدارمەن جاڭالاۋىمىز كەرەك. مەديسينا سالاسىنا قوماقتى قارجى قۇيىلۋى ءتيىس. فارماسيەۆتيكا ونەركاسىبىنە ەرەكشە كوڭىل ءبولۋ قاجەت.
كوروناۆيرۋس كەزىندە ءدال وسى سالا مەملەكەتىمىزدىڭ قاۋىپسىزدىگى ءۇشىن ماڭىزدى ەكەنىنە كوزىمىزدى جەتكىزدى. سوندىقتان مەديسينا ونىمدەرىن زەرتحانالىق جانە تەحنيكالىق سىناقتان وتكىزەتىن ورتالىق قۇرۋىمىز كەرەك. بىزدەگى دارى-دارمەك پەن مەديسينالىق ءونىمنىڭ 17 پايىزى عانا وتاندىق ءونىم. 2025 جىلى ونى 50 پايىزعا جەتكىزۋ قاجەت”، – دەيدى توقايەۆ.
