تاجىكستان ىشكى ىستەر مينيسترلىگى ەلدىڭ سولتۇستىگىندەگى زارنيسور قالاشىعىنداعى «تاجىك-قىتاي تاۋ-كەن كومپانياسىندا» جۇمىسشىلار بۇلىگى ارنايى جاساقپەن باسۋعا ءماجبۇر بولدى.

21 مامىردا تۇستەن كەيىن 60-قا جۋىق جۇڭگو جۇمىسشىسى تاس پەن تاياق الىپ، كومپانيانىڭ باس كەڭسەسىنە شابۋىلداعان. جۇڭگو ازاماتتارى جالاقىنىڭ كەشىگۋىنە نارازى بولعان دەپ حابارلاندى. دەگەنمەن جۇمىسشىلار ەلگە قايتارۋىن تالاپ ەتكەن دەگەن بولجام بار: ولار بىرنەشە ايدان بەرى كوروناۆيرۋس ەپيدەمياسىنا بايلانىستى تاجىكستاننان شىعا الماي وتىر.

كومپانيا وكىلدەرى مەن زارنيسور باسشىلىعى ماسەلەنى كەلىسسوزبەن شەشۋگە تىرىسقانىن، ءبىراق جۇمىسشىلار ونى تىڭداماعانىن حابارلادى.

اقپارات قۇرالدارى تاراتقان مالىمەتكە قاراعاندا، اشۋلى ميگرانتتار كومپانيا باسقارماسى عيماراتىنىڭ تەرەزەلەرىن شاعىپ، بىرنەشە اۆتوكولىكتى سىندىرعان.

وقيعا بولعان جەرگە تاجىكستان ىشكى ىستەر مينيسترلىگىنىڭ ارنايى جاساعى باردى. ينتەرنەتتە تاراعان ۆيدەولاردا اتىلعان قارۋ داۋىسى مەن جۇمىسشىلاردىڭ ايقايى ەستىلدى.

«بۇلىك شىعارعان جۇمىسشىلاردى تىنىشتالدىرۋ ءۇشىن ميليسيا قىزمەتكەرلەرى اۋەگە وق اتتى. ەشكىم جارالانعان جوق» دەدى سوعدى وبلىسى ميليسياسىنىڭ ءبىر قىزمەتكەرى ازاتتىق راديوسىنا.

حابارلارعا قاراعاندا، بۇلىك شىعارعاندار اراسىندا تاجىكستان ازاماتتارى جوق.

زارنيسور قالاشىعىندا جاعداي تىنىش، دەپ حابارلادى جەرگىلىكتى بيلىك. قۇقىققورعاۋ ورگاندارىنىڭ قىزمەتكەرلەرى ازىرگە كاسىپورىن اۋماعىنان شىقپاعان.