21 mamyrda tústen keiin 60-qa jýyq qytai jumysshysy tas pen taiaq alyp, kompaniianyń bas keńsesine shabýyldaǵan. Qytai azamattary jalaqynyń keshigýine narazy bolǵan dep habarlandy. Degenmen jumysshylar elge qaitarýyn talap etken degen boljam bar: olar birneshe aidan beri koronavirýs epidemiiasyna bailanysty Tájikstannan shyǵa almai otyr.
Kompaniia ókilderi men Zarnisor basshylyǵy máseleni kelissózben sheshýge tyrysqanyn, biraq jumysshylar ony tyńdamaǵanyn habarlady.
Aqparat quraldary taratqan málimetke qaraǵanda, ashýly migranttar kompaniia basqarmasy ǵimaratynyń terezelerin shaǵyp, birneshe avtokólikti syndyrǵan.
Oqiǵa bolǵan jerge Tájikstan ishki ister ministrliginiń arnaiy jasaǵy bardy. Internette taraǵan videolarda atylǵan qarý daýysy men jumysshylardyń aiqaiy estildi.
«Búlik shyǵarǵan jumysshylardy tynyshtaldyrý úshin militsiia qyzmetkerleri áýege oq atty. Eshkim jaralanǵan joq» dedi Soǵdy oblysy militsiiasynyń bir qyzmetkeri Azattyq radiosyna.
Habarlarǵa qaraǵanda, búlik shyǵarǵandar arasynda Tájikstan azamattary joq.
Zarnisor qalashyǵynda jaǵdai tynysh, dep habarlady jergilikti bilik. Quqyqqorǵaý organdarynyń qyzmetkerleri ázirge kásiporyn aýmaǵynan shyqpaǵan.
