بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى ءقازىر بۇكىل ەلىمىز بويىنشا ءىرى ينفراقۇرىلىمدىق جوبالار جۇزەگە اسىرىلىپ جاتقانىن ايتىپ، ولاردىڭ ءارقايسىسىنا توقتالىپ ءوتتى، دەپ حابارلايدى Dalanews.kz.
پرەزيدەنتتىڭ ايتۋىنشا:
- 2025-2026 جىلداردىڭ وزىندە قاشاعان كەنىشىندە گاز وڭدەۋ زاۋىتىن، سونىمەن بىرگە، "تالدىقورعان – ءۇشارال" ماگيسترالدى گاز قۇبىرى مەن "بەينەۋ–بوزوي-شىمكەنت» گاز قۇبىرىنىڭ ەكىنشى جەلىسىن ىسكە قوسۋ جوسپارلانعان.
- ۇكىمەت قىزىلوردا جانە تۇركىستان وبلىستارىندا بۋ-گاز قۇرىلعىسىنا نەگىزدەلگەن ەلەكتر ستانساسىن سالادى. الماتىداعى جەو-2 جانە جەو-3 جاڭعىرتىلاتىن بولادى.
- "كەندىرلى" دەمالىس ايماعىندا سۋ تۇششىتاتىن زاۋىت جۇمىس ىستەي باستايدى. كاسىپورىن جاڭاوزەن قالاسى تۇرعىندارىن اۋىز سۋمەن تۇراقتى قامتاماسىز ەتەدى.
- قاراعاندىدا جانە ەكىباستۇزدا بولات قورىتاتىن زاۋىتتار، جامبىل وبلىسىندا مينەرالدى تىڭايتقىش وندىرەتىن حيميا كەشەنى پايدالانۋعا بەرىلەدى.
- الماتى قالاسىندا جانە قوستاناي وبلىسىندا اۆتوكولىك زاۋىتتارى اشىلادى. "دوستىق-مويىنتى" تەمىر جول ۋچاسكەسىنىڭ جانە الماتى بەكەتىن اينالىپ وتەتىن تەمىر جول جەلىسىنىڭ قۇرىلىسى اياقتالادى. "قىزىلجار – مويىنتى" باعىتىندا جاڭا جوبا باستالادى.
- اقتاۋدا كاسپيي تەڭىزىنىڭ جاعالاۋىنداعى كونتەينەر حابى سالىنىپ بىتەدى. "قورعاس – شىعىس قاقپا" ەەا اۋماعىندا حالىقارالىق اۋەجاي جۇمىس ىستەي باستايدى. زايسان، كاتونقاراعاي مەن كەندىرلى دەمالىس ايماقتارىندا دا اۋەجاي اشىلادى.
- كاسپيي تەڭىزىنىڭ ۇلتانىمەن تالشىقتى-وپتيكالىق بايلانىس جەلىسى تارتىلادى، بۇل قادام ەۋروپا مەن ازيا اراسىندا سيفرلىق ءدالىز جاساۋعا مۇمكىندىك بەرەدى. ەلىمىزدىڭ اۆتوكولىك جولدارى جەلىسىن دامىتۋ جۇمىسىنىڭ ءمان-ماڭىزى وتە زور.
"وسى تۇستا تاعى ءبىر ماڭىزدى ينفراقۇرىلىمدىق جوبا قولعا الىناتىنى تۋرالى جاريالاعىم كەلەدى. مەن ۇكىمەتكە استانادان ارقالىق، تورعاي جانە ىرعىز ارقىلى ترانسكاسپيي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردىم. جاڭا كۇرە جول ورتالىق جانە باتىس ايماقتاردىڭ اراسىن 560 شاقىرىمعا قىسقارتادى. بۇل – تۇتاس تورعاي ءوڭىرىنىڭ دامۋىنا تىڭ سەرپىن بەرەتىن اۋقىمدى جوبا"، - دەدى قاسىم-جومارت توقايەۆ.
پرەزيدەنتتىڭ ايتۋىنشا، بۇدان بولەك ارقالىقتاعى اۋەجايدى قالپىنا كەلتىرىپ، جاڭا اەروۆوكزال سالعان ءجون.
"بۇل جوبا ىشكى كولىك قاتىناستارىن ەداۋىر جاقسارتادى. سونداي-اق ورتالىق ايماقتاعى اۋىل شارۋاشىلىعى جەرلەرىن يگەرۋگە جانە مال شارۋاشىلىعىن دامىتۋعا تىڭ سەرپىن بەرەدى. ەلىمىزدە ماشينا جاساۋ، مەتاللۋرگيا، مۇناي-حيميا، اگروونەركاسىپ جانە كولىك-لوگيستيكا سالالارىندا مۇنداي جوبالار از ەمەس"، - دەدى مەملەكەت باسشىسى.
