كاسىپكەر قانات اميركين ءىرى كوپميلليوندىق كەلىسىمشارتى بار جول-قۇرىلىس كومپانياسىنىڭ رەيدەرلىك جولمەن تارتىپ الىنۋ تاريحىن ايتىپ بەردى. ونىڭ ايتۋىنشا،بۇعان نىعماتۋليندەردىڭ قاتىسى بار، دەپ حابارلايدى Dalanews.kz.
«كوپشىلىگىڭىز نىعماتۋليندەر اۋلەتىن بىلەسىزدەر. وسى وتباسىنىڭ ۇلكەن ۇلى مەنىڭ ءىرى كوپميلليوندىق كەلىسىمشارتى بار جول-قۇرىلىس كومپانيامدى تارتىپ الدى. ول ماعان ولاردىڭ بانكى - Qazaq Banki-نەن نەسيە الۋعا ءماجبۇر ەتتى. كەيىن بانك بانكروتقا ۇشىراپ، مەنىڭ اقشامدى جانە كەپىلدە تۇرعان مۇلكىمدى، سونىڭ ىشىندە اۆتوسالونعا ارنالعان ۇلكەن الماتى اينالما اۆتوموبيل جولىنداعى جەر تەلىمىن دە بىرگە الا كەتتى. بۇعان قوسا، مەنى بانكتىك كەپىلدىكپەن بايلانىستى پروبلەما تۋىنداتتى»، – دەپ جازدى قانات اميركين Facebook-تەگى پاراقشاسىندا.
ونىڭ ايتۋىنشا، ول نەسيە راسىمدەگەن، ءبىراق بۇل وقيعا مۇنىمەن اياقتالماعان. ودان قولما-قول اقشا تالاپ ەتىلگەن. كاسىپكەر وتباسىنا ءقاۋىپ تونە باستاعاننان كەيىن قازاقستاننان كەتۋگە ءماجبۇر بولعان.
«ولار وزدەرى قاشقىن بولعان كەزدە، ول دۋبايدا مەنىمەن كەزدەسىپ، «جاۋلاسۋدى توقتاتۋدى» سۇرادى. كەزدەسۋ بارىسىندا مەن وعان تەك قولما-قول اقشا جانە كولىكتەر تۇرىندە شامامەن 7–8 ميلليون دوللار العانىن ەسكە سالدىم. ول: «مۇمكىن، تەك جارتىسى عانا ماعان جەتكەن شىعار، قالعانىن كومەكشىلەرىم العان شىعار»، – دەپ جاۋاپ بەردى. كەيىن سالىق ورگاندارى مەنىڭ ەلدەن كەتۋگە ءماجبۇر بولعانعا دەيىن جينالعان كومپانيانىڭ مۇلكى ءۇشىن قارىزداردى تالاپ ەتكەندە، مەن وعان قوڭىراۋ شالدىم. بۇل شەكتەن شىعۋ ەكەنىن ايتىپ، سالىقتاردى وزدەرى تولەۋىن ۇسىندىم، ويتكەنى ولار ءبارىن تارتىپ الدى. ول قىسقا عانا جاۋاپ قاتتى: «ماعان ءبارىبىر، مەن ەندى قازاقستان ازاماتى ەمەسپىن. ءوز پروبلەمالارىڭدى ءوزىڭ شەش» دەدى. مۇنداي دەڭگەيدەگى سينيزم مەن جاۋاپسىزدىققا قالاي جول بەرۋگە بولادى؟ وسىنداي ادامدار قالايشا بيلىككە كەلدى؟» – دەيدى كاسىپكەر.
كەيىن اميركين قازاقستانعا ورالعان. الايدا 25 جەلتوقساندا سوت ونى ت239 ميلليون سالىق جانە ت7 ميلليون باج سالىعىن تولەۋگە مىندەتتەپ قويعان.
ەسكە سالايىق،بۇعان دەيىن قاراعاندىلىق كاسىپكەر الەكسەي لۋكيانچەنكو ەرلان نىعماتۋلين رەيدەرلىك شابۋىل جاساپ جۇرگەنىن ايتقان بولاتىن. بۇل ىسكە نىعماتۋليندەردىڭ "تورپەداسى" ءسابيرا قويانبايەۆانىڭ دا قاتىسى بار بولىپ شىقتى.
"بارلىق جەردە ايتا باستادىم (شابۋىلدار تۋرالى)، جۋرناليستەرگە، قوعامعا ۇندەۋ جاسادىم، ءبىراز ۋاقىت وتكەننەن كەيىن جىگىتتەر كەلىپ، مەنىمەن بىرەۋ سويلەسكىسى كەلەتىنىن ايتتى. سوسىن ماعان ەرلان زايرۋللا ۇلى قوڭىراۋ شالىپ "سەن وسىنداي دا وسىندايسىڭ با؟" دەدى. مەن "ءيا" دەدىم. ەرلان نىعماتۋلين مەنىڭ جەكە نومىرىمە حابارلاسىپ، وزىنە شاقىردى. مەن ەندى عانا دامىپ كەلە جاتقان كاسىپكەر ەكەنىمدى جانە ول شاقىرعان جەرگە بارا المايتىنىمدى ايتىپ ەدىم، "جاقسى، ساعان كولىك جىبەرەمىن، كەل" دەدى. ماعان ءبىر جىگىت كەلدى، مەن ونى تانيتىنمىن، مەنى كەڭسەسىنە اپاردى. ول جەردە جارتى كۇن كۇتىپ، اقىرى كەزدەستىم. ول ماعان "سەنىڭ جاعدايىڭدى بىلەمىن، مەنىڭ تۇك قاتىسىم جوق، وعان ەش قاتىسىم جوق، وسىنى جوققا شىعارىپ، ۆيدەو ءتۇسىر"، - دەدى"، - دەيدى كاسىپكەر "قازتاگ" اگەنتتىگىنە.
كاسىپكەر سول ساتتە ەرلان ءنىعماتۋليننىڭ بۇل يدەياسىنان باس تارتۋدان قورىققانىن ايتادى.
"ياعني سولاي ايتىلدى، مەن بۇل يدەيادان باس تارتا المادىم. ءتىپتى ءبىزدىڭ قالادا بۇعان دەيىن ءبىر جىگىتتى قاماۋعا الىپ، ءقازىر قىلمىستىق ءىس قوزعالعان جاعداي بولعان. مەن دە ءوز ومىرىمە قورىقتىم، مۇنداي ادامدار ءبارىن ىستەيدى عوي، ولاردىڭ جان-جاقتا تانىسى كوپ. سوسىن ءوز ادامى كەلىپ، مەنى ۆيدەوعا ءتۇسىرىپ الدى. دەنيس دەگەن جىگىت، تەگى ەسىمدە جوق. بالقاشتاعى "اتامەكەندى" باسقارادى. ول ەرلان ءنىعماتۋليننىڭ ادامى ەكەن"، - دەيدى كاسىپكەر الەكسەي لۋكيانچەنكو.
كاسىپكەر ءقوناقۇيىن 2015 جىلى سالا باستاعان، سودان بەرى ينسپەكتەر ءسابيرا قويانبايەۆا نىساندى تەكسەرىپ جۇرگەن كورىنەدى. پروبلەمالار ءقوناقۇي جۇمىس ىستەي باستاعاننان كەيىن عانا باستالعان. كاسىپكەردىڭ سوزىنشە، قويانبايەۆا دا - ءنىعماتۋليننىڭ ادامى.
سونىمەن قاتار، ءنىعماتۋليننيىڭ ادامدارى كاسىپكەردەن پروكۋراتۋرا نەمەسە باسقا دا ينستانسيالارعا جۇگىنگەن نە جۇگىنبەگەنىن ۇنەمى سۇراپ تۇرعان. سوتتىڭ ءوزى بۇل ءىستى ءبىرجاقتى قاراستىرعان كورىنەدى. بۇل ءىستىڭ انىق-قانىعىن انىقتاۋعا تىرىسقان جالعىز ورگان – باس پروكۋراتۋرا ەكەن. ءبىراق كاسىپكەر بۇل ىسكە ەكس سۋديا مەيرامبەك تايمەردەنوۆ ارالاسقاندىقتان ىستە جەڭىلگەن دەپ ويلايدى. سەبەبى كاسىپكەر بۇل ىسكە باس پروكۋراتۋرانىڭ ءوزى ارالاسا باستاعاندىقتان ىستە جەڭىسكە جەتەمىن دەپ ويلاعان.
الەكسەي لۋكيانچەنكو 2015 جىلى سالعان ءقوناقۇي قۇرىلىسىنا سول كەزدەگى كۋرس بويىنشا 150 ميلليون تەڭگەدەي جۇمساعان. كاسىپكەر باستاپقىدا قۇرىلىستى باستاعان كەزدە كەيىن ونى تارتىپ الۋ ءۇشىن وعان ادەيى ەشكىم كەدەرگى جاساماعان دەپ كۇدىكتەنىپ وتىر.
"ەگەر قۇرىلىس كەزىندە قانداي دا ءبىر بۇزۋشىلىقتار بولسا سابيرا قويانبايەۆا مەملەكەتتىك ورگان رەتىندە باسىندا-اق كەدەرگى جاسار ەدى. اۋەلى ول جەرگە اقشا قۇيىپ، كاسىپتى اياققا تۇرعىزىپ، ارتىنان جۇمىس ىستەۋگە كەدەرگى جاساپ وتىر. بۇل رەيدەرلىك شابۋىل جاسايتىن كوماندانىڭ ارەكەتى دەپ ويلايمىن. (...) ول ەرلان زايرۋللا ۇلىنىڭ كومانداسى دەپ ويلايمىن، سەبەبى ونىڭ رۇقساتىنسىز بالقاشتا ەشكىم ەشتەڭە ىستەي المايدى"، - دەيدى كاسىپكەر.
الەكسەي لۋكيانچەنكو رەيدەرلىك شابۋىل ءىسى بويىنشا قىلمىستىق ءىس قوزعالۋى كەرەگىن ايتادى. سونىمەن قاتار، كاسىپكەردىڭ سوزىنشە، قاراعاندى وبلىسىندا نىعماتۋليندەردىڭ ىقپالى ءالى دە زور. ول نىعماتۋليندەر ايماقتاعى تۋريستىك سالانى ءوز قولىنا العىسى كەلەتىنىن ايتادى.
