قازاقستاندا تابىسى مەن شىعىنى اراسىندا سايكەسسىزدىك انىقتالعان ازاماتتارعا 10 پايىز كولەمىندە سالىق ەنگىزۋ تەتىگى قاراستىرىلىپ جاتىر، دەپ حابارلايدى Dalanews.kz.
مەملەكەتتىك كىرىستەر كوميتەتىنىڭ باسقارما ساراپشىسى ۇلدانا سۇلەيمەننىڭ ايتۋىنشا، ەگەر ازامات شىعىنى تابىسىنان نەگە ارتىق ەكەنىن دالەلدەي الماسا، ايىرما سوماسىنا 10% مولشەرىندە سالىق ەسەپتەلەدى. مىسالى، رەسمي تابىسى 300 مىڭ تەڭگە، ال شىعىنى 500 مىڭ تەڭگە بولعان جاعدايدا، 200 مىڭ تەڭگە ايىرماعا 20 مىڭ تەڭگە سالىق سالىنۋى مۇمكىن.
ونىڭ سوزىنشە، ەگەر سالىق تولەۋشى حابارلامادا كورسەتىلگەن بۇزۋشىلىقتارمەن كەلىسسە، وندا ول نەمەسە سالىق اگەنتى انىقتالعان بۇزۋشىلىقتار تيەسىلى كەزەڭ بويىنشا ەسەپتىلىكتى ۇسىنىپ، ءتيىستى سالىقتار مەن بيۋدجەتكە تولەنەتىن تولەمدەردى جۇرگىزەدى.
سالىق ساراپشىسى ايدار ماساتبايەۆ بۇل تەتىك قاراپايىم ازاماتتارعا ايتارلىقتاي اسەر ەتپەيدى دەپ ەسەپتەيدى. الايدا ول مۇنداي باقىلاۋدى سالىقتان جالتاراتىن ءىرى كاسىپكەرلەر مەن اۋقاتتى توپتارعا قولدانۋ ءتيىمدى بولاتىنىن اتاپ ءوتتى.
ونىڭ پىكىرىنشە، 100–200 مىڭ تەڭگە كولەمىندەگى ارتىق شىعىندى قارىزعا الدىم نەمەسە تۋىستارىمنان الدىم دەپ تۇسىندىرۋگە بولادى، ال سالىق ورگاندارى جەكە ادامدار اراسىنداعى قارجىلىق قاتىناستاردى تولىق تەكسەرە بەرمەيدى. دەگەنمەن مۇنداي ءتارتىپتى ءىرى كاسىپكەرلەر مەن وليگارحتارعا قولدانۋ ورىندى، دەدى ول.
