اقتوبە، قوستاناي، اقمولا، اتىراۋ، سولتۇستىك قازاقستان وبلىستارىندا 5 708 ءۇي، 1 609 اۋلا اۋماعى جانە 2 035 ساياجاي سۋ استىندا قالدى. قازاقستان وڭىرلەرىندە سۋ تاسقىنىنا قاتىستى توتەنشە جاعداي ءالى دە كۇردەلى بولىپ وتىر. ال بۇقارالىق اقپارات قۇرالدارىندا ءدال وسى سۋ سالاسىنا جاۋاپتى مينيستر توتەنشە جاعداي كەزىندە توي جاسادى دەپ سىنعا قالدى، - دەپ حابارلايدى Dalanews.kz.
ب ا ق مالىمەتىنشە، وتكەن دەمالىس كۇندەرى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ توي وتكىزگەن.
"ول ۇلىن ۇيلەندىردى. توي 26 ساۋىرگە جوسپارلانعان بولاتىن. ال وسى دەمالىس كۇنى كەلىنىنىڭ ۇيگە كەلگەن كۇنىن وتكىزدى. جاقىندا عانا سوگىس العان جوق پا ەدى؟" - دەيدى Ulysmedia.kz دەرەككوزى.
بۇعان دەيىن توقايەۆ نۇرجىگىتوۆ باسقاراتىن مينيسترلىكتى سىنعا الدى.
جاعداي وسىلاي جالعاساتىن بولسا، ءتيىستى قىزمەتكەرلەردى لاۋازىمىنان بوساتۋ قاجەت.ەڭ باستى كريتەريي – مەملەكەتتىك قىزمەتشىلەردىڭ تيىمدىلىگى. مەملەكەتتىك ورگاندار جانە اكىمدىكتەر اراسىندا ناقتى ءارى تۇراقتى بايلانىس الگوريتمى جوق. ءتيىستى مينيسترلىك ەلىمىزدىڭ تابيعي اپاتتارعا دايىندىعىن قاداعالاپ وتىرۋى قاجەت. بۇل – مينيسترلىكتىڭ نەگىزگى ماقساتى. وسى ماسەلەگە باسا نازار اۋدارۋ كەرەك. مينيسترلىك گيدروتەحنيكالىق جانە باسقا دا ماڭىزدى نىسانداردىڭ جاعدايىن تەكسەرىپ، شىنايى مالىمەت بەرىپ وتىرۋعا ءتيىس"، – دەدى پرەزيدەنت.
ال 30 ناۋرىزدا مەملەكەت باسشىسى ەلىمىزدەگى سۋ تاسقىنىنا بايلانىستى شۇعىل كەڭەس وتكىزدى. جيىن بارىسىندا پرەزيدەنت سۋ تاسقىنىنا قارسى ۋاقىتىلى شارا قابىلداماعانى ءۇشىن سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆكە قاتاڭ سوگىس بەردى.
ال سوگىس العان نۇرجىگىتوۆ قىزمەتىنەن كەتپەيتىنىن مالىمدەدى.
"ماعان قاتاڭ سوگىس جاريالاندى، ەندىگى جەردە اتقارىلعان جۇمىستار جەرگىلىكتى اتقارۋشى ورگاندارمەن جانە توتەنشە جاعدايلار مينيسترلىگىمەن بىرلەسە وتىرىپ جۇرگىزىلىپ جاتىر، شارا قولداناتىن شىعار"، – دەپ جاۋاپ بەردى ول.
كەيىنگى دەرەكتەر بويىنشا اۆاريالىق-قۇتقارۋ جانە سۋ تاسقىنىنا قارسى جۇمىستارعا 34 مىڭ ادام، 4 242 تەحنيكا، ونىڭ ىشىندە، 890 سۋ سورۋ قۇرالى، 335 ءجۇزۋ قۇرالى، 19 اۋە كەمەسى جۇمىلدىرىلعان.
13 543 ادام ءوز ۇيلەرىنە ورالدى. 7 014 ادام، ونىڭ ىشىندە 3 144 بالا ەۆاكۋاسيالاۋ پۋنكتتەرىندە. سۋ تاسقىنى باستالعالى بەرى بارلىعى 113 693 ادام، ونىڭ ىشىندە 39 922 بالا قۇتقارىلىپ، ەۆاكۋاسيالاندى.
107 613 اۋىل شارۋاشىلىق جانۋارلارى ءقاۋىپسىز جەرگە ايدالدى.
