Aqtóbe, Qostanai, Aqmola, Atyraý, Soltústik Qazaqstan oblystarynda 5 708 úi, 1 609 aýla aýmaǵy jáne 2 035 saiajai sý astynda qaldy. Qazaqstan óńirlerinde sý tasqynyna qatysty tótenshe jaǵdai áli de kúrdeli bolyp otyr. Al buqaralyq aqparat quraldarynda dál osy sý salasyna jaýapty ministr tótenshe jaǵdai kezinde toi jasady dep synǵa qaldy, - dep habarlaidy Dalanews.kz.
BAQ málimetinshe, ótken demalys kúnderi sý resýrstary jáne irrigatsiia ministri Nurjan Nurjigitov toi ótkizgen.
"Ol ulyn úilendirdi. Toi 26 sáýirge josparlanǵan bolatyn. Al osy demalys kúni kelininiń úige kelgen kúnin ótkizdi. Jaqynda ǵana sógis alǵan joq pa edi?" - deidi Ulysmedia.kz derekkózi.
Buǵan deiin Toqaev Nurjigitov basqaratyn ministrlikti synǵa aldy.
Jaǵdai osylai jalǵasatyn bolsa, tiisti qyzmetkerlerdi laýazymynan bosatý qajet.Eń basty kriterii – memlekettik qyzmetshilerdiń tiimdiligi. Memlekettik organdar jáne ákimdikter arasynda naqty ári turaqty bailanys algoritmi joq. Tiisti ministrlik elimizdiń tabiǵi apattarǵa daiyndyǵyn qadaǵalap otyrýy qajet. Bul – ministrliktiń negizgi maqsaty. Osy máselege basa nazar aýdarý kerek. Ministrlik gidrotehnikalyq jáne basqa da mańyzdy nysandardyń jaǵdaiyn tekserip, shynaiy málimet berip otyrýǵa tiis", – dedi Prezident.
Al 30 naýryzda Memleket basshysy elimizdegi sý tasqynyna bailanysty shuǵyl keńes ótkizdi. Jiyn barysynda Prezident sý tasqynyna qarsy ýaqytyly shara qabyldamaǵany úshin sý resýrstary jáne irrigatsiia ministri Nurjan Nurjigitovke qatań sógis berdi.
Al sógis alǵan Nurjigitov qyzmetinen ketpeitinin málimdedi.
"Maǵan qatań sógis jariialandy, endigi jerde atqarylǵan jumystar jergilikti atqarýshy organdarmen jáne Tótenshe jaǵdailar ministrligimen birlese otyryp júrgizilip jatyr, shara qoldanatyn shyǵar", – dep jaýap berdi ol.
Keiingi derekter boiynsha avariialyq-qutqarý jáne sý tasqynyna qarsy jumystarǵa 34 myń adam, 4 242 tehnika, onyń ishinde, 890 sý sorý quraly, 335 júzý quraly, 19 áýe kemesi jumyldyrylǵan.
13 543 adam óz úilerine oraldy. 7 014 adam, onyń ishinde 3 144 bala evakýatsiialaý pýnktterinde. Sý tasqyny bastalǵaly beri barlyǵy 113 693 adam, onyń ishinde 39 922 bala qutqarylyp, evakýatsiialandy.
107 613 aýyl sharýashylyq janýarlary qaýipsiz jerge aidaldy.
