ۇلتتىق بانك باسشىسى تيمۋر سۇلەيمەنوۆ بۇگىن ءماجىلىس دالىزىندە جۋرناليستەر قويعان سۇراقتارعا جاۋاپ بەرە وتىرىپ، ستاتي ءىسى بويىنشا بۇعاتتالعان ۇلتتىق قور اقشاسى قايتارىلعانىن ايتتى، دەپ جازادى Dalanews.kz.
بۇل رەتتە جۋرناليستەر باس بانكيردەن ستاتي ءىسى بويىنشا بۇعاتتان بوساتىلىپ، قايتارىلعان قاراجات سوماسىن ناقتىلاۋدى سۇرادى.
"مەنىڭ ويىمشا، بۇل - سوڭعى كۇندەردەگى جاعىمدى جاڭالىقتاردىڭ ءبىرى. بۇل اكتيۆتەر باياعىدا، شامامەن 10 جىل بۇرىن بۇعاتتالعان. ول كەزدە ۇلتتىق قوردىڭ شامامەن 80 ملن دوللار بولاتىن اكتيۆىنە بۇعات سالىنعان. قازاقستان مەن باسقا تاراپتار اراسىنداعى كەلىسسوزدەر بارىسىندا ۇكىمەت پەن ۇلتتىق بانكتىڭ كاسىبي جۇمىسىنىڭ ارقاسىندا ۇلتتىق قوردىڭ اكتيۆتەرى بۇعاتتان شىعارىلىپ، قوردىڭ ەنشىسىنە قايتارىلدى"، - دەدى تيمۋر سۇلەيمەنوۆ.
2024 جىلعى 18 جەلتوقساندا قازاقستان ۇكىمەتى، ق ر ۇلتتىق بانكى جانە Tristan Oil جەتەكشى كرەديتورلارىنىڭ قولداۋىنداعى ستاتي تاراپى قازاقستانداعى مۇناي-گاز اكتيۆتەرى تۋرالى ۇزاققا سوزىلعان داۋدى رەتتەۋ پروسەسىن ءساتتى اياقتالعانى بەلگىلى بولدى. ستاتي ىسىنە قاتىستى تۇپكىلىكتى رەتتەۋ تۋرالى كەلىسىمنىڭ ناقتى شارتتارى جاسىرىن بولىپ تابىلاتىنى الدىندا حابارلانعان ەدى.
19 جەلتوقساند قازاقستان ستاتي ءىسى بويىنشا سوت پروسەستەرىنە قانشا قاراجات جۇمساعانى تۋرالى دەرەكتەر پايدا بولدى.
20 جەلتوقساندا ۇدتتىق بانك رەتتەۋ ناتيجەسىندە ق ر ۇلتتىق بانكى ستاتي تاراپتارىنىڭ قازاقستان رەسپۋبليكاسى ۇلتتىق قورىنىڭ اكتيۆتەرىنە قويعان تالاپتارىنان باس تارتۋىنا جانە شۆەسيادا قامتاماسىز ەتۋ شارالارىنىڭ ىقپالىندا بولعان قازاقستان رەسپۋبليكاسى ۇلتتىق قورىنىڭ اكتيۆتەرىن ءوز يەلىگىنە قايتارۋعا قول جەتكىزگەنىن حابارلادى. الايدا سوماسىن ناقتىلاماپ ەدى.
