"جىراقتاعى قازاقستان اكتيۆىنىڭ بۇعاتتالۋى زاڭسىز، سوندىقتان ودان كەلگەن زياندى وتەۋ ءۇشىن قولدان كەلگەننىڭ ءبارىن جاسايمىز"
دەلىنگەن ق ر ادىلەت مينيسترلىگىنىڭ باسپا ءسوز قىزمەتى تاراتقان حابارلامادا.
«ارىزدانۋشىلارعا ءالى ءبىر تيىن ۇستاتقان جوقپىز. شەتەلدەگى سوتتا قازاقستان رەسپۋبليكاسىنىڭ مۇددەسىن قورعاۋ ءۇشىن ەڭ مىقتى زاڭگەرلەردى جالدادىق. شەتەلدە بۇعاتتالعان قازاقستان رەسپۋبليكاسىنا تيەسىلى اقشاعا قاتىستى ءىستى ادىلەت مينيسترلىگى باستى نازاردا ۇستاپ وتىر. قالاي دەگەنمەن دە ەلىمىز ءۇشىن ءقاۋىپ اربيتراجدى سوت شەشىمىنىڭ سوماسىمەن شەكتەلۋدە»، — دەلىنەدى رەسمي حابارلامادا.
مينيسترلىك بۇل ءىس بويىنشا ارىزدانۋشى —
اناتوليي ءستاتيدىڭ وسىنداي ۇتىمدى ءارى اگرەسسيۆتى امالدى ادەيى تاڭداپ العانىن ايتادى. ويتكەنى ول ۇلتتىق قور اقشاسىنىڭ بۇعاتتالۋى ەل ىشىندە دە، سول سەكىلدى سىرتتا دا ۇلكەن ايقاي-شۋ تۋعىزاتىنىن جاقسى بىلگەن.
«شەتەلدىك باسپاسوزدە جاريا بوپ جاتقان بۇل ىسكە قاتىستى اقپاراتتار — اگرەسسيۆتى ناسيحاتتىڭ كوزى. ول وبەكتيۆتى اقپاراتقا جاتپايدى»، — دەلىنەدى مينيسترلىك تاراتقان مالىمەتتە.
ءسوز سوڭىندا ادىلەت مينيسترلىگى ۇلتتىق قور اقشاسىنىڭ بۇعاتتالۋى ۋاقىتشا شارا ەكەنىنە سەندىرە وتىرىپ، بۇدان بولەك قوسىمشا اقپاراتتاردى بەرە المايتىندارىن وكىنىشپەن جەتكىزىپتى.
"سەبەبى قوسىمشا مالىمەتتەر سوتتا ماعىناسى مايىسىپ ەلىمىزگە قارسى پايدالانىلىپ كەتۋى مۇمكىن. سوندىقتان مينيسترلىك بۇل ىسكە قاتىستى ەگجەي-تەگجەيلى ەشقانداي اقپار بەرە المايدى. بۇل ارادا بارىنەن دۇرىسى — "ءالىپتىڭ ارتىن باعۋ"، — دەپتى قۇزىرلى ورگان.
ايتا كەتەلىك، 2018 جىلدىڭ قاڭتار ايىنىڭ باسىندا امستەردام سوتى مولدوۆان كاسىپكەرىنىڭ شاعىمى بويىنشا، "سامۇرىق-قازىنا" ۇلتتىق ءال-اۋقات قورىنا تيەسىلى KMG Kashagan BV گوللاند كومپانياسىنىڭ 5،2 ملرد دوللار بولاتىن اكسياسىن بۇعاتتاۋ تۋرالى شەشىمىن وزگەرىسسىز قالدىردى.
ال بۇل سوت شەشىمى 2017 جىلدىڭ 8-قىركۇيەگىندە شىققان ەدى. ستوكگولم ساۋدا پالاتاسى باستاماسىمەن قۇرىلعان سوت قازاقستاندىق تاراپقا حالىقارالىق مىندەتتەمەلەرىن بۇزىپ، ستاتيگە زالال كەلتىرگەن ءۇشىن 500 ميلليوننان استام دوللار تولەۋدى مىندەتتەگەن. ال جەلتوقسان ايىندا ۇلتتىق قوردىڭ اكتيۆىنە قىزمەت كورسەتەتىن Bank of New York Mellon قازاقستان ۇلتتىق قورىنىڭ 22 ميلليارد دوللارىن بۇعاتتاعان ەدى.
ودان سوڭ ۇلتتىق قوردىڭ اقشاسىن رەتتەۋشى ۇلتتىق بانك ەلىمىزدىڭ اتىنان قارسى شاعىم تۇسىرگەنىن مالىمدەپ ەدى. بىزگە بەلگىلى بولعانداي،
قازاقستان مولدوۆان كاسىپكەرى ستاتي مەن ونىڭ سىبايلاستارىن الاياقتىق ارەكەتتەرى ءۇشىن "ۇجىمداسقان قىلمىسپەن جانە سىبايلاس جەمقورلىقپەن كۇرەس تۋرالى" اقش زاڭى اياسىندا جازاعا تارتۋدى سۇراپ وتىر ەكەن.
ايتا كەتەلىك، 2017 جىلدىڭ جەلتوقسان ايىنداعى ق ر قارجى مينيسترلىگىنىڭ دەرەگى بويىنشا، ۇلتتىق قورداعى قوردىڭ كولەمى 57،3 ملرد دوللار بولعان. دەمەك، بۇعاتتالعان اقشا — ۇلتتىق قوردىڭ تەڭ جارتىسى (!).
بۇدان بۇرىن وسى ماسەلەگە قاتىستى پىكىر بىلدىرگەن ەكس-پرەمەر اكەجان قاجىگەلدين وسىنشاما اقشانىڭ اياقاستى شەتەل بانكىنەن ءبىر-اق شىققانىنا قايران قالعان بولاتىن.
«بيلىك ابدەن بىلعانعان. جەمقورلىقتىڭ ۇشار باسىنا شىقتى.
حالىق مۇنشاما اقشانىڭ شەتەل اسقانىنان حابارسىز.
مۇنداي شەشىمدى كىم قابىلداپ ءجۇر؟ بۇل – سالىم. دەمەك، تۇسكەن ءتۇسىم بار. جىلىنا جارتى ميلليارد. بۇل كىمنىڭ قالتاسىندا كەتتى؟»، – دەيدى قاجىگەلدين.
دايىنداعان، كامشات ساتييەۆا
