سولتۇستىك قازاقستان وبلىسىندا پروكۋراتۋرا ورگاندارى ەڭبەك قاتىناستارى سالاسىنداعى زاڭناما تالاپتارىنىڭ بۇزىلۋىن انىقتادى. جۇرگىزىلگەن تالداۋ ناتيجەسىندە قازاقستان رەسپۋبليكاسىنىڭ ەڭبەك كودەكسىندە كوزدەلگەن تولەمدەردىڭ قىزمەتكەرلەرگە تولىق كولەمدە تولەنبەگەنى بەلگىلى بولدى، دەپ حابارلايدى Dalanews.kz
اتاپ ايتقاندا، تايىنشا جانە ءۋاليحانوۆ اۋداندارىنىڭ ءبىلىم بولىمدەرى ەڭبەك كودەكسىنىڭ 52-بابىنىڭ تالاپتارىن ساقتاماي، 215 پەداگوگ قىزمەتكەرگە بىلىكتىلىكتى ارتتىرۋ كۋرستارىنان وتۋگە بايلانىستى ءىسساپار شىعىندارىن تولەمەگەن. تولەنبەگەن قاراجاتتىڭ جالپى سوماسى 22،3 ملن تەڭگەنى قۇراعان.
پروكۋرورلىق قاداعالاۋ اكتىلەرىنىڭ ناتيجەسىندە كىنالى لاۋازىمدى تۇلعالار زاڭدا بەلگىلەنگەن جاۋاپكەرشىلىككە تارتىلدى. قازىرگى تاڭدا 128 پەداگوگقا 10 ملن تەڭگە كولەمىندە تيەسىلى تولەمدەر تولىق وتەلدى.
قالعان قىزمەتكەرلەردىڭ بۇزىلعان ەڭبەك قۇقىقتارىن قالپىنا كەلتىرۋ جۇمىستارى جالعاسىپ جاتىر.
