وڭىردە ءبىراز سۋ كوزدەرى بار. جەرگىلىكتى بيلىك ورىندار سول سۋ رەسۋرستارىن كەڭىنەن پايدالانىپ، بالىق شارۋاشىلىعىن وركەندەتۋدى كوزدەپ وتىر. وسى ماقساتتا تابيعي رەسۋرستار جانە تابيعاتتى پايدالانۋدى رەتتەۋ باسقارماسى قاي جەرگە بالىق شارۋاشىلىعىن دامىتۋعا بولاتىنىن انىقتاعان.
بۇل جوبانى قوعامدىق كەڭەستىڭ كەزەكتى باسقوسۋىندا باسقارما باسشىسى بەيبىت يسمانوۆ جۇرتشىلىق نازارىنا ۇسىندى.
– بىزدەر وبلىس اۋماعىنداعى سۋ كوزدەرىن مۇقيات تەكسەرۋگە جەرگىلىكتى بيۋدجەتتەن 23 ملن تەڭگە بولگەن بولاتىنبىز. وسى بولىنگەن قارجىعا عىلىمي-زەرتتەۋ جۇمىستارى جۇرگىزىلىپ، وڭىردە بالىق شارۋاشىلىعىن دامىتۋعا بولاتىن 43 سۋ كوزى انىقتادىق. اتالعان سۋ كوزدەرىندە الداعى ۋاقىتتا بالىق ءوسىرىپ، تابىس تابۋعا بولادى، – دەدى بەيبىت يسمانوۆ.
باسقارما باسشىسى جۇرگىزىلگەن جۇمىستار الداعى ۋاقىتتا سولتسۇتىك قازاقستان وبلىسىندا بالىق شارۋاشىلىعىن دامىتىپ، بالىق وسىرەتىن سۋ كوزدەرىنىڭ سانىن ارتتىرا تۇسەتىنىن العا تارتتى.
مامانداردىڭ زەرتتەۋى بويىنشا سقو-دا ۇزىن سانى 500-گە جەتەتىن بالىق شارۋاشىلىعىن دامىتۋعا قولايلى سۋ كوزدەرى بار ەكەن. وتكەن جىلى ولاردىڭ 200 پايدالانىلماعانى انىقتالعان.
كۇنى كەشە عانا ۇكىمەت باسشىسى ءاليحان سمايلوۆ سوڭعى ۋاقىتتارى ەلىمىزدە تاماق ونەركاسىبى سالاسىندا بالىق شارۋاشىلىعى قارقىندى دامىپ جاتقانىن العا تارتقان-دى.
قازىرگى تاڭدا ەلىمىزگە سىرتتان جەتكىزىلەتىن بالىق ەكسپورتى تىم جوعارى ەكەنى جاسىرىن ەمەس. ۇكىمەت ەلىمىزدى بالىق شارۋاشىلىعىن دامىتىپ، بالىق ەكسپورتىن تومەندەتۋدى كوزدەۋدە.
قازىرگى تاڭدا بالىق شارۋاشىلىعىن دامىتۋعا اڭسارى اۋعان شارۋالارعا مەملەكەت بارىنشا قولداۋ كورسەتۋدە. ايتالىق، بالىق ءوسىرۋ ءۇشىن سۋ كوزدەرىن جوبالاۋ ءىسى بارىنشا جەڭىلدەتىلگەنىن جانە سالىقتىق جەڭىلدىكتەر دە قاراستىرىلعانىن ايتا كەتۋىمىز كەرەك.
سولتسۇتىك قازاقستان وبلىسى ۇكىمەتتىڭ بۇل باعىتتاعى جۇمىستارىنا ءبىرىنشى بولىپ ءۇن قاتىپ، وڭىردەر بالىق شارۋاشىلىعىن دامىتۋعا باس كوڭىل ءبولىپ وتىر.
