سپورت جانە تۋريزم ءمينيسترى ەربول مىرزابوسىنوۆ بريفينگ بارىسىندا ۆەدومستۆونىڭ نە سەبەپتى ميحايل شايدوروۆتىڭ جالاقىسى مەن ونى دايىنداۋعا جۇمسالعان شىعىندار تۋرالى اقپاراتتى اشىق جاريالاعانىنا تۇسىنىكتەمە بەردى، دەپ حابارلايدى Dalanews.kz.
ءمينيستردىڭ ايتۋىنشا، ۆەدومستۆودا بارلىق پروسەسس اشىق جۇرگىزىلەدى، بيۋدجەت جاسىرىلمايدى، ال قارجىعا قاتىستى مالىمەتتەر قوعام ءۇشىن قولجەتىمدى.
سونداي-اق جۋرناليستەر قىسقى وليمپيادا ويىندارىنا بارعان دەلەگاسيانىڭ قۇرامىنا جانە وعان بيۋدجەتتەن قانشا قاراجات جۇمسالعانىنا قاتىستى سۇراق قويدى.
"دەلەگاسيا ارنايى بۇيرىقپەن بەكىتىلەدى. دەلەگاسيا قۇرامىندا بولعان ءار ادامنىڭ حالىقارالىق ارەنادا سپورتشىلارمەن جۇمىس ىستەۋگە بايلانىستى وزىنە ءتان ناقتى مىندەتى بولدى. ول جاققا بىردە-بىر ارتىق ادام بارعان جوق"، – دەدى ەربول مىرزابوسىنوۆ.
سونىمەن قاتار، مينيستر دەلەگاسياعا جۇمسالعان قاراجاتتىڭ ناقتى سوماسىن اتاعان جوق.
Tengrinews.kz پورتالىنا بەرگەن ەكسكليۋزيۆ سۇحباتىندا وليمپيادا چەمپيونى ميحايل شايدوروۆ وليمپيادا ويىندارىنا دايىندىق قالاي قارجىلاندىرىلعانىن، تولىققاندى جاعداي قاشان جاسالعانىن ايتتى، سونىمەن قاتار، تابىسى تۋرالى جاريالانعان اقپاراتقا قاتىستى پىكىر بىلدىرگەن بولاتىن.
سپورتشىنىڭ ايتۋىنشا، دايىندىقتاعى ەلەۋلى وزگەرىستەر تەك وليمپيادا ماۋسىمىندا باستالعان. بۇعان دەيىن ول جالاقىنى كوتەرۋ، باپكەرلەرگە ەڭبەكاقىنى ارتتىرۋ جانە مامانداردى شتاتقا الۋ ماسەلەسىن بىرنەشە رەت كوتەرگەن.
