بۇل تۋرالى ءتارتىپ ساقشىلارى «ZOOM» بەينەپلاتفورماسى ارقىلى وتكەن مەديسينالىق مەكەمەلەردىڭ ارنايى جينالىسى كەزىندە حابارلادى.
– تۇراقتى نەگىزدە ينتەرنەت-رەسۋرستارعا جانە بۇقارالىق اقپارات قۇرالدارىنا مونيتورينگ جۇرگىزىلۋدە، مەديسينالىق انىقتامالاردى قولدان جاساۋ فاكتىلەرىن انىقتاۋ بويىنشا جەدەل شارالار قابىلدانۋدا.
ەسكە سالايىق، جاقىندا ازاماتتاردى ساۋد ارابياسى كورولدىگىنە جىبەرۋ ءۇشىن 140-تان استام جالعان ۆاكسيناسيا ءتولقۇجاتىن جاساۋمەن اينالىسقان تۋريستىك كومپانيا انىقتالدى.
سونىمەن قاتار، تەرگەۋ ساتىسىندا №21، №4، №16 جانە №13 قالالىق ەمحانالاردىڭ جالپى تاجىريبە دارىگەرلەرىنە قاتىستى قىلمىستىق ىستەر قارالىپ جاتىر.
ولار كىرگەن ازاماتتارعا ۆاكسيناسيانى سالماي-اق، دوزانىڭ ءبىرىنشى كومپونەنتىن قابىلداۋ تۋرالى جالعان دەرەكتەردى بازاعا ەنگىزگەن نەمەسە ۆاكسيناسيا بولمەسىندە بەينەباقىلاۋ كامەراسى بولسا، ولار ەكپەنى العانداي ەتىپ كورسەتىپ ەكپە سالىنعان ورىندى پلاستىرمەن جابىستىرعان.
بۇل قىزمەتتەردىڭ بارلىعى اقشالاي سىياقى ءۇشىن ۇسىنىلعاندىعى انىق، – دەيدى الماتى قالالىق پوليسيا دەپارتامەنتى باستىعىنىڭ ءبىرىنشى ورىنباسارى نۇرلان الماسبەكوۆ.
سونىمەن قاتار، سپيكەر جالعان قۇجات جاساعانى ءۇشىن 4 جىلعا دەيىن باس بوستاندىعىنان ايىرۋ جازاسى بار ەكەنىن، ال ونى قولدانعان ادام 40 تاۋلىككە قاماۋعا الىناتىنىن ەسكە سالدى.
سونداي-اق، جوعارىدا اتالعان ازاماتتاردىڭ ارەكەتىندە «قىزمەتتىك جالعاندىق» بەلگىلەرى بار، ياعني، جالعان اقپاراتتى رەسمي قۇجاتتارعا ەنگىزۋ.
– قۇرمەتتى مەديسينا قىزمەتكەرلەرى، ءوزىڭىزدى قىلمىستىق ىسكە تارتۋعا جول بەرمەڭىز جانە وتباسىڭىز بەن جاقىندارىڭىزدى وسىدان قورعاڭىز، – دەپ قورىتىندىلادى الماسبەكوۆ.
