دەلەگاسيانى ءماميننىڭ ورىنباسارى رومان سكليار باستاپ بارادى. كەزدەسۋدە COVID-19-كە قارسى رەسەي ۆاكسيناسىن ساتىپ الۋ ماسەلەسى ءسوز بولادى.
"(ۆاكسينا) الدىمەن مىندەتتى حالىقارالىق سەرتيفيكاتتىڭ بارلىق ساتىسىنان ءوتۋى كەرەك"، – دەيدى قوجاحمەتوۆ. ايتۋىنشا ءازىر كوروناۆيرۋستىڭ تارالۋىن تەجەيتىن ۆاكسينا ازىرلەپ جاتقان 10 ءوندىرۋشى بار.
"بۇلار ىندەتتىڭ بەتىن قايتاراتىن ەم-دوم تاسىلدەرىن ىزدەستىرۋدە. كلينيكالىق سىناقتىڭ ءۇشىنشى، ءتورتىنشى ساتىدان وتكەسىن بارىپ سەرتيفيكات الادى. كوروناۆيرۋسقا قارسى انە-مىنە ۆاكسينا ويلاپ تاباتىن ەلدەرمەن تەز ارادا مەموراندۋمعا وتىرىپ ۇلگەرۋ كەرەك. حالىقتىڭ 10 پايىزىن ەرتە باستان ەگۋ قاجەت دەگەن ددسۇ-نىڭ اقىل-كەڭەسىن ەسكەرۋگە ءتيىسپىز. تۇپتەپ كەلگەندە ۆاكسينانىڭ قاي ەلدە جاسالعانى ماڭىزدى ەمەس"، – دەيدى مينيستر وكىلى.
كوروناۆيرۋسقا قارسى رەسەي ۆاكسيناسىنىڭ تىركەۋدەن وتكەنىن تۇنەۋكۇنى پۋتين حابارلاعان. "ادام اعزاسىنا ءقاۋىپ توندىرەردەي تەرىس اسەرى جوق. كەرىسىنشە ىندەتتىڭ بەتىن قايتارار قابىلەتى بار"، دەگەن كرەمل باسشىسى.
بەلگىلى دارىگەر، نەيروحيرۋرگ مىڭجىلقى بەردىقوجايەۆ قامشى پورتالىنا بەرگەن سۇحباتىندا الماتىداعى «ورتالىق كلينيكالىق اۋرۋحانا» نەيروحيرۋرگيا ورتالىعىنىڭ مەڭگەرۋشىسى مىڭجىلقى بەردىقوجايەۆ تەكسەرىلمەگەن ۆاكسينانى ازاماتتارعا سالۋعا تۇبەگەيلى قارسى ەكەنىن ايتقان. ساپاسى كۇدىكتى ۆاكسينا سالدىرعانشا اراقاشىقتىقتى ساقتاپ، قاجەتتى ەم شارالارى مەن جەكە پروفيلاكتيكانى مىقتاپ قولعا العان دۇرىس.
