بۇل تۋرالى بايبەكتىڭ وكىلى ايجان تاشەنوۆا ءوزىنىڭ الەۋمەتتىك جەلىدەگى پاراقشاسىندا حابارلادى.
كەشە الماتى قالاسى سوتىنىڭ اپەللياسياسى اۋەزوۆ اۋداندىق №2 سوتىنىڭ بايبەكتىڭ ار-نامىسىن، ابىرويىن جانە ىسكەرلىك بەدەلىن قورعاۋ جونىندە ج.ماماي مەن ي.يمانبايەۆاعا قارسى بەرگەن تالاپ-ارىزى بويىنشا شەشىمىن ءوز كۇشىندە قالدىردى.
«جاريا تۇردە جالا جاپقانى ءۇشىن جاۋاپكەرشىلىككە تارتۋ ماسەلەسى بويىنشا قۇقىقتىق پرەسەدەنت جاسالدى. كىنالىلەر وزدەرىنىڭ زاڭسىز ارەكەتتەرى ءۇشىن لايىقتى جازاعا تارتىلدى. جالاڭ ۇراندى جامىلىپ، باسقالاردى نەگىزسىز كىنالاۋعا ەشكىمگە دە جول بەرىلمەيدى.
«جاڭا مەديانىڭ» ومىرىمىزگە جان-جاقتى ىقپالىن ەسكەرسەك، جەكە ادامنىڭ، وتباسىنىڭ، بالالارى مەن تۋىستارىنىڭ قۇقىقتارى مەن مۇددەلەرىن قوزعايتىن جانە قورلايتىن جالا جابۋ اركىمنىڭ دە باسىنا ءتۇسۋى مۇمكىن»، – دەپ جازدى زاڭگەر ايجان تاشەنوۆا ءوزىنىڭ Facebook پاراقشاسىندا.
سونىمەن قاتار، ول بۇل پروسەسستىڭ قوعامدا قۇقىقتىق مادەنيەتتى ارتتىرۋعا، ءوز سوزدەرى مەن ىس-ارەكەتتەرى ءۇشىن جاۋاپكەرشىلىكتى ارتتىرۋعا جاسالعان ەلەۋلى قادام ەكەنىن ايتتى.
وسىلايشا، جاي عانا پوستتار، ب ا ق پەن انونيم تەلەگرام-كانالداردا جاريالانعان حابارلامالار، سونداي-اق ىسكە مۇلدە قاتىسى جوق تۇسىنىكسىز انىقتامالار مەن قۇجاتتاردى جيناپ الىپ كەلگەن ماماي مەن ونىڭ سىبايلاستارى جەڭىلىس تاپتى. سوت لوگيكا مەن فاكتىلەرگە تولى قۇجاتتار، ساراپتامالىق ماتەريالدار، زاڭنىڭ ناقتى تارماقتارىنا سىلتەمەلەر كەلتىرىلگەن تالاپكەر تاراپىنىڭ تالابىن دۇرىس دەپ شەشتى. كەشەگى كۇننەن باستاپ سوت شەشىمى كۇشىنە ەنگەن.
ەستەرىڭىزگە سالساق، ءبىرىنشى سوت وتىرىسىندا جانبولات ماماي مەن ينگا يمانباي جەڭىلىپ، باۋىرجان بايبەك تۋرالى بەينەروليكتەرىن وشىرۋگە مىندەتتەلگەن ەدى. سونداي-اق، ولار جالپى سوماسى 800 مىڭ تەڭگەدەن اساتىن سوت شىعىنىن وتەۋى ءتيىس. بۇل سومانى تالاپكەرلەر وسىعان دەيىن ءاۋتيزمى بار بالالارعا قايىرىمدىلىق كومەك رەتىندە جولدايتىنىن حابارلاعان ەدى.
