سولتۇستىك قازاقستان وبلىسىندا سۋ استىندا قالعان 44 ءۇي بار دەپ حابارلايدى ايماقتىق توتەنشە جاعدايلار دەپارتامەنتى.
ونداعى مالىمەت بويىنشا، قىزىلجار اۋدانىنداعى تەپليچنىي اۋىلىنان 20 مىڭ 800 تەكشە مەتر، پريبرەجنىي اۋىلىنان 3 مىڭ 200 تەكشە مەتر سۋ سورىپ شىعارىلعان. پەتروپاۆل قالاسىنىڭ ىرگەسىندەگى زارەچنىي اۋىلىنان 6 مىڭ 69 تەكشە مەتر، بىلعارى زاۋىت شاعىن اۋدانىنان 15 مىڭ 141 تەكشە مەتر، ويقالا شاعىن اۋدانىندا 24 مىڭ 750 تەكشە مەتر سۋ سورىپ الىنعان. 16 مامىر كۇنگى اقپارات بويىنشا ەسىل وزەنىندەگى سەرگەيەۆ بوگەنىندە سۋ دەڭگەيى 6 سانتيمەترگە تومەندەگەن.
11 مامىر كۇنگى رەسمي اقپارات بويىنشا 234 ءۇيدى سۋ باسىپ تۇرعان بولاتىن.
سقو بيلىگى مەن توتەنشە جاعدايلار قىزمەتى وڭىردە سۋ دەڭگەيى تومەندەپ كەلە جاتقانىن بۇعان دەيىن دە حابارلاعان. ءبىراق تۇرعىندار سۋدىڭ بەتى قايتىپ جاتىر دەگەنگە سەنبەيتىنىن ايتقان.
