2016 جىلدىڭ 31 تامىزىنان باستاپ ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىنىڭ ءدىنتانۋ جانە مادەنيەتتانۋ كافەدراسىندا حالىقارالىق جازعى مەكتەپ اياسىندا «قازاق مادەنيەتى» اتتى بولگاريا رەسپۋبليكاسىنىڭ سوفيا ۋنيۆەرسيتەتىنەن كەلگەن دەلەگاسياسىنا ارنالعان وقۋ-تانىمدىق جۇمىسى جۇرگىزىلىپ جاتىر.
كۋرستىڭ باستى ماقساتى قازاق حالقىنىڭ ءتىلى، مادەنيەتى، ءسالت-داستۇرىن شەتەلدىكتەرگە تانىستىرۋ، دارىپتەۋ. سونىمەن قاتار، 5 قىركۇيەكتە فيلوسوفيا جانە ساياساتتانۋ فاكۋلتەتىندە وتكەن «قازاقستاننىڭ وتىز دامىعان ەلدىڭ قاتارىنا كىرۋىنىڭ مادەنيەتتانۋلىق ۇلگىسى: وزگەرمەلى الەمدەگى ينتەگراسيا جانە مادەنيەتارالىق كوممۋنيكاسيا ماسەلەلەرى» عىلىمي-زەرتتەۋ جوباسى اياسىندا قازاقستان رەسپۋبليكاسى كونستيتۋسياسى كۇنىنە ارنالعان «ماڭگىلىك ەل» يدەياسى، قازاقستاندىق پاتريوتيزم قالىپتاستىرۋ جانە رۋحاني-ەتنيكالىق قۇندىلىقتاردى ساقتاۋ جولدارى» تاقىرىبىندا حالىقارالىق دوڭگەلەك ۇستەل ءماجىلىسى بولگارلىق زەرتتەۋشىلەر بەلسەندىلىك تانىتتى. دوڭگەلەك ۇستەل اياسىندا قازاقستان رەسپۋبليكاسىنىڭ كونستيتۋسياسى كونتەكستىندەگى قازاقستاندىق قوعامداعى ينتەگراسيا جانە مادەنيتارالىق كوممۋنيكاسيا ماسەلەلەرى، قازىرگى الەمدەگى رۋحاني قۇندىلىقتاردىڭ وزگەرۋى جانە قايتا باعالانۋى، جاھاندانعان الەمدەگى رۋحاني-ادامگەرشىلىكتىك قۇندىلىقتاردىڭ ءرولى، مەملەكەت، ءدىن جانە جەكە تۇلعا، ءداستۇرلى ءدىني قۇندىلىقتار جانە زاماناۋي سىن-قاتەرلەر، ۇلتجاندىلىق – وركەنيەتتى قوعام قالىپتاستىرۋدىڭ نەگىزى سەكىلدى ماسەلەلەر بويىنشا قىزۋ پىكىرتالاس ءوتتى.
دەلەگاسيانىڭ قۇرامىندا «پرەدتەچي بگ» باس ديرەكتورى دوبيچينا ۆيولەتا، سوفيا ۋنيۆەرسيتەتىنىڭ اتىنان كەلگەن پروفەسسور كوليەۆا يرينا، ستانيسلوۆا ستويانوۆا، دوكتورانت نادەجدا جەچكوۆا، اتاناسوۆا پولينا، اتاناسوۆ ديميتار، ەتنيكالىق ازشىلىقتىڭ بالالارى مەن وقۋشىلارىنا ءبىلىم بەرۋ ينتەگراسياسى ورتالىعىنىڭ قىزمەتكەرى اننا كوستوۆا، ماتەماتيك يۆان ميرونوۆ، «زد ەۆروينس» اد كومپانياسىنىڭ قىزمەتكەرى ششيليانا ميرونوۆا، فراكيا ۋنيۆەرسيتەتىنىڭ پروفەسسورى ميتكو شوشيەۆ، دارىگەر ليليانا ۆلچيەۆا سەكىلدى ءارتۇرلى سالادا جۇمىس ىستەيتىن قىزمەتكەرلەر قازاق مادەنيەتى، ءدىلى، تىلىنە قىزىعۋشىلىقتارىن تانىتىپ وتىرعاندارىن جاسىرمادى، وسى كۋرستىڭ اياسىندا بولگاريا رەسپۋبليكاسىنان كەلگەن دەلەگاسيالار قازاق مادەنيەتىمەن، قازاق فيلوسوفياسى مەن ويلاۋ مادەنيەتىنىڭ شىعۋ تەگى جونىندە ءبىراز ماعلۇماتتار العاندىقتارىن ايتتى. ەتنولوگيانى زەرتتەۋشى نادەجدا جەچكوۆا «قازاق حالقىنىڭ مادەنيەتى دە، ادەبيەتى دە تۇسىنگەن ادام ءۇشىن زور مۇرا، قول جەتپەس قازىنا» دەپ ءوز ويىن ساباقتادى.
سونىمەن، «قازاق مادەنيەتى» اتتى حالىقارالىق وقۋ-تانىمدىق جۇمىس جۇرگىزۋ تەوريالىق باعىتتى عانا قامتىپ قويماي، ءوز دارەجەسىندە تاجىريبەلىك-تانىمدىق باعىتتادى جۇمىس ىستەپ، بولگارلىق دەلەگاسيانى تۇركىستان، تاراز سەكىلدى وڭتۇستىك قازاقستاننىڭ قالالارىنداعى تاريحي-ارحەولوگيالىق ەسكەرتكىشتەرىنە ساياحات جاساتىپ قايتتى. بۇل جۇزەگە اسىرىلىپ وتىرعان ءىس-شارا ەكى مەملەكەتكە دە ءوز تيىمدىلىگىن اكەلەرى ءسوزسىز. ەكى مەملەكەت اراسىندا اكادەميالىق موبيلدىلىك باعدارلاماسى تالقىلانىپ، ءعىلىمي-بىلىم بەرۋ سەرىكتەستىگىن دامىتۋ ماسەلەلەرى قاراستىرىلدى. بۇل سەرىكتەستىكتىڭ بولاشاقتا ءوز ناتيجەسىن بەرەتىندىگىنە سەنىم بىلدىرەمىز.
كانتاربايەۆا ج.ۋ.، اليكبايەۆا م.ب.،
ءدىنتانۋ جانە مادەنيەتتانۋ كافەدراسىنىڭ
دوسەنتتەرى
