سكليار ەسكى قازاقستان تۇسىندا تامىر جايدى - دەپۋتات باپي

ساعىنىش سارداروۆا 17 مام. 2024 10:37 3212

ءماجىلىس دەپۋتاتى ەرمۇرات باپي ەسكى قازاقستان تۇسىندا دا بولعان قازىرگى كەيبىر شەنەۋنىكتەردىڭ ىس-ارەكەتىنە باعا بەردى، - دەپ حابارلايدى Dalanews.kz. 

ونىڭ پىكىرىنشە، سكليارعا ەسكى قازاقستاننىڭ ىقپالى بولۋى ابدەن مۇمكىن.

"سكليارعا دەگەن مۇددەلىلىك ساياسي بيلىكتىڭ تاراپىندا بار. ءبىر جامان ويىم، ەسكى قازاقستاننىڭ ىقپالى بار ما دەپ ويلايمىن. ول ەسكى قازاقستاننىڭ كەزىندە كەلدى، سودان قالىپتاسىپ قالدى. سول كەزدە ۆيسە-پرەمەر بولدى. سودان ءبىرىنشى ۆيسەگە جەتتى"، - دەدى ول.

دەپۋتات ءقازىر پرەمەر-مينيستردىڭ ورىنباسارى بولىپ وتىرعان، ءبىرقاتار لاۋازىمدى قىزمەت اتقارعان تامارا دۇيسەنوۆاعا قاتىستى دا پىكىر ءبىلدىردى.

"بىرىنشىدەن، تامارا دۇيسەنوۆا - بىلىكتى ءارى تازا ادام. ول - بىلىكتى، ءبىلىمدى، سودان كەيىن ءوزىنىڭ ىسىنە تازا، ارتىندا شۇبىرعان كوررۋپسيالىق جانجال جوق، تۋرا جۇرەتىن ازامات.

ەكىنشىدەن، تامارا دۇيسەنوۆا باسقاراتىن سالانىڭ ءبارىن وڭالتىپ جىبەرۋگە جالعىز دۇيسەنوۆانىڭ شاماسى جەتپەيدى. بۇل الەۋمەتتىك سالا عوي. مەملەكەتتىك بيۋدجەتتىڭ 50 پايىزدان استامى الەۋمەتتىك سالاعا باعىتتالعان. سونىڭ وزىندە الەۋمەتتىك جاعدايىمىزدى شەشە الماي جاتىرمىز. سوندىقتان وسى تۇرعىدان تامارا دۇيسەنوۆاعا قاتىستى ماسەلەنى ماسشابتى تۇرعىدا قاراۋ كەرەك. ول جەردە پەنسيا، دەنساۋلىق، ءبىلىم - ءبارى بار. قوعامنىڭ، قازاقتىڭ ماسەلەسىنىڭ ءبارى تامارا دۇيسەنوۆانىڭ قولىندا تۇر. سوندىقتان جالعىز ءوزى قىرىپ تاستامادى ەكەن دەپ جازعىراتىنداي ەمەس"، - دەدى دەپۋتات.

ەرمۇرات باپي توتەنشە جاعدايلار مينيسترلىگىن باسقارىپ وتىرعان شىڭعىس ءارىنوۆتىڭ جۇمىسىنا دا باعا بەردى. 

"بىزدە مينيستر، اكىم دەگەن لاۋازىم ساياسي تۇلعا بولۋى كەرەك. ناقتى سول سالانىڭ مامانى بولۋى مىندەت ەمەس. سول سالانىڭ ماسەلەسىنىڭ ءبارىن بىرىكتىرىپ، سونىڭ ساياساتىن قوزعايتىن، ماڭىنا كوماندا توپتاستىرىپ، جۇمىس ىستەۋگە ىقپال ەتەتىن تۇلعا بولۋى كەرەك. ءمۇعالىم دە بولۋى مۇمكىن، ءبىراق سول سالانى جۇمىلدىرا الاتىن بىلىكتىلىگى، تانىمى، تۇيسىگى بار، بەدەلى بار ازامات بولۋى كەرەك.

يت پەن مىسىقتى قۇتقارۋ، جانۋاردى قورعاۋ دەگەن - الەمدىك ترەند. جالپى جامان كورىنىس ەمەس. ءبىراق قازىرگى قالىپتاسقان تاسقىن جاعدايىندا بىزگە وعاش كورىنۋى مۇمكىن. ءبىراق يت مەن مىسىقتى تاسقىننان الىپ شىعۋ ادامزاتتىڭ تۇسىنىگىندە جامان ەمەس قوي. ولاي ەتە بەرسەڭ، تىرناق استىنان كىر ىزدەيتىن ماسەلە كوپ. ءبىراق ونى دا قورعاشتاپ تۇرعان جوقپىن. ءوزى تاعايىندالعانىنا كوپ بولماعان جىگىت قوي. مەن توتەنشە جاعداي مينيسترىنە بايلانىستى الابوتەن ءسوز ايتا المايمىن"، - دەدى ول.


ۇسىنىلعان
سوڭعى جاڭالىقتار