قىزىلوردا وبلىسىندا اۋىل شارۋاشىلىعىنىڭ جالپى ءونىم كولەمى جىل سايىن ارتىپ كەلەدى. وسى جىلى بۇل كورسەتكىشتى 234 ملرد. 800 ملن. تەڭگەگە جەتتى. قازىرگى تاڭدا 6 ملرد. 400 ملن. تەڭگە بولاتىن 9 جوبا ىسكە قوسىلدى. بۇل تۋرالى ەلورداداعى ورتالىق كوممۋنيكاسيالار قىزمەتىندە وتكەن بريفينگتە ايماق باسشىسى نۇرلىبەك نالىبايەۆ مالىمدەدى، دەپ حابارلايدى Dalanews.kz.
«اۋىل شارۋاشىلىعىنىڭ ماشينا-تراكتور پاركى جاڭارتىلىپ، 2022-2024 جىلدارى 21 ملرد. 800 ملن. تەڭگەگە 647 تەحنيكا الىنسا، وسى جىلى 4 ملرد. 700 ملن. تەڭگەگە ماشينا-تراكتور پاركى 139 اۋىل شارۋاشىلىعى تەحنيكالارىمەن تولىقتىرىلدى. دەر كەزىندە قابىلدانعان شەشىمدەردىڭ نەگىزىندە ەگىس القاپتارى تولىق سۋمەن قامتاماسىز ەتىلىپ، ەگىندى شىعىنسىز الىپ قالۋعا بارىنشا جاعدايلار جاسالدى. پرەزيدەنت تاپسىرماسىمەن ايماققا پرەمەر-مينيستر باستاعان ۇكىمەت دەلەگاسياسى ارنايى كەلىپ، شارۋالاردىڭ جاعدايىمەن، ەگىستىڭ جاي-كۇيىمەن تانىستى. توتەنشە جاعدايلار مينيسترلىگى ەلىمىزدىڭ بارلىق وڭىرىنەن 139 قىزمەتكەردەن قۇرالعان جەكە قۇرامدى جەتكىزىپ، ەكى اي بويى شارۋالاردىڭ يگىلىگى ءۇشىن اۋقىمدى جۇمىس اتقاردى. ۇكىمەت رەزەرۆىنەن 53 ناسوس قوندىرعىسىن الۋعا قاجەتتى قارجى ءبولىندى. دەر كەزىندە قابىلدانعان شەشىمدەر ەگىندى شىعىنسىز جيناپ الۋعا جول اشتى. وڭىردە بيىل 189 600 گەكتارعا ەگىن ەگىلدى، 80 900 گەكتارعا سەبىلگەن كۇرىشتىڭ ءار گەكتارىنان 58،1 سەنتنەردەن ءونىم الىنىپ، 470 مىڭ تونناعا جۋىق استىق جينالدى»، – دەدى ن.نالىبايەۆ.
ايماقتا سۋ رەسۋرستارىن نەعۇرلىم ءتيىمدى پايدالانۋ، سۋ شىعىنىن ازايتۋ ماقساتىندا ەگىستىككە جاڭا تەحنولوگيالار ەنگىزىلۋدە. بيىل ديقاندار كۇرىش القاپتارىنىڭ 60 مىڭ گەكتارىن لازەرمەن تەگىستەپ، سۋدى ۇنەمدەپ، ونىمدىلىكتى ارتتىردى. سۋ ۇنەمدەۋ تەحنولوگيالارى 8 100 گەكتارعا پايدالانىلىپ، وتكەن جىلمەن سالىستىرعاندا 2 ەسە ۇلعايدى. شيەلى، قازالى، ارال اۋداندارىندا شەتەلدىك كومپانيالاردىڭ قاتىسۋىمەن سۋ ۇنەمدەۋ تەحنولوگيالارىن قولدانىپ جۇگەرى، جوڭىشقا ەگۋگە باعىتتالعان 3 ءىرى جوبا قولعا الىنعان.
ەگىن شارۋاشىلىعىن ءارتاراپتاندىرىپ، سۋ ۇنەمدەۋ تەحنولوگياسىن ەنگىزگەن شارۋاشىلىقتاردى مەملەكەتتىك قولداۋعا الداعى 3 جىلعا 34 ملرد. تەڭگەدەن استام قارجى ءبولىندى. مەملەكەت باسشىسى سۋدى كوپ قاجەت ەتەتىن داقىلدار ەگىسىن وڭتايلاندىرۋدى، ونىڭ ورنىنا ىلعالعا ءتوزىمدى، ونىمدىلىگى جوعارى، سۇرانىسقا يە جۇگەرى، مايلى داقىلدار كولەمىن ارتتىرۋدى تاپسىردى.
بۇل باعىتتا جۇگەرىنى تەرەڭ وندەيتىن قىزىلوردا كراحمال-سىرنە زاۋىتى جوباسى 2025-2029 جىلدار ارالىعىندا ەكى كەزەڭدە ىسكە اسىرىلادى. ءبىرىنشى كەزەڭدە كەپتىرۋ كەشەنى، ەكىنشى كەزەڭدە جۇگەرىنى تەرەڭ وڭدەيتىن زاۋىت سالىنادى. زاۋىتقا 35 گەكتار جەر تەلىمى تابىستالىپ، 10 مىڭ گەكتارعا ءدان جۇگەرى ەگۋگە شارۋالارمەن كەلىسىم جاسالدى.
ودان بولەك، شۆەيساريالىق «حارۆەست گرۋپ» كومپانياسىمەن بىرلەسىپ، 21 مىڭ گەكتارعا تەحنيكالىق قاراسورا، جۇگەرى جانە سويا وسىرىلەدى، اگرويندۋستريالىق كلاستەر قۇرۋ جوسپارلانۋدا.
بۇل جوبالار ايماقتىڭ ەگىن شارۋاشىلىعىن ءارتاراپتاندىرىپ، سالانى جاڭا دەڭگەيگە كوتەرۋگە وڭ ىقپالىن تيگىزەدى.
