تۇرعىندار بۇرىن قانداي دا ءبىر تاريحي نىسانعا بارعاندا ارنايى گيدتەردىڭ كومەگىنە جۇگىنگەن بولسا، ءقازىر بۇل باعىتتاعى جۇمىستار بارىنشا وڭتايلاندىرىلعان. تەك، ءوز سمارتفونىڭىزعا«App Store» نەمەسە «Play Market» قوسىمشاسى ارقىلى «Taraz Tour» موبيلدىك قوسىمشاسىن جۇكتەپ الساڭىز بولعانى. سودان كەيىن ونداعى «QR» بەلگىسىن باسىپ، سمارتفون كامەراسىن ەسكەرتكىشتىڭ «QR-كود» نىسانىنا باعىتتاپ، سكانەرلەۋ كەرەك. مىنە، وسىدان سوڭ موبيلدىك قوسىمشاداعى قازاقى شاپان كيگەن اقساقال بەينەسىندەگى اۋديوگيد سىزگە عالامتورسىز-اق ەسكەرتكىش تۋرالى بارلىق مالىمەتتى رەت-رەتىمەن ايتىپ بەرەتىن بولادى. سونىمەن بىرگە، قوسىمشانىڭ WEB نۇسقاسى ارقىلى ءوزىڭىز بارعان تاريحي ايماقتى 360 گرادۋستىق فورماتتى كورۋگە مۇمكىندىگىڭىز بار.
وسى ايتىلعان اقپاراتتاردىڭ دۇرىستىعىنا كوز جەتكىزۋ ءۇشىن شۋ اۋدانىندا ورنالاسقان شالعايداعى جايسان عۇرىپتىق كەشەنىنە بارىپ قايتقان بولاتىنبىز. شۋداعى ەجەلگى تۇرىك ورداسى سانالاتىن جايسان دالاسىندا مىڭ جىلدان بەرى تۇرعان، قولىنا ءومىر توستاعانىن ۇستاعان جاۋىنگەردىڭ تاستان جاسالعان ءمۇسىنىنىڭ ماڭىنا ارنايى «QR» تاقتا ورناتىلىپتى. «قازاقستاننىڭ كيەلى جەرلەرىنىڭ گەوگرافياسى» جوباسىنا وڭىرىمىزدەن 8 كيەلى ورىن انىقتالىپ، ۇسىنىلعانى بەلگىلى. ولاردىڭ قاتارىندا مەركى-جايسان تۇركى عۇرىپتىق كەشەنى دە بار. «مادەني مۇرا» تىزىمىنە ۇسىنىلعان كەلەسى ءبىر تاماشا ەسكەرتكىش – مەركى عيباداتحاناسىنىڭ سولتۇستىك جاعىنداعى جايسان عيباداتحاناسى. بۇل ورتاعاسىرلىق تۇرىكتەردەن قالعان مادەني – عۇرىپتىق كەشەن. عيباداتحاناداعى ەسكەرتكىشتەردى زەرتتەۋ جانە ساقتاۋ جۇمىستارى 2001 جىلدان باستاپ قولعا الىنعان. مۇندا ەسكەرتكىشتەردىڭ نەگىزگى بولىگى ورنالاسۋىنا قاراي ءبىر زاڭدىلىققا نەگىزدەلگەن. ياعني، جەرلەۋ قۇرىلىستارى كەشەننىڭ باتىس بولىگىندە ورنالاسسا، عۇرىپتىق قۇرىلىمدار شىعىس بولىگىنە شوعىرلانعان. تەك سيرەك جاعدايدا عانا قورشاۋلار قورعانداردىڭ ورتاسىندا نەمەسە كۋلتتىك كەشەندەردىڭ باتىس بولىگىندە ورنالاسقان. عيباداتحاناعا جۇرگىزىلگەن بارلاۋ جۇمىستارى كەزىندە كوپتەگەن قۇندى زاتتار تابىلعان. ءبىر ايتا كەتەتىن جايت، ارحەولوگ ايمان دوسىمبايەۆانىڭ پايىمداۋىنشا، مۇنداعى ەسكەرتكىشتەردە كەزدەسەتىن رومب ۇلگىسىندەگى تاڭبا اشەكەيلىكتەن باسقا بويتۇمار رەتىندە قىزمەت اتقاراتىن كيەلى سيپاتقا يە بولعان.
مىنە، اتالمىش تاريحي نىسانداعى «QR» تاقتاعا سمارتفون كامەراسىن باعىتتاعانىمىزدا وسىنداي اقپاراتتارعا كۋا بولدىق. قازاقى شاپان كيگەن اۋديوگيد ەسكەرتكىش تۋرالى مالىمەتتەردى ءوزىڭىزدىڭ تاڭداۋىڭىز بويىنشا بەس تىلدە جەتكىزۋگە قاۋقارلى. بۇنداي «QR» تاقتا شۋ اۋدانىنداعى ەجەلگى بالاساعۇن قالاشىعىنا دا ورناتىلىپتى. جوعارىدا اتالعان قوسىمشانىڭ ءبىر ارتىقشىلىعى ول وففلاين رەجيمدە دە جۇمىس ىستەيدى. وسى ورايدا، قوسىمشانى ويلاپ تاپقان ماماندار تاريحي جەرلەر كوبىنەسە شالعاي ايماقتاردا ورنالاسقاندىقتان، وندا عالامتور جەلىسى جوقتىعىن ەسكەرسە كەرەك.
قورىتا ايتقاندا، تاريحي-مادەني نىساندارعا باي اۋليەاتا وڭىرىندە «سيفرلى قازاقستان» مەملەكەتتىك باعدارلاماسى جۇيەلى جۇزەگە اسىپ جاتىر دەۋگە نەگىز بار. ويتكەنى، وبلىسىمىزعا كەلگەن كەز كەلگەن تۋريست ءۇشىن بارلىق مالىمەت موبيلدىك قوسىمشا ارقىلى قولجەتىمدى بولىپ تۇر. بۇل باعىتتاعى جۇمىستار الداعى ۋاقىتتا دا جالعاسىن تاۋىپ، وزگە دە تاريحي نىساندار تولىقتاي سيفرلاندىرىلماق.
