مىنە، وسىنداي تالاپتارعا جەرگىلىكتى جەرلەردەگى ءونىم وندىرۋشىلەردىڭ قولىنان شىققان تاۋاردىڭ تولىقتاي ساي كەلەتىنى ايتپاسا دا بەلگىلى. سوندىقتان بولسا كەرەك، كەيىنگى جىلدارى ەلىمىزدىڭ اۋىلشارۋاشىلىق ءوندىرىسى بايىرعى شيكىزات شىلاۋىنان ءونىمدى تۇبەگەيلى وڭدەۋ مەن دايىن ازىق-تۇلىك ونىمدەرىن شىعارۋ بەلەسىنە بەت بۇرا باستادى.ءسوزىمىزدىڭ ايعاعى رەتىندە، بىلتىر عانا شۋ اۋدانىندا اشىلعان ماكارون ءونىمىن شىعاراتىن سەحتى ايتۋىمىزعا بولادى. تۇتىنۋشىلارىنا دايىن ءونىمدى ۇسىناتىن اتالمىش سەحتىڭ قوسىمشا قۇرىلىمى رەتىندە مۇندا كونديتەرلىك ونىمدەر دە شىعارىلادى. بۇل كاسىپورىننىڭ اشىلعانى ەڭ اۋەلى شۋلىقتارعا ءتيىمدى بولدى. ويتكەنى، جەرگىلىكتى تۇرعىندارعا تۇراقتى جۇمىس ورنى اشىلسا، ونىمەن قوسا، وندىرىلگەن ونىمدەر دە اۋداننىڭ ورتالىق بازارىنا پۇلدانادى. ال، اتالمىش سەحتىڭ ديرەكتورى ەسەنبەك تاجىبەك ۇلىنىڭ ايتۋىنشا، قازىرگى كەزدە سەح ءالى دە بولسا تولىق قۋاتىندا جۇمىس ىستەمەي تۇرعان كورىنەدى.
– جاسىراتىنى جوق، ۇزاق جىلدار بويى ءدال وسى ماكارون مەن كونديتەرلىك ونىمدەردى الماتى مەن شىمكەنت قالاسىنداعى جەكە كاسىپكەرلەردەن ساتىپ الىپ، شۋ اۋدانىنا وتكىزۋمەن اينالىسىپ كەلدىك. كەيىن جاقىندارىممەن اقىلداسا كەلە، ماكاروندى نەگە ءوزىمىز ءوندىرىپ كورمەسكە دەگەن وي كەلدى. راس، اۋەل باستا سەنىمسىزدىك تە بولدى. ايتكەنمەن، تاۋەكەلگە بەل بۋىپ، شۋ قالاسىنان ءبىر عيماراتتى جالعا الىپ، باستاپقىويىمىزدى جۇزەگە اسىرۋعا كىرىسىپ كەتتىك. سەحتىڭ اشىلعانىنا كوپ ۋاقىت بولعان جوق. سول سەبەپتى، ءقازىر ءونىمدى از مولشەردە شىعارىپ جاتىرمىز. مۇندا كونديتەرلىك ونىمدەردى جانە ماكارون مەن كەسپە ونىمدەرىن شىعارۋعا ارنالعان بىرنەشە قۇرىلعى بار. ونىڭ بارلىعىن استانا قالاسىنان ساتىپ الدىق، - دەيدى جەكە كاسىپكەر.
شىنىن ايتۋ كەرەك، دايىن ءونىم قانشا جەردەن ساپالى بولسا دا، بازارداعى باعا ءبارىبىر جەڭىسكە بەيىم كەلەدى ەمەس پە؟ وسىنى ەسكەرگەن كاسىپورىن باسشىلارى اتالعان سەحتىڭ ونىمدەرىن نارىقتاعى باعادان ەداۋىر تومەن باعادا ساتۋدا. سونىمەن قاتار، سەحتاعى ءبىرقاتار كونديتەرلىك ونىمدەر «جاسمين» جانە «ساۋلە» اتاۋىمەنبازار مەن دۇكەن سورەلەرىنە جول تارتۋدا. وعان قوسا، ماكارون مەن «ايگەرىم» اتتى كەسپە دە ارنايى قوراپتارمەن تۇتىنۋشىلارىنا تۇراقتى جەتكىزىلىپ ءجۇر. ەگەر دە تۇتىنۋشىلار ماكاروندى ءارتۇرلى كەلىدەگى تۇرلەرىن ساتىپ الۋدى قولايلى كورسە، مۇنداي سۇرانىستار دا تولىعىمەن وتەلەدى. بۇل جاقتان شىعارىلاتىن بارلىق ءونىمنىڭ اتاسى ءبىر ۇن ەمەس پە دەسەك تە، اتالعان ۇن تۇرلەرىنىڭ ءارقايسىسىنىڭ تەك وزىنە عانا ءتان ەرەكشەلىگى بار ەكەنى ءوز الدىنا ءبىر بولەك اڭگىمە. مىسالى، مۇنداعى كونديتەرلىك ونىمدەر ءبىرىنشى سورتتى ۇننان دايىندالسا، ماكارون ەكىنشى سۇرىپتان ازىرلەنەدى.
