بەلگىلى سپورتشى ىندەتتىڭ بارلىق اۋىرتپالىعىن باسىنان وتكەردى. ەندى ۆيرۋسقا شالدىققان جانداردىڭ ساۋىعىپ كەتۋىنە تىلەكتەس ەكەنىن جەتكىزدى. ءتيىستى ەم-دومنىڭ ارقاسىندا دەرتتەن جازىلىپ شىققان ەلەكترتەحنيكالىق كوللەدجدىڭ ديرەكتورى ازات سارپەكوۆ تا ءقاۋىپتى ۆيرۋسپەن اۋىرعان ادام رەتىندە باسقا ادامدارعا كومەكتەسۋگە دايىن ەكەنىن ءبىلدىرىپ، قان پلازماسىن تاپسىردى.
– پاندەمياعا قارسى ادام ءومىرىن ساقتاپ قالۋ ماقساتىندا قول ۇشىن بەرۋ ءۇشىن قان پلازماسىن تاپسىردىم. شىعىس قازاقستان وبلىسى قان پلازمامەن ناۋقاستاردىڭ ءومىرىن ساقتاپ قالۋدى ەلىمىز بويىنشا ءبىرىنشى بولىپ قولعا الدى. اۋىرىپ شىققاننان كەيىن، دەنەمىزدە قان پلازمالارى قالىپتاسقاندىقتان قينالىپ جاتقان جاندارعا قول ۇشىن سوزۋ ماقساتىندا قان تاپسىرىپ جاتىرمىز. وسىنداي كيىن-قىستاۋ كەزەڭدە ءبىر-بىرىمىزدى قولداۋ كورسەتۋدىڭ ماڭىزى زور، – دەدى ازات سارپەكوۆ.
سەمەي قالالىق اقپارات ورتالىعى سەمەي قالاسىنىڭ قان ورتالىعىندا COVID-19-عا انتيدەنەسى بار يممۋندىق پلازما دايارلاۋ ءۇشىن دونورلار ءتىزىمى جاسالىپ جاتقانىن حابارلادى.
سونداي-اق ىندەتتەن امان جاندار وسى ۆيرۋسقا شالدىققان ادامدارعا قول ۇشىن بەرۋىن جالعاستىرۋدا.
سەمەي قالاسىنداعى اۋرۋحانالاردىڭ بىرىندە كوروناۆيرۋستان ەمدەلىپ جاتقان ناۋقاستارعا شاھارداعى كاسىپكەر 60-ادامعا تۇسكى اس جەتكىزىپ بەردى. قالاداعى كاسىپكەرلەردە بەي-جاي قاراماي قولدان كەلگەن كومەكتەسۋدە. «بۇگىن بىزدە شەت قالماي، يگى ءىستى جالعاستىردىق» دەيدى قىمبات ۋاعىزحانوۆا. وسىلايشا سەمەيلىكتەر ۆيرۋستى جەڭۋدە جانە ناۋقاستار مەن دارىگەرلەرگە قولداۋ بىلدىرۋدە ءوز ۇلەستەرىن قوسۋدا.
قۋانىش راحمەتوللا ۇلى، سەمەي قالاسى.
