بۇگىن حالىقارالىق بالالاردى قورعاۋ كۇنىندە ءۇش ايعا سوزىلعان «جۇرەكتەن جۇرەككە» قايىرىمدىلىق اكسياسى اياقتالدى. 2016 جىلدان بەرى شىعىس قازاقستان وبلىستىق ءبىلىم بەرۋدەگى جاڭا تەحنولوگيالار ورتالىعى قايىرىمدىلىق اكسياسىن وتكىزىپ كەلەدى. اكسيانىڭ التى جىلىندا بۇلدىرشىندەردىڭ 13 مىڭ تىلەگى ورىندالدى. بيىل بالالاردى قۋانتۋ 1 ناۋرىزدان باستالعان، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

– اكسيا بارىسىندا Tylek.kz سايتىندا ەرەكشە قاجەتتىلىكتەرى بار بالالار مەن جاسوسپىرىمدەردەن، كوپبالالى جانە از قامتىلعان وتباسىلاردان، اتا-اجەلەرى قامقورشى جانە اتا-انالارى مۇگەدەك بالالاردان 2944 تىلەك حاتتار ورنالاستىرىلىپ، ورىندالدى، –  دەپ حابارلادى ۆەدومستۆو وكىلدەرى.

شاعىن حاتتارىندا شىعىسقازاقستاندىقتار ءار ءتۇرلى وتىنىشتەرىن ءبىلدىردى. ونىڭ ىشىندە قۋىرشاقتار، ۆەلوسيپەد، كونكي، شاڭعى، كيىم-كەشەكتەر، وقۋ قۇرالدارى مەن كەڭسە تاۋارلارى دا بار. وبلىستىڭ جاناشىر حالقىنىڭ ارقاسىندا بالالار بارلىق قالاعان سىيلىقتارىن الدى. ەڭ بەلسەندى دەمەۋشىلەر وبلىستىق ءبىلىم باسقارماسىنىڭ العىس حاتتارىمەن ماراپاتتالدى.