شىعىس قازاقستان وبلىسىنداعى ۇلان اۋدانىندا تۋريزم سالاسى قارقىندى دامىپ كەلەدى. سوڭعى ءۇش جىل ىشىندە مۇندا 2،7 ملرد تەڭگەگە جوبالار جۇزەگە اسىرىلۋدا. بۇل تۋرالى ۇلان اۋدانى اكىمىنىڭ ورىنباسارى ليازيزا كەنجەتايەۆا وڭىرلىك كوممۋنيكاسيالار قىزمەتىنىڭ الاڭىندا مالىمدەدى،- دەپ حابارلايدى Dalanews.kz
سالاداعى دامۋ رەكرەاسيالىق ايماقتاردى دامىتۋ جوسپارى اياسىندا جۇرگىزىلۋدە جانە ول تابيعي-مادەني نىسانداردى قامتيدى.
بيىل شىبىندىكول كولىنىڭ جاعاسىندا جاڭا دەمالىس بازاسىنىڭ قۇرىلىسى باستالادى. ينۆەستور — «QaiMak Resort» ج ش س، ينۆەستيسيا كولەمى — 250 ملن تەڭگە. سونىمەن قاتار، تارعىن اۋىلىندا كافە مەن سانيتارلىق ايماعى بار جول بويىنداعى كەشەن اشىلادى. بۇل اۋدان بويىنشا تۋريستىك باعىتتاردىڭ تارتىمدىلىعىن ارتتىرادى.
دۋبىگالينسكوە، ايىر جانە شىبىندىكول كولدەرىن اباتتاندىرۋعا، «باگراتيون» پانتاەمدەۋ شيپاجايىن 40 توسەك-ورىنعا كەڭەيتۋگە، سونداي-اق تاريحي-مادەني نىساندار — ابلايكيت، اقباۋىر ارحەولوگيالىق كەشەندەرى مەن بوزانباي اۋىلىنداعى بۇركىتتوبە الاڭىن دامىتۋعا ەرەكشە كوڭىل بولىنۋدە.
سونىمەن قاتار، 7 ەكسكۋرسيالىق مارشرۋت ازىرلەنگەن، ولاردىڭ قاتارىندا «مەدۆەدكا – توعاناس – بەستەرەك» ەكولوگيالىق سوقپاعى بار. بۇل جەردە تۋريستەردىڭ ىڭعايلىلىعى ءۇشىن كيىز ۇيلەر، باستىرمالار، فوتوزونالار مەن باسپالداقتار ورناتۋ جوسپارلانۋدا. اۋىل تۋريزمىنە دە ەرەكشە ءمان بەرىلۋدە: قوناقتارعا ءداستۇرلى ۇيلەردە تىنىعىپ، ءوڭىر مادەنيەتىمەن جاقىنىراق تانىسۋ ۇسىنىلادى.
2024 جىلدىڭ قورىتىندىسى بويىنشا ۇلان اۋدانىنا 13،8 مىڭ تۋريست كەلگەن، ال ورنالاستىرۋدان تۇسكەن كىرىس 261،6 ملن تەڭگەنى قۇرادى. اۋداننىڭ ءيميدجى حالىقارالىق دەڭگەيدەگى ءىس-شارالاردىڭ، سونىڭ ىشىندە الەمنىڭ تۇكپىر-تۇكپىرىنەن بۇركىتشىلەر جينالاتىن «شىعىس سالبۋرىنى» فەستيۆالىنىڭ ارقاسىندا نىعايۋدا.
ۇلان اۋدانى تابيعي سۇلۋلىقتى، تاريحي ورىنداردى جانە زاماناۋي جايلىلىق ستاندارتتارىن بىرىكتىرە وتىرىپ، وزىندىك تۋريستىك برەندىن قالىپتاستىرۋ جولىندا سەنىمدى قادامدار جاساۋدا.
