90-شى جىلداردىڭ ءبىرىنشى جارتىسىندا مەكتەپكە دەيىنگى ءبىلىم بەرۋدى وڭتايلاندىرۋ ايماقتىڭ ءبىلىم بەرۋ سالاسى ءۇشىن ەلەۋلى سىناق بولدى. بالاباقشالار سانى ءبىر دەمدە 896-دان 62-گە دەيىن قىسقاردى.
تۇبەگەيلى وزگەرىستەر «بالاباقشاعا بارامىز» جانە «بالاپان» باعدارلامالارىنىڭ قابىلدانۋىمەن باستالدى. اتالمىش باعدارلاما بويىنشا 3 جاستان 6 جاسقا دەيىنگى بالالاردى مەكتەپكە دەيىنگى تاربيەمەن ءجۇز پايىز قامتۋعا مۇمكىندىك بەرىلدى.
شىعىس قازاقستان وبلىستىق اكىمدىكتىڭ مالىمەتىنشە، 33 مىڭ بالاعا ارنالعان 278 بالاباقشا سالىندى. سونىمەن قاتار، جەكە مەنشىك مەكتەپكە دەيىنگى مەكەمەلەر دە قاتار دامىدى.
بۇگىنگى تاڭدا 70 536 بالانى قامتيتىن 795 بالاباقشا بالالاردى مەكتەپ ومىرىنە ساپالى دايىنداۋ، الەۋمەتتەندىرۋ جانە دامىتۋ قاجەتتىلىگىن تولىق قاناعاتتاندىرادى.
تاۋەلسىزدىك جىلدارىندا جالپى ورتا ءبىلىم بەرۋ جۇيەسىندە عالامات وزگەرىستەر بولدى. وڭىردە 38 145 ورىندىق 147 مەكتەپ سالىندى. 2025 جىلعا دەيىن تاعى 33 مەكتەپ سالۋ جوسپارلانۋدا.
تىلدەردى دامىتۋدىڭ قابىلدانعان مەملەكەتتىك باعدارلاماسى جانە حالىقتىڭ قاجەتتىلىگى وڭىردە مەملەكەتتىك تىلدە وقىتاتىن مەكتەپتەر جەلىسىن دامىتۋدى كوزدەيدى. ەگەر 90-شى جىلداردىڭ باسىندا قازاق تىلىندە وقىتاتىن مەكتەپتەر 28 پايىزدى قۇراسا، ال قازىرگى كورسەتكىش – 78 پايىز.
مەملەكەت دارىندى بالالاردى ودان ارى دامىتۋعا ەرەكشە كوڭىل بولۋدە. شقو-دا جاڭا گيمنازيالار، ليسەيلەر، دارىندى بالالارعا ارنالعان مامانداندىرىلعان مەكتەپتەر، ءتۇرلى پاندەردى تەرەڭدەتىپ وقىتاتىن مەكتەپتەر، نازاربايەۆ زياتكەرلىك مەكتەپتەرى اشىلدى.
بۇدان باسقا، ءبىلىم بەرۋ مازمۇنىنا «ينفورماتيكا» ءپانى ەنگىزىلدى. جوعارى وقۋ ورىندارى وسى بەيىن بويىنشا مۇعالىمدەردى دايارلاپ، مەكتەپتەر – كومپيۋتەرلىك تەحنيكامەن جانە ينتەرنەتپەن جابدىقتالا باستادى.
«سيفرلىق قازاقستان» مەملەكەتتىك باعدارلاماسىن ىسكە اسىرۋ اقپاراتتىق تەحنولوگيالاردى دامىتۋدىڭ جەتىستىگى بولدى. بۇگىنگى تاڭدا وبلىستىڭ ورتا ءبىلىم بەرۋ جۇيەسى كومپيۋتەرلەرمەن جابدىقتالعان.
ينتەرنەتكە قولجەتىمدىلىك بارلىق ءبىلىم بەرۋ مەكەمەلەرىندە، سونىڭ ىشىندە اۋىلدىق جەرلەردە دە بار. ءار مەكتەپتە IT-سىنىپ اشىلىپ، وندا الەمدىك ستاندارتتارعا سايكەس ءار ءتۇرلى باعدارلامالاۋ جانە 3D-مودەلدەۋ تىلدەرىندە سيفرلىق ونىمدەردى جاساۋدىڭ تەرەڭدەتىلگەن باعدارلامالارى ەنگىزىلەدى.
شىعىس قازاقستان وبلىسى ءۇشتىلدى ءبىلىم بەرۋدى ەنگىزۋدىڭ پيلوتتىق الاڭىنا اينالدى. باعدارلاما اياسىندا بىرنەشە پاندەردى ورىس، اعىلشىن جانە قازاق تىلدەرىندە وقىتاتىن مەكتەپتەر جەلىسى دامىتىلدى.
پەداگوگتەردىڭ قۇزىرەتتىلىگىن ارتتىرۋعا ەرەكشە نازار اۋدارىلدى. ءۇش جىل ىشىندە بىلىكتىلىكتى ارتتىرۋ كۋرستارىنان 3 700 تىلدىك ءپان مۇعالىمدەرى ءوتتى.
وبلىس اۋماعىندا جالپى وقۋشىلاردىڭ 90 پايىزىن (173 مىڭ) قامتيتىن 114 قوسىمشا ءبىلىم بەرۋ ۇيىمى جۇمىس ىستەيدى. 6 669 سپورت سەكسياسىندا بالالاردىڭ 56 پايىزى تەگىن سپورتپەن شۇعىلدانادى.
ايتا كەتۋ كەرەك، ەرەكشە ءبىلىم بەرۋ قاجەتتىلىكتەرى بار بالالارعا ءبىلىم بەرۋ ءتاسىلى تۇبەگەيلى وزگەردى. ەگەر 90-شى جىلدارى وبلىس اۋماعىندا 27 ارنايى مەكتەپ-ينتەرنات جۇمىس ىستەسە، ينكليۋزيۆتى ءبىلىم بەرۋدى دامىتۋ جونىندەگى مەملەكەتتىك ساياساتتىڭ ارقاسىندا ولاردىڭ سانى ەكى ەسەگە قىسقاردى. مۇمكىندىگى شەكتەۋلى بالالار قاراپايىم مەكتەپتەردە ساپالى ءبىلىم الۋعا قول جەتكىزدى.
بۇگىنگى كۇنى وبلىستىڭ بارلىق 644 مەكتەبىندە ينكليۋزيۆتى ءبىلىم بەرۋ ءۇشىن جاعداي جاسالعان. 16 پسيحولوگيالىق-پەداگوگيكالىق تۇزەتۋ جانە 75 ينكليۋزيانى قولداۋ كابينەتتەرى اشىلدى.
