قازاقستان سيفرلىق تاۋەلسىزدىكتى ستراتەگيالىق ماقسات رەتىندە ايقىنداپ، جاساندى ينتەللەكت تەحنولوگيالارىن بەلسەندى تۇردە دامىتىپ جاتىر. 2024 جىلى 2029 جىلعا دەيىنگى ءجي-دى دامىتۋ تۇجىرىمداماسى بەكىتىلدى. بۇل قۇجات اۋقىمدى مىندەتتەردى العا قويادى: بەس جىل ىشىندە ميلليون ادامدى جي نەگىزدەرىنە ۇيرەتۋ، ۇلتتىق پلاتفورمانى قۇرۋ، ءوزىمىزدىڭ تىلدىك مودەلى — KazLLM-دى ازىرلەۋ جانە وتاندىق IT-كونتەنتتىڭ ۇلەسىن 80%-عا دەيىن جەتكىزۋ. بۇل تۋرالى شقو سيفرلاندىرۋ جانە ارحيۆتەر باسقارماسى باسشىسىنىڭ ورىنباسارى ارنۇر ساپارعالييەۆ وڭىرلىك كوممۋنيكاسيالار قىزمەتى الاڭىندا مالىمدەدى، دەپ حابارلايدى Dalanews.kz
جاساندى ينتەللەكت ءقازىردىڭ وزىندە مەديسينا، كولىك جانە مەملەكەتتىك قىزمەتتەر سالالارىندا قولدانىلا باستادى. CerebraAI جانە MED365 شەشىمدەرى دارىگەرلەرگە دياگنوز قويۋدا كومەكتەسەدى، ال «قتج» بازاسىندا پويىز قوزعالىسىن وڭتايلاندىرۋ ءۇشىن سيفرلىق پوليگوندار قۇرىلىپ جاتىر. قوعامدىق قاۋىپسىزدىك سالاسىندا «OPER 2.0» بەينەاناليتيكا جۇيەسى ەنگىزىلدى، ال eGov اياسىندا ينتەللەكتۋالدى چات-بوت ازىرلەنۋدە.
ەلدە Cybernet AI، Verigram، Webtotem سەكىلدى كومپانيالاردى بىرىكتىرەتىن تۇتاس جي ەكوجۇيەسى قالىپتاسىپ جاتىر. Alem.AI حالىقارالىق ورتالىعى سالىنۋدا، ول زەرتتەۋلەر مەن ستارتاپتارعا ارنالعان الاڭعا اينالماق. قازاقستان ۋنيۆەرسيتەتتەرى دە بۇل سالانىڭ دامۋىنا بەلسەنە اتسالىسىپ وتىر.
سيفرلىق تاۋەلسىزدىكتىڭ اجىراماس بولىگى — كيبەرقاۋىپسىزدىك. قازاقستان ITUء-دىڭ جاھاندىق يندەكسىندەگى پوزيسياسىن جاقسارتتى، KZ-CERT ورتالىعى جۇمىس ىستەيدى، «كيبەرقالقان قازاقستان» تۇجىرىمداماسى جۇزەگە اسىرىلۋدا جانە سيفرلىق كودەكس پەن جي تۋرالى زاڭدار دايىندالىپ جاتىر.
ينفراقۇرىلىمدى دامىتۋعا، ونىڭ ىشىندە دەرەكتەردى وڭدەۋ ورتالىقتارىنا ەرەكشە كوڭىل بولىنۋدە. سونداي-اق جي-دى جاستار مەن بيزنەس اراسىندا ىلگەرىلەتۋگە باسىمدىق بەرىلمەك. وسى باستامالار ارقىلى قازاقستان ورتالىق ازيانىڭ سيفرلىق حابى رەتىندە ءوز پوزيسياسىن نىعايتىپ، تەحنولوگيالىق ەگەمەندىككە ناقتى قادامدار جاساۋدا.
