شقو-نى قازاقستاننان ءبولۋ كەرەك دەگەن ەكى ادام سوتتالدى

ساعىنىش سارداروۆا 11 ماۋ. 2024 15:33 2402

شقو-نىڭ ەكى تۇرعىنى بيلىكتى باسىپ الۋ جانە سەپاراتيستىك ارەكەتتەردى ناسيحاتتاعانى ءۇشىن 5 جىلعا سوتتالدى، - دەپ حابارلايدى Dalanews.kz.

شىعىس قازاقستان وبلىسىنىڭ پروكۋراتۋراسى مالىمەتىنشە، وسكەمەن قالالىق №2 سوتىنىڭ شەشىمىمەن شىعىس قازاقستان وبلىسىنىڭ ەكى تۇرعىنى ۇلتتىق جانە الەۋمەتتىك ارازدىقتى قوزدىراتىن جاريالانىمدار مەن ۇگىت-ناسيحاتتارى ءۇشىن سوتتالدى.

"تەرگەۋ بارىسىندا ولار 2024 جىلدىڭ اقپان ايىندا ينتەرنەت-رەسۋرستاردى (چات-رۋلەتكا) پايدالانىپ، شىعىس قازاقستان وبلىسىن قازاقستان رەسپۋبليكاسىنان ءبولۋ ماقساتىندا رەفەرەندۋم وتكىزۋ قاجەتتىگى تۋرالى سەنىمدەرى مەن يدەيالارىن بىلدىرگەنى بەلگىلى بولدى.

ولار رەفەرەندۋمدا وڭ ناتيجەگە قول جەتكىزىلمەگەن جاعدايدا وبلىستى كۇشتەپ باسىپ الۋدى ناسيحاتتادى"، - دەپ جازىلعان مالىمەتتە.

ايىپتالۋشىلار ءوز كىنالارىن تولىق مويىنداپ، وكىنىش ءبىلدىردى.

مەملەكەتتىك ايىپتاۋشى سوتتا ولاردىڭ ءارقايسىن 5 جىلعا باس بوستاندىعىنان ايىرۋدى سۇرادى.

زاڭدى كۇشىنە ەنگەن سوت ۇكىمىمەن كىنالىلەر 5 جىلعا باس بوستاندىعىنان ايىرىلدى. 

"مەملەكەتتىڭ قاۋىپسىزدىگى مەن تۇتاستىعىن قامتاماسىز ەتۋ ماسەلەلەرى قۇقىق قورعاۋ جانە ارنايى ورگانداردىڭ ەرەكشە باقىلاۋىندا"، - دەدى پروكۋراتۋرا وكىلدەرى.

 

 


ۇسىنىلعان
سوڭعى جاڭالىقتار