شقو-دا 436،1 مىڭ گەكتار جەرگە ەگىن ەگىلدى، بۇل جوسپارلانعان كولەمنىڭ 70 پايىزىن قۇرايدى. بۇل تۋرالى شقو اۋىل شارۋاشىلىعى باسقارماسىنىڭ باسشىسى اجار كادجيبەكوۆا وڭىرلىك كوممۋنيكاسيالار قىزمەتى الاڭىندا مالىمدەدى، – دەپ حابارلايدى Dalanews.kz
2025 جىلى وبلىستاعى جالپى ەگىستىك كولەمى 618،1 مىڭ گەكتاردى قۇرايدى. بۇل وتكەن جىلمەن سالىستىرعاندا 10،8 مىڭ گەكتارعا كوپ. اتاپ ايتقاندا، ءداندى داقىلدارعا 252،6 مىڭ گەكتار، مايلى داقىلدارعا 224،5 مىڭ گەكتار بولىنگەن. ونىڭ ىشىندە 207 مىڭ گەكتارى كۇنباعىسقا ارنالعان. سونىمەن قاتار، كارتوپ پەن قاراقۇمىق ەگىلەتىن القاپتار دا ۇلعايتىلعان.
اگروونەركاسىپ كەشەنىندەگى باستى جاڭالىقتاردىڭ ءبىرى – زاماناۋي سەبۋ تەحنيكاسىنىڭ كەڭىنەن ەنگىزىلۋى. GPS-ناۆيگاسيا جانە قاشىقتان باسقارۋ جۇيەسىمەن جابدىقتالعان كەشەندەر اگروتەحنيكالىق تالاپتاردى ءدال ساقتاۋعا، تۇقىم مەن جانارمايدى ۇنەمدەۋگە، ءارى ەگىس جۇمىسىن ايتارلىقتاي جەدەلدەتۋگە مۇمكىندىك بەرۋدە. مۇنداي كەشەن ءبىر كۇندە 100–150 گەكتار جەردى وڭدەي الادى.
شارۋالاردى جانار-جاعارمايمەن قامتۋ ءۇشىن 15،5 مىڭ توننا ارزانداتىلعان ديزەل وتىنى بولىنگەن، ونىڭ 46 پايىزى بۇگىندە جەتكىزىلدى. سونىمەن قاتار، 44،2 مىڭ توننا مينەرالدى تىڭايتقىشقا كەلىسىمشارت جاسالىپ، 40 مىڭ تونناسى وڭىرگە جەتكىزىلدى.
ەگىس ناۋقانىنا قارجىلاي قولداۋ دا كورسەتىلۋدە. «كەڭ دالا 2» جەڭىلدەتىلگەن نەسيە بەرۋ باعدارلاماسى اياسىندا 96 اۋىل شارۋاشىلىعى ءوندىرۋشىسى جالپى سوماسى 7،3 ملرد تەڭگەگە نەسيە الدى. بۇدان بولەك، «ەرتىس» الەۋمەتتىك-كاسىپكەرلىك كورپوراسياسى ارقىلى 5،9 ملرد تەڭگە ءبولىنىپ، تاعى ءتورت شارۋاشىلىق قارجىلاندىرىلدى. وبلىستىق بيۋدجەتتەن تۇقىم شارۋاشىلىعىن، تىڭايتقىش پەن پەستيسيدتەر قۇنىن ارزانداتۋعا، سونداي-اق سۋارمالى سۋدى جەتكىزۋگە 5،1 ملرد تەڭگە كولەمىندە سۋبسيديا ءبولىندى.
مەملەكەتتىك قولداۋ مەن سيفرلىق تەحنولوگيالاردىڭ ارقاسىندا شىعىسقازاقستاندىق ديقاندار كوكتەمگى ناۋقاندى ساپالى ءارى ۋاقىتىلى جۇرگىزىپ، مول ءونىمنىڭ نەگىزىن قالاۋدا.
