مەرەكە اياسىندا شقو-دا ءوڭىر مەن ەلدىڭ دامۋىنا ەلەۋلى ۇلەس قوسقان شىعىسقازاقستاندىقتاردى مەرەكەلەۋدىڭ سالتاناتتى راسىمدەرى وتەدى. بۇدان باسقا الەۋمەتتىك، قايىرىمدىلىق جانە ەكولوگيالىق اكسيالار ۇيىمداستىرىلادى. بۇل تۋرالى شقو وڭىرلىك كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسىندا قوعامدىق دامۋ باسقارماسىنىڭ باسشىسى سەرىك جەڭىسوۆ ايتىپ ءوتتى.
– وبلىس تۇرعىندارى "قىران ەلىم-قازاقستان!"ونىڭ اياسىندا مەملەكەتتىك گيمندى جاپپاي ورىنداۋ، سونداي-اق تۋدى سالتاناتتى تۇردە كوتەرۋ شاراسى وتەدى. ءبىلىم جانە مادەنيەت ۇيىمدارىندا رەسپۋبليكا كۇنىنە ارنالعان كورمەلەر، دارىستەر، سىنىپ ساعاتتارى وتپەك، – دەدى سەرىك جەڭىسوۆ.
21-28 قازان ارالىعىندا "ەرتىس كونسەرت" عيماراتىندا وبلىس ورتالىعىنىڭ تۇرعىندارى مەن قوناقتارى ءۇشىن "ۇلى دالا التىنى" كورمەسى، كىلەم توقۋ شەبەرلەرى جانە "اباي الەمى"كىتاپ كورمەسى اشىلدى. سونىمەن قاتار، مەرەكە كۇنى وبلىستىڭ كيەلى ورىندارىنىڭ بىرى-مەملەكەتتىك رامىزدەر تاۋىنا شىعۋ بىرەگەي شاراسى وتپەك. بارلىق نيەت بىلدىرۋشىلەر قاتىسا الادى.
سونىمەن قاتار، وڭىردە ءبىرقاتار الەۋمەتتىك نىسانداردى اشۋ جوسپارلانۋدا. وسكەمەن قالاسىندا 150 ورىندىق "Family Island-2" بالاباقشاسى پايدالانۋعا بەرىلەدى.
– زايسان اۋدانىندا شىلىكتى، كەڭساي، دايىر اۋىلدارىندا كۇردەلى جوندەۋدەن كەيىن ءۇش اۋىلدىق دارىگەرلىك امبۋلاتوريا، دايىر اۋىلىندا "شىعىس مەيىرىمى" وڭالتۋ ورتالىعى، جامبىل، قاينار، قۋانىش اۋىلدارىندا كۇردەلى جوندەۋدەن كەيىن مەديسينالىق پۋنكتتەر، كوگەداي اۋىلىندا شاعىن فۋتبول الاڭى اشىلادى، سونداي-اق قاينار اۋىلىندا سۋ قۇبىرى ىسكە قوسىلادى، – دەدى سپيكەر.
تارباعاتاي اۋدانىندا تۇعىل اۋىلىنداعى مادەنيەت ءۇيىنىڭ اۋماعىندا سۋبۇرقاق، بالالار ويىن الاڭى، اللەيا، اقمەكتەپ اۋىلىنداعى مەديسينالىق پۋنكت سالتاناتتى تۇردە اشىلادى، ۇلان اۋدانىندا كامەنكا، الماساي، كازاچە اۋىلدارىندا ءبىرقاتار سپورت الاڭدارىن اشۋ جوسپارلانۋدا، ال شەمونايحا اۋدانىندا "لەسەنكا" بالالاردى دامىتۋ ورتالىعى اشىلادى.
– بارلىق ەلدى مەكەندەردە ءبىزدىڭ سۇيىكتى وتانىمىز تۋرالى تانىمال كومپوزيتورلاردىڭ اندەرى شىرقالادى. شىعىس قازاقستاندىقتاردى رەسپۋبليكا كۇنى مەرەكەسىنە وراي وتكىزىلەتىن ءىس-شارالارعا بەلسەندى قاتىسۋعا شاقىرامىز، – دەپ اتاپ ءوتتى سەرىك جەڭىسوۆ.
