شقو-دا 12 اسا ءقاۋىپتى اۋرۋعا قارسى اۋقىمدى ۆەتەرينارلىق-الدىن الۋ شارالارى جۇرگىزىلەدى. جالپى كولەمى 4،7 ميلليون دوزاعا جۋىق ۆاكسيناسيالاۋ جوسپارلانعان. بۇل تۋرالى شقو ۆەتەريناريا باسقارماسى باسشىسىنىڭ ورىنباسارى ەرتاي باتحولدين وڭىرلىك كوممۋنيكاسيالار قىزمەتى الاڭىندا مالىمدەدى،– دەپ حابارلايدى Dalanews.kz
باسقارمانىڭ مالىمەتىنشە، بۇگىنگى تاڭدا وبلىسقا 2،2 ميلليون دوزا بيوپرەپارات جەتكىزىلگەن، بۇل جالپى كولەمنىڭ 46%-ىن قۇرايدى. وڭىردە الدىن الۋ ماقساتىندا جالپى سانى 539 مىڭنان استام ۆەتەريناريالىق ءىس-شارالار اتقارىلدى. اتاپ ايتقاندا، ءىرى قارا مالعا ءسىبىر جاراسى، اۋسىل جانە باسقا دا جۇقپالى اۋرۋلارعا قارسى ەكپەلەر ەگىلدى. سونىمەن قاتار، يتتەر اراسىندا قۇتىرما، ال جىرتقىش جانۋارلار اراسىندا ەحينوكوككوز اۋرۋىنىڭ الدىن الۋ جۇمىستارى جۇرگىزىلۋدە.
— ۆەتەريناريالىق قىزمەتتىڭ كۇشەيۋى — ازىق-تۇلىك قاۋىپسىزدىگىنىڭ نەگىزى. جانۋارلاردىڭ دەنساۋلىعى ەت، ءسۇت جانە باسقا دا ونىمدەردىڭ ساپاسىنا تىكەلەي اسەر ەتەدى، — دەپ اتاپ ءوتتى ەرتاي باتحولدين.
وڭىردە 11 كوممۋنالدىق مەملەكەتتىك كاسىپورىن جۇمىس ىستەيدى، ولار 99 ۆەتەرينارلىق پۋنكتتى بىرىكتىرەدى. بۇل پۋنكتتەردە 475 مامان ەڭبەك ەتۋدە. اعىمداعى جىلدىڭ ءبىرىنشى توقسانىندا ولار 60 مىڭنان استام مەملەكەتتىك قىزمەت كورسەتتى. بارلىق قۇجات اينالىمى «ەاسۋ»، «يسج» اقپاراتتىق جۇيەلەرى مەن «VET-MOBILE» موبيلدىك قوسىمشاسى ارقىلى ەلەكتروندىق فورماتتا جۇزەگە اسىرىلادى.
بۇدان بولەك، وڭىردە اۋىل شارۋاشىلىعى جانۋارلارىن سايكەستەندىرۋ جۇمىستارى جالعاسۋدا. بۇگىنگى تاڭدا جىلدىق جوسپاردىڭ 20،8%-ى ورىندالىپ، 100 مىڭنان استام جانۋار تىركەۋدەن ءوتتى. بۇل شارالار مال باسىن جانە بارلىق ۆەتەرينارلىق راسىمدەردى ءتيىمدى باقىلاۋعا مۇمكىندىك بەرەدى.
