شقو ەكولوگيا دەپارتامەنتى 2025 جىلدىڭ ءبىرىنشى جارتىجىلدىعىنداعى جۇمىس قورىتىندىسىن جاريالادى. تەكسەرۋلەر شاعىن بيزنەس سۋبەكتىلەرىنەن باستاپ ءىرى ونەركاسىپتىك كاسىپورىندارعا دەيىنگى دەڭگەيدەگى نىسانداردى قامتىدى. بۇل تۋرالى شقو بويىنشا ەكولوگيا دەپارتامەنتى باسشىسىنىڭ م.ا. اسەت سۋلەيمەنوۆ وڭىرلىك كوممۋنيكاسيالار قىزمەتىندە وتكەن بريفينگتە مالىمدەدى،- دەپ حابارلايدى Dalanews.kz
– بارلىعى 33 تەكسەرۋ جۇرگىزىلىپ، 86 زاڭبۇزۋشىلىق انىقتالدى، سونشا نۇسقاما بەرىلدى. سالىنعان ايىپپۇلداردىڭ جالپى سوماسى 1،73 ملرد تەڭگەنى قۇرادى، – دەدى اسەت سۋلەيمەنوۆ.
ءىرى ايىپپۇلدار ءوڭىردىڭ ونەركاسىپتىك كاسىپورىندارىنا سالىندى:
• «سينسين» ج ش س – 1،066 ملرد تگ؛
• «كازسينك» ج ش س – 1،7 ملرد تگ-دان استام جانە قوسىمشا 60،9 ملن تگ ايىپپۇل (تولىعىمەن تولەنگەن)؛
• «تمك» اق – 24 ملن تگ؛
• «وسكەمەن جەو» ج ش س – شامامەن 26،9 ملن تگ.
دەپارتامەنتتىڭ مالىمەتىنشە، كاسىپورىندار تابيعاتتى قورعاۋ شارالارىنا ينۆەستيسيا سالۋدى جالعاستىرۋدا. اسىرەسە، ەكولوگياعا بولىنگەن قارجى كەيدە جوسپارلانعان مولشەردەن اسىپ تۇسەدى.
ايرىقشا نازار اۋا ساپاسىن باقىلاۋعا اۋدارىلۋدا. وبلىس ورتالىعىندا قولايسىز مەتەورولوگيالىق جاعدايلار 63 كۇن بويى تىركەلدى. باقىلاۋدى كۇشەيتۋ ءۇشىن قازان ايىنا دەيىن وڭىرگە جىلجىمالى ەكولوگيالىق زەرتحانا جەتكىزىلمەك. بۇدان بولەك، اكىمدىك 15 باقىلاۋ بەكەتىن جانە ءبىر فوندىق ستانسيا ساتىپ الۋدا.
ەكولوگيالىق مادەنيەت تە ماڭىزدى باعىت بولىپ قالا بەرمەك. رەسپۋبليكالىق «تازا قازاقستان» اكسياسى اياسىندا شقو-دا 33 مىڭنان استام ادام قاتىسقان جاپپاي سەنبىلىكتەر ءوتتى. ناتيجەسىندە 1020 توننادان استام قوقىس جينالدى. سونداي-اق 46،7 مىڭعا جۋىق اعاش وتىرعىزىلدى، بۇل جىلدىق جوسپاردىڭ 40%-ىن قۇرايدى.
سونىمەن قاتار ءوڭىر مەكتەپتەرىنىڭ وقۋشىلارى تابيعاتتى قورعاۋ تاقىرىبىنداعى شىعارمالار بايقاۋىنا بەلسەنە قاتىستى. بايقاۋعا 48 مىڭنان استام وقۋشى ءوز جۇمىستارىن ۇسىندى.
