بيىل جازدا شقو-دا وقۋشىلاردىڭ 99،9%-ى جازعى دەمالىسپەن جانە پايدالى ىستەرمەن قامتىلادى. اسىرەسە، كوپبالالى جانە از قامتىلعان وتباسىلاردىڭ بالالارىنا ەرەكشە كوڭىل بولىنەدى — بۇل ساناتتاعى وقۋشىلار 100% قامتىلادى. بۇل تۋرالى شقو ءبىلىم باسقارماسىنىڭ باسشىسى ينەسسا چەرنىشيەۆا وڭىرلىك كوممۋنيكاسيالار قىزمەتى الاڭىندا مالىمدەدى، دەپ حابارلايدى Dalanews.kz
بالالاردى جازعى دەمالىسپەن، ساۋىقتىرۋمەن جانە جۇمىسپەن قامتۋ ءۇشىن قالا جانە اۋدان بيۋدجەتىنەن 634،5 ميلليون تەڭگە ءبولىندى. بۇل قاراجات جولدامالار ساتىپ الۋعا، لاگەرلەردىڭ ماتەريالدىق-تەحنيكالىق بازاسىن جوندەۋگە جانە نىعايتۋعا جۇمسالادى.
جازدا اشىلاتىن الاڭدار:
• 12 سىرتقى لاگەر (8 مەملەكەتتىك، 4 جەكەمەنشىك جانە 1 جىل بويى جۇمىس ىستەيتىن لاگەر) – 10 087 وقۋشىنى قابىلدايدى؛
• 270 مەكتەپ جانىنداعى لاگەر (تاماقپەن) – 23 120 بالانى قامتيدى؛
• 204 بەيىندى الاڭ، ۇيىرمەلەر مەن سەكسيالار – 60 357 وقۋشىنى قامتيدى.
ءداستۇرلى دەمالىس تۇرلەرىمەن قاتار، بىرەگەي جوبالار دا جۇزەگە اسىرىلادى:
• سامار اۋدانىنداعى «بالاۋسا» لاگەرىنىڭ بازاسىنداعى اسكەري-سپورتتىق لاگەر 100 ءجاسوسپىرىمدى قابىلدايدى (وتكەن جىلمەن سالىستىرعاندا ەكى ەسە كوپ)؛
• «قوناقجاي وتباسى» جوباسى اياسىندا 140 بالا قازاق ءتىلىن ۇيرەنىپ، قازاق حالقىنىڭ مادەنيەتى مەن تۇرمىسىمەن تانىسا الادى؛
• «كيەلى شىعىس» اتتى جاڭا باعدارلاما اياسىندا 200 وقۋشى تاريحي جانە تابيعي ەسكەرتكىشتەرگە وقۋ-تانىمدىق تۋرلارعا قاتىسادى؛
• 140 جەتىم بالا مەن بالالار ءۇيىنىڭ تاربيەلەنۋشىلەرى ءۇشىن بۇقتىرما سۋ قويماسىنا وزەن ەكسكۋرسيالارى ۇيىمداستىرىلادى.
كاسىپتىك باعدار بەرۋ مەن داعدىلاردى دامىتۋ دا نازاردا. وبلىستاعى 10 كوللەدجدە 500 وقۋشىعا ارنالعان جازعى لاگەرلەر اشىلادى. ولار روبوتوتەحنيكا، اسپازدىق، لازەرلىك كەسۋ سياقتى باعىتتارمەن تانىسادى. سونىمەن قاتار، الەۋمەتتىك وسال ساناتتاعى 150 كوللەدج ستۋدەنتى ۇلكەن نارىن اۋدانىنداعى بۇقتىرما جاعاسىندا دەمالادى.
بالالاردىڭ قاۋىپسىزدىگى — باستى نازاردا. وبلىستا ارنايى ۆەدومستۆوارالىق شتاب قۇرىلدى، سۋ ايدىندارىندا ۆودولازدىق تەكسەرۋلەر جۇرگىزىلۋدە. لاگەرلەر سانيتارلىق قورىتىندى الادى، ال جاعدايدى مونيتورينگتىك توپتار قاداعالايدى.
شىعىس قازاقستانداعى بۇل جاز تەك جىلى عانا ەمەس، بالالار مەن جاسوسپىرىمدەر ءۇشىن پايدالى، دامىتۋشى جانە ەڭ باستىسى ءقاۋىپسىز دەمالىس ۋاقىتى بولماق.
