قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن ۇلتتىق مادەنيەتتى دامىتۋ مەن ناسيحاتتاۋعا قوسقان ەرەكشە ۇلەسى جانە مادەنيەت سالاسىنداعى ەلەۋلى جەتىستىكتەرى ءۇشىن ۇلان اۋداندىق ءماسليحاتىنىڭ دەپۋتاتى، مادەنيەت قىزمەتكەرى نۇرتاي تىلەۋجان «قۇرمەت» وردەنىمەن ماراپاتتالدى.
شقو اكىمى نۇرىمبەت ساقتاعانوۆ مادەنيەت قايراتكەرىن جوعارى ماراپاتىمەن قۇتتىقتاپ، الداعى ۋاقىتقا شىعارماشىلىق تابىستار تىلەدى.
نۇرتاي تىلەۋجان موڭعوليانىڭ بايان-ولگەي ايماعىندا دۇنيەگە كەلگەن. 1991 جىلى العاش رەت قازاقستانعا ايتىس سايىسىنا قاتىسۋ ءۇشىن كەلگەن، ال 1992 جىلى وتباسىمەن بىرگە تاريحي وتانىنا قونىس اۋدارىپ، ۇلان اۋدانىنىڭ ايىرتاۋ اۋىلىنا تۇراقتاعان. قازاقستانعا كەلگەن سوڭ، اۋىل شارۋاشىلىعىندا ەڭبەك ەتىپ، كەيىننەن اۋداندىق مادەنيەت ۇيىنە جۇمىسقا ورنالاسقان. ول ءوزىنىڭ شىعارماشىلىق قابىلەتتەرى مەن قوعامدىق بەلسەندىلىگى ارقىلى تانىلىپ، بەس رەت اۋداندىق ءماسليحات دەپۋتاتى بولىپ سايلانعان.
نۇرتاي تىلەۋجان – اۋداندىق مادەنيەت ءۇيىنىڭ ءسوليسى رەتىندە ونەر كورسەتىپ، ايتىس ونەرىندە دە بەلسەندىلىك تانىتقان. ول ءوزىنىڭ شىعارماشىلىعى ارقىلى ۇلتتىق مادەنيەتتى ناسيحاتتاپ، جاستارعا ۇلگى بولۋدا.
ول قوعامدىق ءىس-شارالارعا بەلسەنە قاتىسىپ، جاستاردى پاتريوتتىق رۋحتا تاربيەلەۋگە اتسالىسادى. ول «پاراسات جولى» جوباسى اياسىندا ۇيىمداستىرىلعان رۋحاني كەزدەسۋلەرگە قاتىسىپ، سىبايلاس جەمقورلىققا قارسى مادەنيەتتى قالىپتاستىرۋعا ءوز ۇلەسىن قوسۋدا.
