ءوڭىر باسشىسى دانيال احمەتوۆ ەلشىگە شىعىس قازاقستان وبلىسىنىڭ دامۋىنىڭ نەگىزگى باعىتتارى تۋرالى ايتىپ، سونىڭ ىشىندە ونەركاسىپ پەن اگرارلىق سالالارىنا ەرەكشە توقتالىپ ءوتتى.
– وڭدەۋ دەڭگەيىن تەرەڭدەتۋ ارقىلى اتوم ونەركاسىبىن دامىتۋ جۇمىستارى جۇرگىزىلۋدە. مەملەكەتىمىزدىڭ قۋاتپەن قامتۋ جۇيەسىنىڭ تۇراقتىلىعىن ارتتىرۋعا مۇمكىندىك بەرەتىن ءبىرقاتار سۋ ەلەكتر ستانسيالارىنىڭ قۇرىلىسى باستالدى. اگرارلىق سەكتور دامىپ كەلەدى، ونىڭ ءونىمىن كورشى مەملەكەتتەرگە شىعارۋدى جوسپارلاپ وتىرمىز، – دەدى دانيال احمەتوۆ كەزدەسۋ بارىسىندا.
دجوردج كرول ءوز كەزەگىندە شىعىس قازاقستاندا اقش ينۆەستيسياسىنىڭ بار ەكەنىن جانە الەۋمەتتىك سالادا تىعىز قارىم-قاتىناس ورنىققانىن اتاپ ءوتتى.
– شىعىس قازاقستان وبلىسىنىڭ دامۋ الەۋەتى جوعارى. جالپى، بىزگە قازاقستانمەن جاقسى جانە ناتيجەلى بايلانىس ماڭىزدى، – دەدى ەلشى.
دجوردج كرول شىعىس قازاقستانعا ەكى كۇندىك جۇمىس ساپارى بارىسىندا وسكەمەن قالاسىنىڭ ءبىلىم بەرۋ، مادەنيەت جانە دەنساۋلىق ساقتاۋ مەكەمەلەرىن ارالادى.
ايتا كەتسەك، 2016 جىلدىڭ 4 ايىندا شىعىس قازاقستان وبلىسىنىڭ اقش-پەن تاۋار اينالىمى 29،2 ملن اقش دوللارىن قۇرادى. ەكسپورت 14،7 ملن اقش دوللارىن، يمپورت 14،5 ملن اقش دوللارىن قۇراپ وتىر.
«قمد» اقپارات
